Numeri 18:1-32
18 Yehova a amba na Aroni a ri: “Iwe na vharwa vhau na vha nnḓu ya vhokhotsi au ni ḓo ḓifhindulela kha vhukhakhi hoṱhe ha u tshikafhadza nnḓu khethwa,+ iwe na vharwa vhau ni ḓo ḓifhindulela kha vhukhakhi hoṱhe ha u tshikafhadza vhutshifhe haṋu.+
2 U dovhe u ḓe na vhahau vha lushaka lwa Levi, vha lushaka lwa makhulukuku wau uri vha shume na iwe+ na vharwa vhau denndeni ḽikhethwa ḽi re na mbulungelo ya mulanga.+
3 Vha ite mushumo we wa vha ṋea na mushumo wa denndeni ḽoṱhe.+ Naho zwo ralo, vha songo sendela tsini na thundu dza fhethu hukhethwa na kha aḽeṱare, uri vhone kana iwe ni si fe.+
4 Vha ḓo shuma na iwe na u ita mishumo ya denndeni ḽa muṱangano na mishumo yoṱhe ya denndeni, ane a si fanelee* ho ngo fanela u sendela tsini na inwi.+
5 Ni tea u ita mishumo yaṋu fhethu hukhethwa+ na aḽeṱareni+ uri vhathu vha Isiraele vha si tsha dovha vha sinyutshelwa.+
6 Nṋe ndo nanga vhahaṋu vha Vhalevi, vhukati ha Vhaisiraele, uri vha vhe tshifhiwa tshaṋu.+ Vho kumedzwa Yehova uri vha ṱhogomele mishumo ya denndeni ḽa muṱangano.+
7 Iwe na vharwa vhau ni na vhuḓifhinduleli kha mishumo yaṋu ya vhutshifhe ya aḽeṱareni na zwi re murahu ha khetheni,+ ni ite mishumo yaṋu henefho.+ Ndo ni ṋea mushumo wa vhutshifhe sa tshifhiwa tshaṋu, muthu ane a si fanelee* ane a sendela tsini a vhulawe.”+
8 Yehova a dovha a amba na Aroni a ri: “Ndo u vhea uri u ṱhogomele miṋeelo ine nda bviselwa yone.+ Iwe na vharwa vhau ndi khou ni ṋea mukovhe wa zwithu zwoṱhe zwikhethwa zwi ṋeelwaho nga vhaisiraele uri zwi vhe mukovhe waṋu wa tshifhinga tshoṱhe.+
9 Zwi bvaho kha zwifhiwa zwikhethwa-khethwa zwo fhiswaho nga mulilo zwi ḓo vha zwaṋu: tshifhiwa tshiṅwe na tshiṅwe tshine vha tshi ṋekedza khathihi na zwifhiwa zwavho zwoṱhe zwa thoro+ na zwifhiwa zwavho zwa u pfumelela tshivhi+ na zwifhiwa zwavho zwa u pfumelela mulandu+ zwine vha nḓisela zwone. Ndi zwikhethwa–khethwa kha iwe na vharwa vhau.
10 U zwi ḽe u fhethu hukhethwa-khethwa.+ Vhanna vhoṱhe vha nga zwi ḽa. Zwi ḓo vha zwikhethwa kha iwe.+
11 Zwiṅwe zwine zwa vha zwau ndi hezwi: zwifhiwa zwine vha zwi ṋeela+ khathihi na zwifhiwa zwoṱhe zwa u dzungudzwa+ zwa Vhaisiraele. Ndo zwi ṋea iwe na vharwa vhau na vhananyana vhau sa mukovhe wau wa tshifhinga tshoṱhe.+ A songo ḓishataho tshika wa nḓuni yau a nga zwi ḽa.+
12 “Mapfura oṱhe avhuḓi na waini ntswa yoṱhe yavhuḓi na thoro na zwiranzhe zwavho+ zwine vha ḓo zwi ṋea Yehova, ndi ḓo zwi ṋea iwe.+
13 Zwiranzhe zwa zwoṱhe zwi re masimuni avho, zwine vha ḓo zwi ḓisela Yehova, zwi ḓo vha zwau.+ A songo ḓishataho tshika wa nḓuni yau a nga zwi ḽa.
14 “Tshiṅwe na tshiṅwe* tsho itwaho tshikhethwa Isiraele tshi ḓo vha tshau.+
15 “Tanzhe ḽa zwoṱhe zwi tshilaho+ zwine vha ḓo zwi ṋekedza Yehova, hu sa londwi uri ndi muthu kana ndi tshifuwo, ḽi vhe ḽau. Naho zwo ralo, u rengulule matanzhe a vhathu,+ matanzhe a zwifuwo zwi re na tshika na one u a rengulule.+
16 U rengulule tanzhe musi ḽi na ṅwedzi muthihi u ya nṱha, nga mutengo wo anganyelwaho wa shekele* ṱhanu dza siḽiva+ u ya nga nḓila ine ha kalwa ngayo tshileme tsha shekele fhethu hukhethwa. Ndi gera* dza 20.
