Nehemia 13:1-31
13 Nga ḽeneḽo ḓuvha ho vhalwa bugu ya Mushe vhathu vho thetshelesa,+ ha waniwa ho ṅwaliwa uri hu songo vha na Muamoni kana Mumoaba+ ane a dzhena tshivhidzoni tsha Mudzimu wa ngoho,+
2 ngauri vho dzima Vhaisiraele vhurotho na maḓi, nṱhani hazwo vha thola Bileamu uri a vha seme.+ Naho zwo ralo, Mudzimu washu o shandula honoho u semiwa ha vha phaṱhutshedzo.+
3 Musi vha tshi tou pfa wonoyo Mulayo, Vhaisiraele vha ḓikhetha kha vhatsinda vhoṱhe.+
4 Nga phanḓa ha zwenezwo, tshifhe we a vha a tshi ṱhogomela kamara dza u vhulungela zwithu* zwa nḓuni* ya Mudzimu washu+ o vha e Eliasibi+ shaka ḽa Tobiya.+
5 O vha o mu ṋea kamara khulu ya u vhulungela zwithu,* ye ya vha i tshi shumiselwa u vhea tshifhiwa tsha thoro, zwioro zwitshena, thundu dza denndeni na tshafumi tsha thoro, waini ntswa, mapfura,+ zwe zwa vha zwi tshi tea u waniwa nga Vhalevi,+ vhaimbi, vhalindakhoro na miṋeelo ya vhotshifhe.+
6 Nga tshenetsho tshifhinga, nṋe ndo vha ndi si Yerusalema, ngauri ndo ya ha khosi nga ṅwaha wa vhu 32+ wa Khosi Arithasasitha+ wa Babele; nga murahunyana nda humbela khosi uri i ntendele ndi ṱuwe.
7 Nda swika Yerusalema nda ṱhogomela zwithu zwivhi zwe Eliasibi+ a zwi ita a tshi itela Tobiya,+ nga u mu ṋea kamara ya u vhulungela zwithu muṱani wa nnḓu ya Mudzimu wa ngoho.
8 Zwenezwo zwo ntsinyusa nga maanḓa, nda dzhia thundu yoṱhe ya nḓuni ya Tobiya ye ya vha i kamarani ya u vhulungela zwithu* nda i laṱela nnḓa.
9 Nga murahu nda ṋea ndaela ya uri hu kunakiswe kamara dza u vhulungela zwithu;* nda vhuyedzedza zwishumiswa zwa nnḓu ya Mudzimu wa ngoho,+ na tshifhiwa tsha thoro na zwioro zwitshena.+
10 Nda dovha nda wana uri Vhalevi+ vho vha vha sa ṋewi mikovhe yavho,+ na uri Vhalevi na vhaimbi vhane vha shuma henefho vho ṱuwa vha ya masimuni avho.+
11 Nda kaidza vhathusi vha vhavhusi+ nda ri: “Ndi ngani nnḓu ya Mudzimu yo litshelelwa?”+ Nda vha kuvhanganya nda vha humisela mishumoni yavho.
12 Vhayuda vhoṱhe vha bvisa tshafumi+ tsha thoro, tsha waini ntswa na tsha mapfura kamarani dza u vhulungela zwithu.+
13 Nda vhea tshifhe Shelemia, Tsadoko ane a vha mukopololi* na Pedaya muṅwe wa Vhalevi uri vha lange kamara dza u vhulungela zwithu, Hanani murwa wa Sakure murwa wa Mathanya o vha e muthusi wavho, ngauri vho vha vha tshi dzhiiwa sa vhanna vha fhulufhedzeaho. Vho vha vhe vhone vha re na vhuḓifhinduleli ha u ṋea vhahavho mikovhe.
14 Iwe Mudzimu wanga,+ nkhumbule kha zwenezwi, u songo hangwa zwe nda ita ndi tshi sumbedza lufuno lu sa shanduki ndi tshi itela nnḓu ya Mudzimu wanga na mishumo ye nda ita henefho.*+
15 Misini yeneyo nda vhona vhathu vha Yuda vha tshi khou suka nḓirivhe nga Savhatha,+ vha tshi khou ḓisa thoro nnzhi vho dzi hwala nga donngi, vha tshi khou ḓisa waini, nḓirivhe, mahuyu na mihwalo ya mifuda yoṱhe, vha zwi ḓisa Yerusalema nga ḓuvha ḽa Savhatha.+ Nṋe nda vha kaidza uri vha songo rengisa zwenezwo zwithu nga ḽeneḽo ḓuvha.*
16 Vhatiro vhane vha dzula henefho muḓini vho vha vha tshi ḓisa khovhe na zwithu zwa mifuda yoṱhe, vha tshi zwi rengisela vhathu vha Yuda ngei Yerusalema nga Savhatha.+
