Nehemia 9:1-38
9 Vhaisiraele vha kuvhangana nga ḓuvha ḽa vhu 24 ḽa wonoyo ṅwedzi; vha ḓidzima zwiḽiwa vho ambara madzanganda, vha ḓishela mavu.+
2 Vha mutevhe wa lushaka lwa Vhaisiraele vha ḓikhetha kha vhatsinda vhoṱhe,+ vha ima vha ḓibula zwivhi zwavho na vhukhakhi ha vhokhotsi avho.+
3 Vha ima fhethu havho vha vhalela nṱha bugu ya Mulayo+ wa Yehova Mudzimu wavho vha fhedza awara tharu; dziṅwe awara tharu vha dzi fhedza vha tshi khou ḓibula zwivhi na u gwadamela Yehova Mudzimu wavho.
4 Yeshua, Bani, Kadamiele, Shebanya, Buni, Sherebia,+ Bani na Khenani vha ima kha pulatifomo+ ya Vhalevi, vha vhidzelela Yehova Mudzimu wavho nga ipfi ḽihulu.
5 Yeshua, Kadamiele, Bani, Hasabanea, Sherebia, Hodiya, Shebanya na Phethaya vha Vhalevi vha ri: “Takuwani ni rende Yehova Mudzimu waṋu u ya nga hu sa fheli.*+ Nga hu rendwe dzina ḽawe ḽa vhugala, ḽine ḽa fhira thendo na zwikhoḓo.
6 “Ndi iwe Yehova u woṱhe;+ wo sika maṱaḓulu, ḽiṱaḓulu ḽa maṱaḓulu na mavhuthu aḽo oṱhe, ḽifhasi na zwoṱhe zwi re khaḽo, lwanzhe na zwoṱhe zwi re khalwo. Zwoṱhe zwi tshila nga iwe, mavhuthu a ṱaḓulu a khou gwadamela iwe.
7 Ndi iwe Yehova Mudzimu wa ngoho, we wa nanga Abramu+ wa mu bvisa kha ḽa Uri+ ḽa Vhakaladea, wa mu ira dzina ḽa Abrahamu.+
8 Wo vhona mbilu yawe i tshi fhulufhedzea,+ wa vhofha mulanga nae uri u mu ṋee shango ḽa Vhakanana, Vhahethe, Vhaamori, Vhapheresi, Vhayebusi na Vhagirigasi, uri u ḽi ṋee vhana* vhawe;+ wo ita zwe wa fhulufhedzisa, ngauri wo luga.
9 “Wo vhona u tambula ha vhomakhulukuku washu ngei Egipita,+ wo pfa tshililo tshavho Lwanzheni Lutswuku.
10 Wo ita zwiga na vhuṱolo kha Farao na vhashumeli vhawe vhoṱhe na kha vhathu vhoṱhe vha shango ḽawe,+ nge wa vha u tshi ḓivha uri vho ḓihudza+ khavho. Wo ḓiitela dzina ḽine ḽa kha ḓi vha hone na ṋamusi.+
11 Wo fhandekanya lwanzhe phanḓa havho, vha wela lwanzhe vha tshi kanda shango ḽo omaho,+ vhane vha khou vha pandamedza wa vha posa tivhani sa tombo ḽi tshi poswa maḓini a sa langei.+
12 Wo vha ranga phanḓa nga gole, vhusiku wo vha ranga phanḓa nga mulilo, uri u vhonetshele nḓila ine vha fanela u tshimbila khayo.+
13 Wo tsela Thavhani ya Sinai+ wa amba navho u ṱaḓulu,+ wa vha ṋea khaṱhulo dzo lugaho, milayo ya ngoho,* maitele avhuḓi na dzindaela.+
14 Wo vha ḓivhadza Savhatha yau khethwa,+ wo vha ṋea dzindaela, maitele na mulayo u tshi shumisa Mushe mushumeli wau.
15 Musi vhe na nḓala+ wo vha ṋea vhurotho vhu bvaho ṱaḓulu, musi vhe na ḓora+ wo vha ṋea maḓi a bvaho kha tombo ḽihulu, wa vha vhudza uri vha dzhene vha dzhie shango ḽe wa ana uri u ḓo vha ṋea ḽone.
