Numeri 16:1-50
16 Kora+ murwa wa Isara,+ murwa wa Kehati,+ ane a vha murwa wa Levi,+ a ima na Dathani na Abiramu vharwa vha Eliaba+ na Oni murwa wa Pheleti, vhane vha vha vharwa vha Rubeni.+
2 Vha kuvhanganela Mushe khathihi na vhanna vha Vhaisiraele vha 250, vharangaphanḓa vha tshitshavha, vho nangwaho tshivhidzoni, vhanna vha re na vhuimo ha nṱha.
3 Vha kuvhanganela+ Mushe na Aroni vha amba navho vha ri: “Ro neta nga inwi, ngauri tshitshavha tshoṱhe ndi tshikhethwa,+ Yehova u vhukati hatsho.+ Ndi ngani ni tshi fanela u ḓihudza kha tshivhidzo tsha Yehova?”
4 Mushe a tshi pfa zwenezwo a gwadama.
5 A amba na Kora na vhatikedzi vhawe vhoṱhe a ri: “Nga matsheloni Yehova u ḓo ḓivhadza ane a vha wawe+ na ane a vha mukhethwa ane a fanela u sendela tsini nae,+ ane a ḓo mu nanga+ u ḓo sendela tsini nae.
6 Ni ite hezwi: Iwe Kora na vhatikedzi vhau vhoṱhe,+ dzhiani zwa u okela mulilo,+
7 ni okele mulilo khazwo, ni ṋuṋedze zwioro khazwo ni zwi vhee phanḓa ha Yehova matshelo, muthu ane Yehova a ḓo mu nanga,+ ndi ene ane a ḓo vha mukhethwa. Ni khou tou zwi ṋaṋisa inwi vharwa vha Levi!”+
8 Mushe a amba na Kora a ri: “Ndi khou humbela uri ni thetshelese, inwi vharwa vha Levi.
9 Naa a ni zwi dzhieli nṱha uri Mudzimu wa Isiraele o ni khetha kha tshitshavha tsha Isiraele+ na u ni tendela uri ni sendele tsini nae u itela uri ni shume mishumo ya Yehova denndeni ḽikhethwa* na u ima phanḓa ha tshitshavha u itela u tshi shumela,+
10 uri a ḓise iwe na vhahau vhoṱhe vhane vha vha vharwa vha Levi tsini nae? Naa ni khou lingedza u lwela vhutshifhe?+
11 Nga nṱhani ha zwenezwo, iwe na vhatikedzi vhau vhoṱhe vho kuvhanganaho ni khou lwa na Yehova. Aroni u tou vha mini ni tshi mu gungulela?”+
12 Nga murahu Mushe a vhidza Dathani na Abiramu+ vharwa vha Eliaba, fhedzi vhone vha ri: “Ri nga si ḓe!
13 Naa u vhona zwi zwithu zwi sa dini uri wo ri pfulusa shangoni ḽi elelaho mafhi na mutoli u itela uri vhulaya sogani?+ Naa u khou ṱoḓa u ḓiita muvhusi washu?
14 A wo ngo ri isa shangoni ḽi elelaho mafhi na mutoli+ kana u ri ṋea masimu na minḓirivhe sa ifa ḽashu. Naa u khou fhura avho vhanna? Ri nga si ḓe!”
15 Nga zwenezwo, Mushe a sinyuwa nga maanḓa a amba na Yehova a ri: “U songo rembuluwa wa lavhelesa tshifhiwa tshavho tsha thoro. A tho ngo vha dzhiela na donngi na nthihi, kana u huvhadza muṅwe wavho.”+
16 Mushe a amba na Kora a ri: “Matshelo u ḓe phanḓa ha Yehova na vhatikedzi vhau vhoṱhe, iwe navho na Aroni.
17 Muṅwe na muṅwe u fanela u fara tshithu tshawe tsha u oka mulilo o ṋuṋedza zwioro khatsho, muṅwe na muṅwe u ḓo ḓa na tshithu tshawe tsha u oka mulilo phanḓa ha Yehova, zwithu zwa u oka mulilo zwa 250, u katela iwe na Aroni, muṅwe na muṅwe o fara tshithu tshawe tsha u oka mulilo.”