17 Ndi tanzhe ḽa mboho fhedzi kana tanzhe ḽa ngwana ya nduna kana ḽa mbudzi ḽine a wo ngo fanela u ḽi rengulula.+ Ndi ḽikhethwa. U shashe malofha azwo kha aḽeṱare,+ mapfura azwo u a dubise sa tshifhiwa tshi fhiswaho uri tshi nukhelele kha Yehova.+
18 Ṋama yazwo i fanela u vha yau. I vhe yau u fana na tshiakha tsha tshifhiwa tsha u dzungudzwa u fana na mulenzhe wa tsha u ḽa.+
19 Miṋeelo yoṱhe mikhethwa ine Vhaisiraele vha ḓo ṋeela Yehova+ ndo i ṋea iwe na vharwa vhau na vhananyana vhau sa mukovhe wau wa tshifhinga tshoṱhe.+ Ndi mulanga wa muṋo* wa lini na lini phanḓa ha Yehova kha iwe na vhana vhau.”
20 Yehova a bvela phanḓa a tshi amba na Aroni a ri: “A u nga vhi na ifa shangoni ḽavho, a u nga wani mukovhe wa shango vhukati havho.+ Mukovhe wau na ifa ḽau vhukati ha Vhaisiraele ndi nṋe.+
21 “Ngauri ndo ṋea vharwa vha Levi tshafumi tshiṅwe na tshiṅwe+ tsha Vhaisiraele sa ifa ḽavho samusi vha tshi shuma denndeni ḽa muṱangano.
22 Vhathu vha Isiraele vha songo tsha sendela tsini na dennde ḽa muṱangano, arali vha ita nga u ralo vha ḓo vha na tshivhi vha fa.
23 Vhalevi ndi vhone vhane vha shuma denndeni ḽa muṱangano, ndi vhone vhane vha ḓo ḓifhindulela kha vhukhakhi havho.+ Wonoyo ndi mulayo wa lini na lini kha mirafho yavho yoṱhe wa uri a vha nga wani mukovhe kha ifa ḽa Vhaisiraele.+
24 Ndo ṋea Vhalevi ifa ḽa tshafumi tshiṅwe na tshiṅwe tshine vhathu vha Isiraele vha ṋekedza Yehova. Ndi ngazwo ndo amba navho nda ri: ‘Vha songo wana ifa vhukati ha Vhaisiraele.’”+
25 Yehova a amba na Mushe a ri:
26 “U vhudze Vhalevi u ri: ‘Ni ḓo wana tshafumi tshi bvaho kha Vhaisiraele tshe nda ni ṋea tshone tshi tshi bva khavho sa ifa ḽaṋu,+ ni bvise tshafumi khatsho uri tshi vhe muṋeelo waṋu wa tshafumi kha Yehova.+
27 Tshi dzhiiwe sa muṋeelo waṋu zwa tou nga ndi thoro dza fhethu hune ha fhefherwa hone*+ kana muḓalo wa waini kana wa mapfura e na a ita.
28 Nga yeneyi nḓila ni ḓo kona u dovha na ṋeela Yehova tshafumi kha zwoṱhe zwine na zwi wana kha Vhaisiraele, wonoyo muṋeelo wa Yehova ni u ṋee tshifhe Aroni.
29 Ni ḓo ṋeela Yehova miṋeelo yo fhambanaho i tshi bva kha zwifhiwa zwavhuḓi zwe na ṋewa zwone+ sa zwithu zwikhethwa.’
30 “U ambe navho u ri: ‘Musi no no bvisa muṋeelo wa zwithu zwavhuḓi zwe na zwi wana, zwo salaho zwi ḓo vha zwa inwi Vhalevi, zwa tou nga ndi thoro dza fhethu hune ha fhefherwa hone* na muḓalo wa waini kana mapfura e na a ita.
31 Inwi na muṱa waṋu ni nga zwi ḽa ni huṅwe na huṅwe, ngauri ndi malamba a mushumo waṋu denndeni ḽa muṱangano.+
32 Arali na ṋeela zwavhuḓi zwi bvaho khazwo ni nga si vhe na mulandu, ni songo nyadzisa zwithu zwikhethwa zwa Vhaisiraele uri ni si fe.’”+
Ṱhaluso dzi re magumoni a siaṱari
^ Thevhedz., “mutsinda,” zwine zwa amba uri ndi munna ane a si vhe wa muṱa wa Aroni.
^ Thevhedz., “mutsinda,” zwine zwa amba uri ndi munna ane a si vhe wa muṱa wa Aroni.
^ Ndi tshiṅwe na tshiṅwe tsho itwaho tshikhethwa kha Mudzimu nga u kumedzwa kha Mudzimu uri tshi sa shandulwe na u rengululwa.
^ Shekele nthihi i lemela gramu dza 11,4. Sedzani Ṱhume. B14.
^ Gera nthihi i lemela gramu dza 0,57. Sedzani Ṱhume. B14.
^ Ndi mulanga wa lini na lini na u sa shanduki.
^ Kana “luvhatani.”
^ Kana “luvhatani.”
