Mishumo Ya Vhaapostola 21:1-40
21 Musi ro no onesana navho ra ya ngei Kosi nga tshikepe, nga ḓuvha ḽi tevhelaho ra ya Rodo, ra kona u fhirela Patara.
2 Ro no wana tshikepe tshine tsha khou ya Fenikia, ra ṋamela ra ṱuwa.
3 Musi ri nḓilani ya u ya Siria, ra vhona tshiṱangadzime tsha Kipiro nga thungo ya tsha monde, ra ima Tiro, tshikepe tsha tsitsa thundu.
4 Ra ṱoḓa vhafunziwa henefho, ra vha wana, ra dzula maḓuvha a sumbe. Fhedzi vha dzula vha tshi vhudza Paulo uri a songo ya Yerusalema nge muya mukhethwa wa vha wo vha vhudza.+
5 Tshifhinga tsha u ṱuwa tsha swika, vhathu vhoṱhe u katela na vhafumakadzi na vhana, vha ri fhelekedza vha ri bvisa kha wonoyo muḓi. Ra gwadama khunzi-khunzini ra rabela,
6 ra onesana. Ra ṋamela tshikepe, vhone vha humela mahayani avho.
7 Ra bva Tiro nga tshikepe ra swika Pitolemai, ra lumelisana na vhahashu, ra dzula navho ḓuvha ḽithihi.
8 Nga ḓuvha ḽi tevhelaho, ra ya Kesarea, ra swika ra dzula nḓuni ya muevangeli Filipo, ane a vha muṅwe wa vhanna vha sumbe.+
9 Onoyo munna o vha e na vhananyana vhaṋa vha songo vhingwaho,* vhane vha porofita.+
10 Musi ro no fhedza maḓuvha manzhi henefho, ha ḓa muṅwe muporofita ane a pfi Agabo+ ane a bva Yudea.
11 A ḓa a dzhia bannda ḽa Paulo a ḓivhofha milenzhe na zwanḓa, a ri: “Muya mukhethwa u ri, ‘Muṋe wa ḽeneḽi bannda u ḓo vhofhiwa nga yeneyi nḓila nga Vhayuda ngei Yerusalema,+ vha ḓo mu kumedzela zwanḓani zwa vha dzitshaka.’”+
12 Musi ri tshi pfa zwenezwo, riṋe na vhathu vha henefho ra mu humbela uri a songo ya Yerusalema.
13 Paulo a ri: “Ni khou lilela mini ni tshi ita uri ndi khathuwe mbilu? Ndi a ni fhulufhedzisa uri ndo ḓiimisela u farwa na u fa ngei Yerusalema ndi tshi itela dzina ḽa Murena Yesu.”+
14 Musi ri tshi vhona a sa tendi u shandula muhumbulo wawe, ra litsha u mu thivhela,* ra ri: “Kha hu itwe zwine Yehova* a zwi funa.”
15 Nga murahu ha zwenezwo, ra lugiselela u ya Yerusalema.
16 Ra ṱuwa na vhaṅwe vhafunziwa vha bvaho ngei Kesarea, vha ri isa nḓuni ya Minasoni wa Kipiro, ane a vha muṅwe wa vhafunziwa vha u thoma, ra vha vhaeni vhawe.
17 Ri tshi swika Yerusalema, vhahashu vha ri ṱanganedza vho takala.
18 Ra ṱuwa na Paulo nga ḓuvha ḽi tevhelaho, ra ya kha Yakobo,+ vhahulwane vhoṱhe vho vha vhe hone.
19 A vha lumelisa vhoṱhe, a vha vhudza zwoṱhe zwe Mudzimu a zwi itela vha dzitshaka musi a tshi khou huwelela.
20 Musi vho no zwi pfa vha renda Mudzimu, vha amba na Paulo vha ri: “Wahashu, Vhayuda vho tendaho ndi vha zwigidi zwinzhi, vha a fhulufhedzea kha Mulayo.+
21 Fhedzi vho pfa phungo ya uri iwe u khou funza Vhayuda vhoṱhe vhukati ha dzitshaka uri vha songo tevhedza mulayo wa Mushe, nga u vha vhudza uri vha songo fumbisa vhana vhavho kana u tevhedza mikhuvha.+