16 “Fhedzi vhomakhulukuku washu vha ḓihudza+ vha vha na swili,*+ vha si thetshelese ndaela dzau.
17 A vho ngo thetshelesa,+ a vho ngo humbula mishumo yau i mangadzaho ye wa vha itela yone, fhedzi vho vha na swili* vha nanga murangaphanḓa uri vha humele vhupulini havho ngei Egipita.+ Fhedzi iwe u Mudzimu o ḓiimiselaho u hangwela, u pfela vhuṱungu* na u khathutshela, a sa ṱavhanyi u sinyuwa, wa lufuno luhulu lu sa shanduki,+ a wo ngo vha laṱa.+
18 Na musi vha tshi ḓiitela tshifanyiso tsha tsimbi tsha ṋamana vha ri: ‘Hoyu ndi Mudzimu wau we a u bvisa Egipita,’+ vha ita mishumo mihulu ya u u nyadza,
19 iwe a wo ngo vha laṱa masogani,+ nge wa vha khathutshela zwihulu. Gole ḽo vha ḽi tshi dzula ḽi nṱha havho nga masiari u itela u vha ranga phanḓa nḓilani, vhusiku wo vha ranga phanḓa nga mulilo, uri u vhonetshele nḓila ine vha fanela u tshimbila khayo.+
20 Wo vha ṋea muya wau wavhuḓi uri vha vhe na vhuṱali,+ u si vha dzime mana yau,+ wa vha ṋea maḓi musi vhe na ḓora.+
21 Wo vha ṋea zwiḽiwa ngei sogani lwa miṅwaha ya 40.+ A vho ngo shaya tshithu. Zwiambaro zwavho a zwo ngo ṱahala,+ na milenzhe yavho a yo ngo zwimba.
22 “Wo vha ṋea mivhuso na dzitshaka, wo vha kovhela mashango avho,+ vha dzhia shango ḽa Sihoni,+ ḽine ḽa vha shango ḽa khosi ya Hesiboni,+ khathihi na shango ḽa Ogo+ khosi ya Bashani.
23 Wa andisa vharwa vhavho sa ṋaledzi dza ṱaḓulu.+ Wa vha isa shangoni ḽe wa fhulufhedzisa vhomakhulukuku wavho uri vha ḓo dzhena khaḽo ḽa vha ḽavho.+
24 Vharwa vhavho vha dzhena vha dzhia ḽeneḽo shango,+ iwe wa kunda Vhakanana phanḓa havho,+ vhe vha vha vhe vhadzulapo vha maṅwe mashango, wa kumedzela mahosi na vhathu vha ḽeneḽo shango zwanḓani zwavho, uri vha vha ite zwine vha funa.
25 Vho thuba miḓi yo tsireledzwaho nga mbondo+ na shango ḽo nonaho,*+ vha dzhia nnḓu dzo ḓalaho zwithu zwavhuḓi zwa mifuda yoṱhe, zwisima zwo bwiwaho, masimu a minḓirivhe, masimu a miṱwari+ na miri minzhi ya mitshelo. Vha ḽa vha fura vha khwaṱha, vha takalela vhuthu hau vhuhulu.
