Mishumo Ya Vhaapostola 22:1-30
22 “Vhahashu na vhokhotsi anga, thetshelesani musi ndi tshi ni ṱalutshedza zwe zwa itea.”+
2 Musi vha tshi pfa a tshi khou amba navho nga Tshihevheru, vha fhumula, Paulo a ri:
3 “Nṋe ndi Muyuda+ o bebelwaho Tariso kha ḽa Kilikia,+ fhedzi ndo funzwa kha wonoyu muḓi nga Gamaliele,+ nda funzwa Mulayo wa vhomakhulukuku+ washu nga vhuḓalo ndi tshi fhisetshela vhurabeli ha Mudzimu u fana na inwi ṋamusi.+
4 Ndo tovhola vho faraho yeneyi Nḓila ya Murena na u ita uri vha vhulawe, nda vhofha vhanna na vhafumakadzi nda vha isa dzhele,+
5 samusi tshifhe muhulu na vhanna vhoṱhe vhahulwane vho kuvhanganaho vha tshi nga ṱanziela zwine nda khou zwi amba. Ndi vhone vho nṋeaho marifhi a uri ndi ye kha vhahashu ngei Damaseko, ndo vha ndi nḓilani ndi tshi khou ya u fara vha re henengei uri ndi vha ḓise Yerusalema vho vhofhiwa uri vha rwiwe.
6 “Musi ndi nḓilani ndi tshi vho swika tsini na Damaseko, ḽi tshi vho ṱoḓa u vha masiari, nga u ṱavhanya nda vhonetshelwa nga lupenyo luhulu lu bvaho ṱaḓulu,+
7 nda wela fhasi nda pfa ipfi ḽi tshi amba na nṋe ḽi tshi ri, ‘Saulo, Saulo, ndi ngani u tshi khou ntovhola?’
8 Nṋe nda ri, ‘Murena, ndi iwe nnyi?’ Ene a ri, ‘Ndi nṋe Yesu wa Nazaretha, ane wa khou mu tovhola.’
9 Vhanna vhe nda vha ndi navho vho vhona tshedza, fhedzi a vho ngo pfa ipfi ḽa we a vha a tshi khou amba na nṋe.
10 Nṋe nda ri: ‘Murena, ndi ite mini?’ Murena a ri: ‘Takuwa u dzhene Damaseko, henefho u ḓo vhudzwa zwoṱhe zwe wa nangelwa uri u zwi ite.’+
11 Samusi ndo vha ndi sa koni u vhona nga nṱhani ha tshedza tsha lupenyo, nda dzhena Damaseko ndo farwa nga tshanḓa nga vhe nda vha ndi navho.
12 “Muṅwe munna ane a pfi Anania a ofhaho Mudzimu na a tevhedzaho Mulayo, a ambiwaho zwavhuḓi nga Vhayuda vhane vha dzula henefho,
13 a ḓa kha nṋe. A ima tsini hanga a ri: ‘Wahashu Saulo, bonyolowa!’ Nda kona u mu vhona nga tshenetsho tshifhinga.+
14 A ri: ‘Mudzimu wa vhomakhulukuku washu o u nanga uri u ḓivhe zwine a zwi funa, u vhone o lugaho+ na u pfa ipfi ḽawe,
15 ngauri o u nanga uri u ambe nga ha zwe wa zwi vhona na zwe a u vhudza.+
16 Zwino u khou lengela mini? Takuwa u lovhedzwe, uri Mudzimu a u hangwele zwivhi+ dzinani ḽa Yesu.’+
17 “Musi ndo no vhuyelela Yerusalema,+ ndi tshi khou rabela thembeleni, nda vhona bono
18 Murena a amba na nṋe a ri: ‘Ṱavhanya u ṱuwe fhano Yerusalema, ngauri a vha nga ṱanganedzi zwine wa ḓo zwi amba nga ha nṋe.’+
19 Nṋe nda ri: ‘Murena, vhathu vha a zwi ḓivha uri ndo vha ndi tshi tshimbila sinagogoni dzoṱhe ndi tshi valela dzhele na u rwa vhane vha u tenda;+
20 musi hu tshi vhulawa Stefano ṱhanzi yau, ndo vha ndo ima henefho ndo takala, ndo linda zwiambaro zwa nga nṱha zwa vhane vha khou mu vhulaya.’+
21 Naho zwo ralo, ene a ri: ‘Tshimbila, ngauri ndi ḓo u ruma kha tshaka dzi re kule.’”+
22 Vha mu thetshelesa u swika a tshi amba zwenezwo. Vha ṱavha mukosi vha ri: “Hoyu munna nga a vhulawe, ngauri ho ngo tewa nga u tshila!”
23 Ngauri vho vha vha tshi khou ṱavha mukosi, vha tshi posa na zwiambaro zwavho zwa nga nṱha, vha tshi hashela mavu nṱha,+
24 mulangammbi a amba uri Paulo a ḓiswe gammbani ya maswole, a amba uri u fanela u rwiwa a tshi vhudziswa uri ndi ngani vhathu vha tshi khou mu ṱavhela mukosi nga yeneyi nḓila.
25 Musi vha tshi khou mu fara uri vha mu rwe, Paulo a amba na muhulwane wa maswole we a vha o ima henefho a ri: “Naa zwo tendelwa uri ni rwe Muroma* a songo vhonwa mulandu?”*+
26 Musi muhulwane wa maswole a tshi pfa zwenezwo, a ya kha mulangammbi a amba nae a ri: “U ḓo ita mini? Hoyu munna ndi Muroma.”
27 Mulangammbi a ya khae a ri: “Mmbudze, naa u Muroma?” Ene a ri: “Ee.”
28 Mulangammbi a ri: “Ndo renga ndugelo ya u vha mudzulapo nga tshelede nnzhi.” Paulo a ri: “Fhedzi nṋe ndo bebwa ndi Muroma.”+
29 Vhanna vha ṱoḓaho u mu sengisa vha mu litsha nga u ṱavhanya; mulangammbi a ofha nge a ṱhogomela uri Paulo ndi Muroma na uri o vha o mu vhofha nga ngeḓane.+
30 Nga ḓuvha ḽi tevhelaho, musi a tshi khou ṱoḓa u ḓivha uri ndi ngani Vhayuda vha tshi khou mu pomoka, a vhofholola ngeḓane yo vhofhaho Paulo, a amba uri vhahulwane vha vhotshifhe na miraḓo yoṱhe ya Sanihedrini* vha kuvhangane. A ḓisa Paulo a mu imisa vhukati havho.+
Ṱhaluso dzi re magumoni a siaṱari
^ Kana “mudzulapo wa Roma.”
^ Kana “a songo sengiswa?”
^ Sanihedrini ndi khothe khulwane ya Vhayuda.
