Mishumo Ya Vhaapostola 27:1-44
27 Samusi ho vha ho no itwa phetho ya uri ri ye Italia nga tshikepe,+ vha dzhia Paulo na vhaṅwe vho fariwaho vha vha kumedzela kha Yulio, ane a vha muhulwane wa maswole a tshigwada tshi vhidzwaho Augusto.
2 Ra ṋamela tshikepe tshi bvaho Adaramite tshe tsha vha tshi tshi ḓo fhira nga vhuimazwikepe ha vunduni ḽa Asia, ro vha ri na Aristariko+ wa Makedonia a bvaho Thesalonika.
3 Nga ḓuvha ḽi tevhelaho ra swika Sidoni, Yulio a sumbedza Paulo vhuthu nga u mu tendela a tshi ya kha khonani dzawe uri dzi mu ṱhogomele.
4 Ra ṱuwa henefho nga tshikepe, ra fhira tsini na Kipiro he ra vha ro khuda kha maḓumbu e ra vha ro sedzana nao.
5 Ra pfuka nga Kilikia na Pamfilia, ra swika vhuimazwikepe ha Mira ngei Likia.
6 Henefho muhulwane wa maswole a wana tshikepe tshi bvaho Alekzandria tshe tsha vha tshi tshi khou ya Italia, a ri dzhenisa khatsho.
7 Musi ro no fhedza maḓuvha manzhi ri tshi khou tshimbila nga zwiṱuku ngauri zwo vha zwi songo leluwa, ra swika Kinido. Ngauri ḓumbu ḽo vha ḽi tshi khou ri thivhela, ra bva nga thungo ya Kereta ngei Salamone he ra khuda kha maḓumbu.
8 Ra tshimbila henefho nga tshikepe zwi tshi khou konḓa, ra swika fhethu hune ha pfi Vhuimazwikepe ho Khudaho, tsini na muḓi wa Lasea.
9 Ro vha ro no fhedza maḓuvha manzhi, hu si tsha tshimbilea nga tshikepe, na ḓuvha ḽa u ḓidzima* zwiḽiwa+ ḽo vha ḽo no fhira, ngauralo Paulo a vha eletshedza,
10 a ri: “Vhanna vhahashu, ndi vhona u nga arali ra bvela phanḓa na lwendo tshikepe tshi ḓo ṋupela, ra xelelwa nga thundu, na riṋe ri nga fa.”
11 Naho zwo ralo, muhulwane wa maswole a thetshelesa mutshimbidzi wa tshikepe na muṋe watsho nṱhani ha u thetshelesa Paulo.
12 Samusi honoho vhuimazwikepe ho vha hu si fhethu havhuḓi vhuria, vhathu vhanzhi vha tendelana u ṱuwa henefho vha tshi fhulufhela uri vha ḓo fhedza vhuria Fenike, hune ha vha vhuimazwikepe ha Kereta ho lavhelesaho vhubvaḓuvha.
13 Musi muya u bvaho tshipembe u tshi vhudzula zwavhuḓi, vha vhona u nga vha ḓo swika hune vha khou ya hone, vha ṱomola thikho vha tshimbila tsini na khunzi-khunzi ya lwanzhe vho livhana na Kereta.
14 Nga murahunyana ha vuwa ḓumbu ḽihulu ḽine ḽa pfi Yurokwilo.*
15 Samusi tshikepe tsho vha tshi tshi khou vhudzulwa, zwi tshi khou konḓa u sedzana na ḓumbu, ra tshi litsha tshi tshi vhudzulwa nga ḓumbu.
16 Ra khuda tshiṱangadzimeni tshine tsha pfi Klauda, fhedzi zwo vha zwi songo leluwa u langa tshikepe tshiṱuku tshe tsha vha tshi tshi khou kokodzwa.
17 Musi vho no kokodzela tshikepe tshiṱuku nga ngomu vha tshi vhofha nga thambo, vha tshi ofha uri vha ḓo phirimela muṱavhani wa Siriti,* vha tsitsa maseila, vha litsha tshikepe tshi tshi vhudzulwa nga ḓumbu.
18 Nga nṱhani ha uri ro vha ri tshi khou vhudzulwa nga ḓumbu ḽihulu, nga ḓuvha ḽi tevhelaho vha fhungudza muhwalo tshikepeni.
19 Nga ḓuvha ḽa vhuraru, vha laṱela lwanzheni zwithu zwi shumiswaho henefho tshikepeni.
20 Musi ho no fhela maḓuvha manzhi ri sa vhoni ḓuvha kana ṋaledzi, ri tshi khou vhudzulwa nga ḓumbu ḽihulu, ra si tsha vha na fhulufhelo ḽa uri ri ḓo tshila.