26 “Naho zwo ralo, vha si u thetshelese vha u shandukela,+ vha furalela Mulayo wau. Vha vhulaya vhaporofita vhau vhe vha vha sevha uri vha humele ha iwe, vha ita mishumo mihulu ya u u nyadza.+
27 Nga nṱhani ha zwenezwo wa vha kumedzela zwanḓani zwa maswina avho,+ e a bvela phanḓa a tshi vha tsikeledza.+ Fhedzi vho vha vha tshi u vhidzelela musi vho tsikeledzea, wa vha pfa u ngei ṱaḓulu; nge wa vha khathutshela zwihulu, wa vha ṋea vhalamuleli uri vha vha tshidze zwanḓani zwa maswina avho.+
28 “Musi vha tshi tou vhofholowa, vha dovha vha ita vhuvhi phanḓa hau,+ wa vha kumedzela zwanḓani zwa maswina avho, e a vha a tshi ḓo vha vhusa.*+ Vho vha vha tshi humela kha iwe uri u vha thuse,+ wo vha u tshi vha pfa u ṱaḓulu wa vha lamulela tshifhinga tshoṱhe nge wa vha khathutshela zwihulu.+
29 Naho wo vha u tshi vha sevha uri vha dovhe vha tevhedze Mulayo wau, vha ḓihudza vha si thetshelese ndaela dzau;+ vha si tevhedze maitele au ane a tshidza muthu arali a a tevhela.+ Vha u furalela nga nṱhani ha tshipimbi tshavho na tshikhuna tshavho, vha si thetshelese.
30 Wa bvela phanḓa u sa vha fheleli mbilu+ lwa miṅwaha minzhi na u bvela phanḓa u tshi vha sevha nga muya wau u tshi shumisa vhaporofita vhau, fhedzi vha si thetshelese. Mafheleloni wa vha kumedzela zwanḓani zwa vhathu vha maṅwe mashango.+
31 Nge wa vha khathutshela zwihulu, a wo ngo vha fhelisa+ kana u vha ṱutshela, ngauri u Mudzimu ane a pfela vhuṱungu* na u khathutshela.+
32 “Zwino Iwe Mudzimu washu, Mudzimu muhulu, wa maanḓa na a mangadzaho, we a sa pfuke mulanga wawe na u sumbedza lufuno lu sa shanduki,+ u songo nyadza vhuṱungu he ra vhu pfa, mahosi ashu, vhakololo vhashu,+ vhotshifhe vhashu,+ vhaporofita vhashu,+ vhomakhulukuku washu na vhathu vhau vhoṱhe u bva misini ya mahosi a Asuri+ u swika zwino.
33 Wo sumbedza u luga kha zwoṱhe zwe zwa ri wela, wo fhulufhedzea; fhedzi ndi riṋe vhe ra ita vhuvhi.+
34 Ngeno mahosi ashu, vhakololo vhashu, vhotshifhe vhashu na vhomakhulukuku washu, vha songo tevhedza Mulayo wau kana u thetshelesa ndaela dzau kana khumbudzo dze wa vha sevha ngadzo.
35 Na musi vhe muvhusoni wavho vha tshi khou ḓiphiṋa nga zwivhuya zwinzhi zwe wa vha ṋea zwone vhe shangoni ḽo aṱamaho na ḽo nonaho ḽe wa vha ṋea ḽone, a vho ngo u shumela,+ a vho ngo litsha mishumo yavho mivhi.
36 Ṋamusi ri dziphuli+ shangoni ḽe wa ṋea vhomakhulukuku washu uri vha ḽe mitshelo yaḽo na zwithu zwaḽo zwavhuḓi.
37 Zwibveledzwa zwaḽo zwinzhi ndi zwa mahosi e wa a vhea uri a ri vhuse nga nṱhani ha zwivhi zwashu.+ A vhusa mivhili yashu na zwifuwo zwashu nga nḓila ine a funa ngayo, ro tsikeledzea nga maanḓa.
38 “Kha zwenezwi zwoṱhe, ri khou ita thendelano nga u ṅwala fhasi,+ yo ṱanzielwa nga luswayo lwa vhakololo vhashu, Vhalevi vhashu na vhotshifhe vhashu.”+
Ṱhaluso dzi re magumoni a siaṱari
^ Kana “lini na lini.”
^ Thevhedz., “mbeu.”
^ Kana “milayo i fhulufhedzeaho.”
^ Thevhedz., “vha omisa mitsinga yavho.”
^ Kana “u na vhuthu.”
^ Thevhedz., “vho omisa mitsinga yavho.”
^ Kana “pfumaho.”
^ Kana “tsikeledza.”
^ Kana “a re na vhuthu.”
