Nehemia 1:1-11
1 Mafhungo a Nehemia*+ murwa wa Hakalaya ngea: Nga ṅwedzi wa Kisileve,* nga ṅwaha wa vhu 20, ndo vha ndi pfamoni* ya ngei Shushani.*+
2 Nga tshenetsho tshifhinga Henani,+ muṅwe wa vhahashu a swika e na vhaṅwe vhanna vha bvaho Yuda, nda vha vhudzisa nga ha vhaṅwe Vhayuda vhe vha vhuya vhuthubwani+ na nga ha Yerusalema.
3 Vha fhindula vha ri: “Vhe vha sala henengei vunduni,* vhe vha ponyoka vhuthubwani vha kha vhuimo vhu si havhuḓi na vhu shonisaho.+ Mbondo dza Yerusalema dzo wiswa+ na khoro dzawo dzo fhiswa nga mulilo.”+
4 Musi ndi tshi tou pfa eneo mafhungo, nda dzula fhasi nda thoma u lila, nda ṱungufhala maḓuvha manzhi, nda ḓidzima zwiḽiwa+ nda rabela phanḓa ha Mudzimu wa ṱaḓulu.
5 Nda ri: “Iwe Yehova Mudzimu wa ṱaḓulu, Mudzimu muhulwane na a ofhisaho ane a sa pfuke mulanga wawe, ane a sumbedza lufuno lu sa shanduki vhane vha mu funa na u tevhedza milayo yawe,+
6 ndi humbela uri nḓevhe dzau dzi thetshelese, maṱo au a lavhelese uri u thetshelese thabelo ya mushumeli wau ine nda khou i rabela ṋamusi, masiari na vhusiku,+ nga ha Vhaisiraele vhashumeli vhau, musi ndi tshi khou bula zwivhi zwe vhathu vha Isiraele vha u khakhela ngazwo. Ro tshinya, nṋe khathihi na vha nnḓu ya khotsi anga.+
7 Ro u khakhela+ nga u sa tevhedza ndaela, maitele na mahaṱulele zwe wa zwi ṋea Mushe mushumeli wau.+
8 “Ndi khou humbela uri u humbule zwe wa laya Mushe mushumeli wau wa ri: ‘Arali na sa fhulufhedzea ndi ḓo ni balanganyela kha dzitshaka.+
9 Fhedzi arali na vhuyelela kha nṋe na tevhedza ndaela dzanga na u dzi thetshelesa, ndi ḓo ni kuvhanganya+ ni henefho nda ni ḓisa fhethu he nda hu nanga uri dzina ḽanga ḽi dzule hone naho no balangana u swika magumoni a ḽiṱaḓulu.’+
10 Vhenevho ndi vhashumeli vhau, ndi vhathu vhau, vhe wa vha rengulula nga maanḓa au mahulu na nga tshanḓa tshau tsha maanḓa.+
11 Iwe Yehova, nḓevhe dzau nga dzi thetshelese thabelo dza mushumeli wau na thabelo dza vhashumeli vhau vhane vha takalela u ofha dzina ḽau, ndi khou humbela uri u ite uri mushumeli wau zwi mu tshimbilele zwavhuḓi ṋamusi, ngavhe onoyu munna a tshi mpfela vhuṱungu.”+
Misini yeneyo ndo vha ndi mufari wa tshinwelo tsha khosi.+
Ṱhaluso dzi re magumoni a siaṱari
^ Zwine zwa amba uri “Yehova U A Khuthadza.”
^ Sedzani Ṱhume. B15.
^ Kana “fhethu ha dzhavhelo.”
^ Kana “Susa.”
^ Kana “tshiṱirikini tshi re na maanḓa.”