18 Ngauralo, muṅwe na muṅwe wavho a dzhia tshithu tsha u oka mulilo, a okela mulilo khatsho a ṋuṋedza na zwioro, vha ima muṋangoni wa dennde ḽa muṱangano khathihi na Mushe na Aroni.
19 Musi Kora o no kuvhanganya vhatikedzi vhawe+ denndeni ḽa muṱangano uri vha lwe navho, tshitshavha tshoṱhe tsha vhona vhugala ha Yehova.+
20 Yehova a amba na Mushe na Aroni a ri:
21 “Sendelani kule na tshenetshi tshigwada uri ndi vha vhulaye nga u ṱavhanya.”+
22 Vha tshi pfa zwenezwo vha khotha vho kwatamisa zwifhaṱuwo vha ri: “Yowee Mudzimu, iwe Mudzimu ane wa ṋea zwoṱhe vhutshilo,+ naa u khakha ha muthu muthihi hu nga ita uri u sinyutshele tshitshavha tshoṱhe?”+
23 Yehova a amba na Mushe a ri:
24 “Amba na tshitshavha uri: ‘Sendelani kule na madennde a Kora, Dathani na Abiramu!’”+
25 Nga murahu ha zwenezwo, Mushe a takuwa a ya kha Dathani na Abiramu, vhahulwane+ vha Isiraele vha ṱuwa nae.
26 A amba na tshitshavha a ri: “Ndi khou humbela uri ni sendele kule na madennde a havha vhanna vhavhi, ni songo kwama tshithu tshine tsha vha tshavho uri ni si fheliswe navho nga nṱhani ha tshivhi tshavho.”
27 Vha ṱavhanya vha sendela kule na madennde a Kora, Dathani na Abiramu, Dathani na Abiramu vha bvela nnḓa, vha ima miṋangoni ya madennde avho, vhe na vhafumakadzi vhavho, vharwa vhavho na vhana vhavho vhaṱuku.
28 Mushe a ri: “Uri ni ḓivhe uri ndi Yehova we a nthuma uri ndi ite hezwi zwithu zwoṱhe, a si nga u funa ha mbilu yanga:*
29 Arali vhenevha vhathu vha fa nga nḓila yo ḓoweleaho u fana na vhathu vhoṱhe, arali vha pfiswa vhuṱungu u fana na vhaṅwe vhathu, ndi ḓo vha ndi songo rumiwa nga Yehova.+
30 Fhedzi arali Yehova a vha ita zwiṅwe zwithu zwi songo ḓoweleaho, ḽifhasi ḽa vulea* ḽa vha mila na zwithu zwavho zwoṱhe, vha tsela fhasi Vhiḓani* vha tshi khou tshila, ndi hone ni tshi ḓo ḓivha uri vhenevha vhanna vho nyadza Yehova.”
31 Musi a tshi tou fhedza u amba enea maipfi, he vha vha vho ima hone ha vulea.+
32 Ḽifhasi ḽa vulea* ḽa vha mila na miṱa yavho na muṅwe na muṅwe we a vha a tshi ima na Kora+ na thundu dzavho dzoṱhe.
33 Vha godimela Vhiḓani* vha tshi khou tshila na vhatikedzi vhavho vhoṱhe, ḽifhasi ḽa vha tibedza, vha fheliswa tshivhidzoni.+
34 Vhaisiraele vhoṱhe vho imaho henefho vha shavha musi vha tshi pfa vhaḽa vha tshi khou ṱavha mikosi, vha ri: “Ri khou ofha uri na riṋe ḽifhasi ḽi nga ri mila!”