22 Ri ite mini? Ngauri vha ḓo zwi pfa zwa uri u fhano.
23 Zwino ita zwine ra u vhudza: Ri na vhanna vhaṋa vho itaho muano.
24 Ṱuwa na vhenevha vhanna, u ḓikunakise nga lwa mulayo navho, u vha badelele uri vha vheulwe ṱhoho. Ndi hone vhathu vhoṱhe vha tshi ḓo ḓivha uri phungo ye vha i pfa nga ha iwe a si yone, vha ḓo vhona uri u tevhedza Mulayo.+
25 Ro ṅwalela vhatendi vha bvaho kha dzitshaka nga ha phetho yashu ya uri vha iledze zwithu zwo ṋekedzwaho midzimu ya zwifanyiso,+ malofha,+ u ḽa zwo faho nga u tou tzhipiwa*+ na u ḓifara luvhi nga zwa vhudzekani.”*+
26 Nga ḓuvha ḽi tevhelaho Paulo a ṱuwa na vhenevho vhanna, a ya u ḓikunakisa nga lwa mulayo navho,+ vha ya u ḓivhadza thembeleni ḓuvha ḽine vhuṱambo ha u ḓikunakisa ha ḓo fhela ngaḽo, uri vha kone u ṋekedzelwa tshiṱhavhelo nga ḽeneḽo ḓuvha.
27 Musi maḓuvha e tsini na u fhela, Vhayuda vha bvaho Asia vha mu vhona thembeleni, vha ita uri vhathu vha sinyutshele Paulo, vha mu fara,
28 vha vhidzelela vha ri: “Vhanna vha Isiraele, ri thuseni! Khoyu uḽa munna ane a tshimbila fhethu hoṱhe a tshi funza vhathu vhoṱhe u shandukela vhathu vhahashu, Mulayo na henefha fhethu. Zwiṅwe hafhu, o tshikafhadza fhethu hukhethwa nga u ḓisa Vhagerika thembeleni.”+
29 Ngauri vho mu vhona e na Tirofimo+ wa Efesa henefho muḓini, vha humbula uri Paulo o mu isa thembeleni.
30 Ha vuwa bonyongo henefho muḓini, vhathu vha ḓa vha tshi khou gidima, vha fara Paulo vha mu kokodzela nnḓa ha thembele, vha vala mavothi nga u ṱavhanya.
31 Musi vha tshi ri vha a mu vhulaya, mulangammbi a pfa zwa uri ho vuwa bonyongo muḓini woṱhe wa Yerusalema;
32 nga u ṱavhanya a dzhia maswole na vhahulwane vhao vha gidimela khavho. Vha tshi vhona mulangammbi na maswole, vha litsha u rwa Paulo.
33 Mulangammbi a sendela tsini a fara Paulo, a amba uri a vhofhiwe nga ngeḓane mbili;+ a vhudzisa uri ndi ene nnyi na zwe a tshinya.
34 Fhedzi vhaṅwe vhathu vha vhidzelela vha tshi amba izwi, vhaṅwe vha tshi amba zwiḽa. Ngauri ho vha hu na bonyongo, a kundwa u pfa uri ho tshinyala mini, a amba uri Paulo a iswe gammbani ya maswole.
35 Musi a tshi swika zwiṱepisini, a hwalwa nga maswole ngauri gogo ḽo vha ḽo halifha vhukuma,
36 ḽi tshi khou vha tevhela ḽi tshi khou ṱavha mukosi ḽi tshi ri: “Kha vhulawe!”
37 Musi e tsini na u swika gammbani ya maswole, Paulo a amba na mulangammbi a ri: “Naa ndo tendelwa u amba na iwe?” Ene a ri: “Naa u a kona u amba Tshigerika?
38 Naa a si iwe uḽa Muegipita we a ṱuṱuwedza vhathu uri vha lwe na muvhuso, a ya sogani e na vhavhulayi vha 4 000?”
39 Paulo a ri: “Nṋe ndi Muyuda+ wa Tariso+ ngei Kilikia. Ndi mudzulapo wa muḓi u ḓivheaho. Ndi khou humbela u amba na havha vhathu.”
40 Musi o no mu tendela, Paulo a ima kha zwiṱepisi, a fhumudza vhathu nga tshanḓa. Vho no fhumula, a amba navho nga Tshihevheru,+ a ri:
Ṱhaluso dzi re magumoni a siaṱari
^ Thevhedz., “vha sa athu u itaho zwa vhudzekani.”
^ Thevhedz., “ra fhumula.”
^ Kana “zwo vhulawaho zwa si shululwe malofha; zwidu.”
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