17 Nda kaidza vharangaphanḓa vha Yuda nda ri: “Ndi vhuvhi-ḓe vhune na ita ni tshi tshinya ḓuvha ḽa Savhatha?
18 Naa a si zwe vhomakhulukuku waṋu vha zwi ita, Mudzimu washu a ḓisa khombo kha riṋe na kha uno muḓi? Ni khou ṋaṋisa mbiti dzine dza ḓo ḓela Isiraele nga u tshinya Savhatha.”+
19 Nda laedza uri khoro dza Yerusalema dzi valwe ḽi sa athu u kovhela, Savhatha i sa athu u thoma. Nda dovha nda vha vhudza uri vha songo dzi vula Savhatha i sa athu u fhela, nda vhea vhaṅwe vhaḓinḓa vhanga khoroni uri hu si vhe na mihwalo ine ya dzheniswa nga ḓuvha ḽa Savhatha.
20 Vhavhambadzi na vharengisi vha thundu dza mifuda yoṱhe vho eḓela nnḓa ha muḓi wa Yerusalema luthihi kana luvhili.
21 Nda vha kaidza nda ri: “Ndi ngani ni tshi eḓela nnḓa ha luvhondo? Arali na dovha na zwi ita, ndi ḓo ni pandela.” U bva nga tshenetsho tshifhinga vha si tsha ḓa nga Savhatha.
22 Nda vhudza Vhalevi uri vha ḓikunakise tshifhinga tshoṱhe uri vha ḓe vha linde khoro uri ḓuvha ḽa Savhatha ḽi vhe ḽikhethwa.+ Iwe Mudzimu wanga, nkhumbule kha zwenezwi, u mpfele vhuṱungu u ya nga lufuno lwau luhulu lu sa shanduki.+
23 Misini yeneyo nda wana uri Vhayuda vho vhinga* vhafumakadzi+ vha Vhaasidodo,+ vha Vhaamoni na vha Vhamoaba.+
24 Hafu kha vharwa vhavho vha tshi amba luambo lwa Vhaasidodo na iṅwe hafu i tshi amba luambo lwa vhaṅwe vhathu, fhedzi hu si na a konaho u amba luambo lwa Vhayuda.
25 Nda vha kaidza, nda vha sema, nda rwa vhaṅwe vha vhanna+ vhavho, nda vha kokodza mavhudzi, nda vha anisa nga Mudzimu nda ri: “Vhananyana vhaṋu vha songo vhingwa nga vharwa vhavho na vhananyana vhavho vha songo vhingwa nga vharwa vhaṋu kana nga vhoinwi.+
26 Naa zwenezwo a si zwone zwe zwa ita uri Khosi Salomo wa Isiraele a ite tshivhi? Ho vha hu si na khosi kha tshaka nnzhi ine ya fana nae;+ o vha a tshi funwa nga Mudzimu wawe,+ lwe Mudzimu a mu vhea uri a vhe khosi kha ḽoṱhe ḽa Isiraele. Fhedzi vhafumakadzi vha vhatsinda vho ita uri a ite tshivhi.+
27 Zwi a mangadza uri ni khou ita vhuvhi vhuhulu nga u sa fhulufhedzea kha Mudzimu washu nga u vhinga vhafumakadzi vha vhatsinda.”+
28 Muṅwe wa vharwa vha Yoyada+ murwa wa tshifhe muhulu Eliasibi,+ a vha mukwasha wa Sanebalati+ wa Muhoroni. Nda mu pandela.
29 Iwe Mudzimu wanga, u vha humbule, ngauri vho tshikafhadza vhutshifhe+ na mulanga wa vhutshifhe na Vhalevi.+
30 Nda vha kunakisa kha tshika dzoṱhe dza vhatsinda, nda ṋea mushumo vhotshifhe na Vhalevi, muṅwe na muṅwe nda mu ṋea mushumo wawe,+
31 nda dzudzanya uri hu iswe khuni+ na zwiranzhe nga zwifhinga zwo vhewaho.
Iwe Mudzimu wanga, nkhumbule nga vhuthu.*+
Ṱhaluso dzi re magumoni a siaṱari
^ Kana “holo dza u ḽela.”
^ Kana “thembeleni.”
^ Kana “holo ya u ḽela.”
^ Kana “holoni ya u ḽela.”
^ Kana “holo dza u ḽela.”
^ Kana “wa maṅwalo.”
^ Kana “na u i linda.”
^ Kana khamusi, “nda vha kaidza nga ḽeneḽo ḓuvha uri vha songo rengisa zwenezwo zwithu.”
^ Kana “vho dzhenisa nḓuni dzavho.”
^ Kana “zwivhuya.”