35 Nga murahu ha zwenezwo, ha ḓa mulilo u bvaho kha Yehova+ wa vhulaya vhaḽa vhanna vha 250 vhe vha ṋekedza zwioro.+
36 Yehova a amba na Mushe a ri:
37 “Vhudza Eliasara murwa wa tshifhe Aroni, uri a bvise zwa u oka mulilo+ zwi re muliloni, ngauri ndi zwikhethwa. U dovhe u mu vhudze uri a laṱele kule mulilo.
38 Zwa u oka mulilo zwa vhanna vhe vha fa nga nṱhani ha tshivhi tshavho zwi fanela u fulwa zwi itwe mabaphathi a u ḓodza kha aḽeṱare,+ ngauri vho zwi ḓisa phanḓa ha Yehova, zwa vha zwikhethwa; zwi shume sa tshiga kha Vhaisiraele.”+
39 Tshifhe Eliasara a dzhia zwithu zwa u oka mulilo zwa koporo, zwe zwa vha zwo ṋekedzwa nga vhe vha swa nga mulilo, vha zwi fula u itela u zwi ḓodza kha aḽeṱare,
40 Zwo vha zwo itelwa u humbudza Vhaisiraele, uri hu songo vha na muthu a sa fanelei,* ane a si vhe ṅwana wa Aroni, a sendelaho u itela u fhisa zwioro phanḓa ha Yehova,+ uri hu si vhe na muthu ane a fana na Kora na vhatikedzi vhawe,+ samusi Yehova o amba nae a tshi shumisa Mushe.
41 Nga ḓuvha ḽi tevhelaho tshitshavha tshoṱhe tsha Vhaisiraele tsha thoma u gungulela Mushe na Aroni+ tsha ri: “Inwi vhavhili no vhulaya vhathu vha Yehova.”
42 Musi tshitshavha tsho no kuvhanganela Mushe na Aroni, vha rembuluwa vha lavhelesa dennde ḽa muṱangano; vha vhona ḽo fukedzwa nga gole, ha vhonala vhugala ha Yehova.+
43 Mushe na Aroni vha ya phanḓa ha dennde ḽa muṱangano,+
44 Yehova a amba na Mushe a ri:
45 “Inwi sendelani kule na hetshi tshitshavha, uri ndi vha fhelise nga u ṱavhanya.”+ Nga zwenezwo vha khotha vho kwatamisa zwifhaṱuwo.+
46 Nga murahu ha zwenezwo, Mushe a amba na Aroni a ri: “Dzhia tsha u oka mulilo u okele khatsho mulilo u bvaho kha aḽeṱare,+ u ṋuṋedze zwioro khatsho, u ye kha tshitshavha nga u ṱavhanya uri u tshi pfumelele,+ ngauri Yehova o sinyuwa. Dwadze ḽo thoma!”
47 Aroni a ṱavhanya a tshi dzhia samusi Mushe o vha o amba, a gidimela vhukati ha tshivhidzo, vhathu vho vha vho no thoma u lwala. Ngauralo, a ṋuṋedza tshioro kha tshithu tsha u oka mulilo a thoma u pfumelela vhathu.
48 A ima vhukati ha vho faho na vha tshilaho, dwadze ḽa vhuya ḽa fhela.
49 Vhe vha fa nga dwadze vho vha vha tshi lingana 14 700, hu sa vhalwi vhe vha fa nga nṱhani ha Kora.
50 Musi Aroni a tshi humela kha Mushe muṋangoni wa dennde ḽa muṱangano, dwadze ḽo vha ḽo no fhela.
Ṱhaluso dzi re magumoni a siaṱari
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
^ Kana “a si nga u funa hanga.”
^ Thevhedz., “ḽa vula mulomo waḽo.”
^ Kana “Sheol.” Sedzani Mutevhe Wa Ṱhalutshedzo Ya Maipfi.
^ Thevhedz., “ḽa vula mulomo waḽo.”
^ Kana “Sheol.” Sedzani Mutevhe Wa Ṱhalutshedzo Ya Maipfi.
^ Thevhedz., “mutsinda.”
