Mishumo Ya Vhaapostola 26:1-32
26 Agripa+ a amba na Paulo a ri: “U nga ḓiimelela.” Paulo a imisa tshanḓa tshawe a ri:
2 “Khosi Agripa, ṋamusi ndi ḓipfa ndo takala uri ndo ima phanḓa hau uri ndi ḓiimelele kha zwoṱhe zwine nda khou pomokwa zwone nga Vhayuda,+
3 zwihuluhulu ngauri u a ḓivha mikhuvha yoṱhe na phambano dzine dza vha hone vhukati ha Vhayuda. Ndi ngazwo ndi tshi u humbela uri u nthetshelese u sa fheli mbilu.
4 “Vhayuda vhoṱhe vha a ḓivha nḓila ye nda tshila ngayo u bva vhuṱukuni na ngei Yerusalema.+
5 Arali vha tshi funa, vho vha vha tshi nga u vhudza uri ndo vha ndi Mufarisei.+ Nḓila ine Vhafarisei vha rabela ngayo i a konḓa u fhira ya vhaṅwe Vhayuda.+
6 Ndi khou sengiswa nga nṱhani ha zwe Mudzimu a zwi fhulufhedzisa vhomakhulukuku washu;+
7 zwenezwo zwithu zwo fhulufhedziswaho ndi zwe tshaka dza 12 dza vhathu vhashu dza fhulufhela u vhona zwi tshi itea musi dzi tshi itela Mudzimu mushumo mukhethwa vhusiku na masiari. Iwe Thovhela, Vhayuda vha khou mpomoka nga nṱhani ha ḽeneḽi fhulufhelo.+
8 “Ndi ngani ni sa tendi uri Mudzimu u a vusa vhafu?
9 Ndo vha ndi tshi tenda uri ndi fanela u ita zwoṱhe zwine nda nga kona u itela u lwa na dzina ḽa Yesu wa Nazaretha.
10 Ndi zwe nda vha ndi tshi zwi ita Yerusalema, ndi tshi valela vhakhethwa vhanzhi dzhele,+ ngauri ndo vha ndo ṋewa maanḓa nga vhahulwane vha vhotshifhe;+ musi vha tshi vhulawa ndo vha ndi tshi zwi tikedza.
11 Ndo lingedza u vha kombetshedza uri vha landule lutendo, nga u dzula ndi tshi vha pfisa vhuṱungu sinagogoni dzoṱhe; nda vha tevhela na kha miṅwe miḓi ndi tshi vha tovhola ngauri ndo vha ndo vha sinyutshela zwihulu.
12 “Ndo vha ndi tshi khou ya Damaseko ngauri vhahulwane vha vhotshifhe vho ri ndi ye ndi ite zwithu zwi fanaho henefho,
13 Iwe Thovhela, nda vhona lupenyo nga masiari lu bvaho ṱaḓulu lu tshi penya u fhira ḓuvha, lwa vhonetshela nṋe na vhe nda vha ndi tshi khou tshimbila navho.+
14 Roṱhe ra wela fhasi, nda pfa ipfi ḽi tshi amba na nṋe nga Tshihevheru ḽi tshi ri, ‘Saulo, Saulo, ndi ngani u tshi khou ntovhola? U khou ḓivhaisa nga u lwa na o faraho thanda ya u khada i re na ṱhodzi ya tsimbi.’*
15 Fhedzi nṋe nda ri: ‘Murena, ndi iwe nnyi?’ Murena a ri: ‘Ndi nṋe Yesu, ane wa khou mu tovhola.
16 Takuwa u ime. Ndi ngazwo ndo ḓivhonadza kha iwe, uri ndi u nange uri u vhe mushumeli wanga na ṱhanzi ya zwithu zwe wa zwi vhona na zwine nda ḓo u sumbedza.+
17 Ndi ḓo u tshidza kha havha vhathu na kha tshaka dzine nda ḓo u ruma khadzo+
18 uri u vha bonyolose maṱo,+ u vha bvise swiswini+ u vha ise tshedzani+ na u ita uri vha si tsha langiwa nga Saṱhane+ fhedzi vha langiwe nga Mudzimu, a vha hangwele zwivhi+ zwavho vha kone u ḽa ifa na vho khethwaho, nga u vha ntenda.’
19 “Khosi Agripa, ndo thetshelesa zwe nda vhudzwa kha bono,
20 ndi ngazwo ndo ya nda ḓivhadza mulaedza wa uri vha fanela u rembuluwa vha gwadamele Mudzimu na u ita zwithu zwine zwa sumbedza uri vho rembuluwa.+ Ndo thoma u ḓivhadza kha vhadzulapo vha Damaseko,+ nga murahu nda ya kha vha Yerusalema,+ na vha shangoni ḽoṱhe ḽa Yudea na kha vhathu vha dziṅwe tshaka.
21 Ndi ngazwo Vhayuda vho mpfara thembeleni, vha lingedza na u mmbulaya.+
22 Ndi kha ḓi huwelela na ṋamusi kha vhahulwane na vhaṱuku, ngauri Mudzimu o nthusa; fhedzi ndi amba zwe Vhaporofita na Mushe vha amba uri zwi ḓo itea.+ Vho amba uri
23 Kristo u ḓo tambudzwa,+ a vha wa u thoma u vuswa vhafuni,+ na uri u ḓo huwelela na u vhonetshela kha vhenevha vhathu na kha dzitshaka.”+
24 Musi Paulo a tshi kha ḓi ḓiimelela, Festo a vhidzelela a ri: “Paulo, u khou penga! U khou pengiswa nga nḓivho yau khulu!”
25 Fhedzi Paulo a ri: “Thovhela Festo, a thi pengi, zwine nda khou zwi amba ndi ngoho nahone zwi a pfala.
26 Khosi i a ḓivha enea mafhungo ndi ngazwo ndi tshi kona u amba nayo ndi sa ofhi; ndi a tenda uri i a zwi ḓivha ngauri a zwo ngo itwa tshiphirini.+
27 Khosi Agripa, naa u a tenda zwo ambiwaho nga Vhaporofita? Ndi a ḓivha uri u a zwi tenda.”
28 Fhedzi Agripa a ri: “Hu si kale u ḓo vhuya wa ita uri ndi vhe Mukriste.”
29 Paulo a ri: “Ndi tama uri hu si kale kana nga murahu ha tshifhinga tshilapfu, Mudzimu a ite uri iwe na vhoṱhe vhane vha khou nthetshelesa ṋamusi ni vhe Vhakriste u fana na nṋe, fhedzi a thi ṱoḓi ni tshi vhofhiwa nga ngeḓane.”
30 Khosi ya takuwa na muvhusi na Berenike na vhanna vho dzulaho navho.
31 Fhedzi musi vha tshi khou ṱuwa, vha amba nga tshavho vha ri: “Hoyu munna ho ngo ita tshithu tshine tsha nga ita uri a vhulawe kana u iswa dzhele.”+
32 Agripa a amba na Festo a ri: “O vha a tshi ḓo vha o vhofhololwa arali a songo amba uri mulandu wawe u fhiriselwe kha Kesare.”+
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