21 Vho no fhedza tshifhinga tshilapfu vha sa ḽi, Paulo a ima vhukati havho a ri: “Vhanna vhahashu, ngavhe ni nthetshelese, ri si ṱuwe ngei Kereta ro vha ri tshi ḓo vha ri songo ṱangana na heyi khombo.+
22 Naho zwo ralo, ni songo vhilaela, ngauri a hu na ane a ḓo lovha, hu ḓo kwashea tshikepe fhedzi.
23 Ngauri Mudzimu ane nda mu itela mushumo mukhethwa o ruma muruṅwa+ madekwe,
24 a ri: ‘Paulo u songo ofha. Ngauri u ḓo ima phanḓa ha Kesare.+ Mudzimu u ḓo u tshidza na vhoṱhe vhane wa vha navho.’
25 Vhanna vhahashu ni songo ofha, ngauri ndi tenda uri Mudzimu u ḓo ita zwe a amba.
26 Naho zwo ralo, tshikepe tshi ḓo kwashea kha tshiṅwe tshiṱangadzime.”+
27 Musi ro no fhedza maḓuvha a 14 ri tshi khou vhudzulwa nga ḓumbu Lwanzheni lwa Adria, vhukati ha vhusiku vhashumi vha tshikepeni vha pfa u nga ri khou sendela tsini na khunzi-khunzi.
28 Vha kala vha wana ho tsa nga mithara dzi ṱoḓaho u vha 36,* vha dovha vha tshimbila tshikhalanyana, vha kala vha wana ho tsa nga mithara dzi ṱoḓaho u vha 27.*
29 Vha tsitsa thikho nṋa dze dza vha dzi murahu tshikepeni, ngauri vho vha vha tshi ofha uri tshikepe tshi ḓo kuḓana na matombo, vha lindela ḽi tshi tsha.
30 Musi vhashumi vha tshikepeni vha tshi lingedza u shavha tshikepeni nga u tsitsa tshikepe tshiṱuku vha tshi ḓiita u nga vha khou ṱoḓa u tsitsa thikho nga phanḓa ha tshikepe,
31 Paulo a amba na muhulwane wa maswole na maswole a ri: “Arali havha vhanna vha bva tshikepeni, ni nga si tshile.”+
32 Maswole a ṱhukhula thambo dze dza vha dzo vhofha tshikepe tshiṱuku, vha tshi litsha tsha kumbiwa.
33 Musi ḽi tshi vho tsha, Paulo a ṱuṱuwedza vhoṱhe uri vha ḽe, a ri: “Ho no fhela maḓuvha a 14 no lindela ni sa ḽi tshithu.
34 Ndi ni ṱuṱuwedza uri ni ḽe uri ni tshile, ngauri a hu na ane a ḓo huvhala.”
35 Musi o no amba zwenezwo, a dzhia vhurotho a livhuwa Mudzimu vha tshi zwi vhona vhoṱhe, a vhu ṅwata a ḽa.
36 Vhoṱhe vha litsha u vhilaela, vha dzhia zwiḽiwa vha ḽa.
37 Ro vha ri* 276 tshikepeni.
38 Musi vho no fura, vha fhungudza mihwalo i re tshikepeni nga u posa goroi lwanzheni.+
39 Musi ḽo no tsha, vha si ḓivhe shango ḽe vha vha vhe khaḽo,+ vha vhona khunzi-khunzi, vha ḓiimisela u imisa tshikepe khunzi-khunzini arali zwi tshi konadzea.
40 Vha ṱhukhula thambo dza thikho, dza wela lwanzheni, vha vhofholola na thanda dza u tshimbidza tshikepe; vha ṱharamudza maseila uri muya u vha swikise khunzi-khunzini.
41 Musi vha tshi khou fhira tsini na philiphili ya muṱavha, tshikepe tsha phirimela nga phanḓa hatsho, tshi si tsha kona u ya phanḓa, fhedzi tsha kwashiwa nga murahu nga magabelo.+
42 Maswole a tshi vhona zwenezwo, a langana u vhulaya vho farwaho, uri vha si bambele vha shavha.
43 Fhedzi muhulwane wa maswole o vha a tshi ṱoḓa u tsireledza Paulo, a amba nao uri a si ite zwe a langana. Muhulwane wa maswole a vhudza vhane vha kona u bambela uri vha fhufhele lwanzheni vha vhe vha u thoma u swika khunzi-khunzini,
44 vhaṅwe vha tevhele nga murahu vho farelela mabulannga kana zwipiḓa zwa tshikepe. Vhoṱhe vha swika khunzi-khunzini vho tsireledzea.+
Ṱhaluso dzi re magumoni a siaṱari
^ Ndi nga ṅwedzi wa Tishiri, une kha khalenda yashu wa vha ṅwedzi wa September kana October.
^ Ḓumbu ḽi bvaho devhula-vhubvaḓuvha.
^ Sedzani Mutevhe Wa Ṱhalutshedzo Ya Maipfi.
^ Ndi fathomo dza 20. Sedzani Ṱhume. B14.
^ Ndi fathomo dza 15. Sedzani Ṱhume. B14.
