Numeri 12:1-16
12 Miriamu na Aroni vha thoma u gungulela Mushe nge a vhinga mufumakadzi wa Mukushi.+
2 Vho vha vha tshi ri: “Naa Yehova u shumisa Mushe fhedzi musi a tshi amba?+ Naa ha shumisi na riṋe musi a tshi amba?” Yehova o vha o thetshelesa.+
3 Mushe o vha e munna o vuḓaho u fhira vhanna* vhoṱhe+ kha ḽifhasi.
4 Yehova a amba na Mushe na Aroni na Miriamu a ri: “Inwi vhuraru haṋu iyani denndeni ḽa muṱangano.” Ngauralo, vhuraru havho vha ya.
5 Nga murahu ha zwenezwo, Yehova a tsa e kha gole,+ a ima muṋangoni wa dennde, a vhidza Aroni na Miriamu. Vhuvhili havho vha sendela phanḓa.
6 Mudzimu a ri: “Ndi humbela uri ni nthetshelese. Arali ho vha hu na muporofita wa Yehova vhukati haṋu ndo vha ndi tshi ḓo ḓiḓivhadza khae kha bono,+ ndo vha ndi tshi ḓo amba nae muḽoroni.+
7 Fhedzi mushumeli wanga Mushe ho ngo tou ralo! O kumedzwa vhoṱhe vha nnḓu yanga.*+
8 Ndi amba nae zwi tshi pfala ro livhana zwifhaṱuwo,+ hu si nga dzithai; u a kona u vhona u vha hone ha Yehova. Ndi ngani ni songo ofha u gungulela Mushe mushumeli wanga?”
9 Yehova a vha sinyutshela a ṱuwa phanḓa havho.
10 Gole ḽa takuwa nṱha ha dennde, Miriamu a farwa nga vhulwadze ha mapele, a tshena sa mahaḓa.+ Aroni a tshi lavhelesa a vhona Miriamu e na mapele.+
11 Nga u ṱavhanya Aroni a amba na Mushe a ri: “Pfarelo muṋe wanga! Ri khou humbela uri u songo ri lifhedza hetshi tshivhi! Ro ita zwithu zwa vhutsilu.
12 Ndi khou humbela uri u songo mu litsha a tshi bvela phanḓa a tshi nga ṅwana o bebwaho o fa, we a bebwa ṋama yawe i tshi nga yo sina!”
13 Mushe a lilela Yehova a ri: “Yowee Mudzimu, ndi khou humbela uri u mu fhodze!”+
14 Yehova a amba na Mushe a ri: “Arali khotsi awe a mu pfela mare khofheni, naa ha nga ḓo vha na ṱhoni maḓuvha a sumbe? Mu litsheni a dzule nnḓa ha madennde e eṱhe lwa maḓuvha a sumbe,+ nga murahu a kone u vhuyiswa.”
15 Nga zwenezwo, Miriamu a dzudzwa nnḓa ha madennde e eṱhe lwa maḓuvha a sumbe,+ vhathu a vho ngo takuwa henefho madenndeni u swika Miriamu a tshi vhuyiswa.
16 Nga murahu vhathu vha takuwa Hazerote,+ vha atha madennde sogani ḽa Pharani.+
Ṱhaluso dzi re magumoni a siaṱari
^ Kana “o vha a tshi ḓiṱukufhadza nga maanḓa, u fhira vhaṅwe vhanna.”
^ Thevhedz., “Kha nnḓu yanga yoṱhe, u sumbedza u fhulufhedzea.”