Numeri 21:1-35
21 Musi khosi ya Arada+ ya Mukanana ye ya vha i tshi dzula Negebe i tshi pfa uri Vhaisiraele vha khou ḓa nga nḓila ya Atharimu, ya lwa navho ya thuba vhaṅwe vhavho.
2 Vhaisiraele vha anela Yehova vha ri: “Arali wa kumedzela havha vhathu zwanḓani zwashu, ri ḓo fhelisa miḓi yavho.”
3 Ngauralo, Yehova a thetshelesa Vhaisiraele a ita uri vha kunde Vhakanana, vha vha fhelisa khathihi na miḓi yavho. Nga zwenezwo, vha ira henefho fhethu uri hu pfi Horoma.*+
4 Musi vha tshi khou bvela phanḓa na lwendo lwavho vha tshi bva Thavhani ya Horo+ vho livha Lwanzheni Lutswuku uri vha bve nga thungo ya shango ḽa Edomo,+ vhathu vha netiswa nga lwendo.
5 Vhathu vha gungulela Mudzimu na Mushe+ vha ri: “Ndi ngani no ri bvisa Egipita uri ri ḓe ri fele hafha sogani? A hu na zwiḽiwa na maḓi,+ a ri tsha funa* u ḽa hovhu vhurotho vhu nengisaho.”+
6 Yehova a ruma ṋowa dzi re na vhuṱungu* dza luma vhathu lwe ha fa Vhaisiraele vhanzhi.+
7 Mafheleloni vhathu vha ḓa ha Mushe vha ri: “Ro ita tshivhi nga u gungulela Yehova khathihi na iwe.+ Ri humbelele kha Yehova uri a bvise hedzi dziṋowa vhukati hashu.” Mushe a humbelela vhathu.+
8 Ngauralo, Yehova a amba na Mushe a ri: “Ita tshifanyiso tsha ṋowa i re na vhuṱungu,* u i fhahee kha thanda. Ane a lumiwa u tea u i sedza uri a tshile.”
9 Nga u ṱavhanya Mushe a ita tshifanyiso tsha ṋowa nga koporo+ a tshi fhahea kha thanda,+ uri tshifhinga tshoṱhe musi muthu a tshi lumiwa nga ṋowa a lavhelese ṋowa ya koporo, a tshile.+
10 Nga murahu ha zwenezwo, Vhaisiraele vha takuwa vha ya vha atha madennde ngei Obothe.+
11 Vha takuwa Obothe vha ya vha atha madennde ngei Iyi-abarima,+ sogani ḽo livhanaho na Moaba thungo ya vhubvaḓuvha.
12 Vha takuwa henefho vha ya vha atha madennde Govhani* ḽa Sarede.+
13 Vha takuwa henefho vha ya vha atha madennde dzinguni ḽa Arinoni,+ ḽine ḽa vha sogani u bva mukanoni wa Vhaamori, ngauri Arinoni ndi mukano wa Moaba, une wa vha vhukati ha Moaba na Vhaamori.
14 Ndi ngazwo bugu ya Nndwa dza Yehova i tshi amba nga ha muḓi wa “Vahebe u re Sufa na magovha* a Arinoni,
15 na philiphili dza magovha,* dzine dza swika thungo ya muḓi wa Ari, wa ṱangana na mukano wa Moaba.”
16 Vha bva henefho vha ya Beera. Tshenetsho ndi tshisima tshe Yehova a vhudza Mushe nga hatsho a ri: “Kuvhanganya vhathu uri ndi vha ṋee maḓi.”
17 Nga tshenetsho tshifhinga Vhaisiraele vha imba holwu luimbo vha ri:
“Iwe tshisima, maḓi au nga a seluwe! Bvumelani!*
18 Tshisima tshe tsha bwiwa nga vhakololo, tshe vharangaphanḓa vha vhathu vha tshi fukula,
Nga lubaḓa lwa muvhusi na nga mbaḓa dzavho.”
Vha ṱuwa vha ya sogani ḽa Mathana,
19 vha bva Mathana vha ya Nahaliele, vha bva Nahaliele vha ya Bamothi.+
20 Vha ṱuwa Bamothi vha ya govhani ḽi re shangoni ḽa Moaba,+ ḽi re nṱha ha Pisiga,+ ḽo lavhelesaho Yeshimoni.+
21 Vhaisiraele vha ruma vhaḓinḓa ha Sihoni khosi ya Vhaamori vha ri:+
22 “Ri tendele ri fhire nga shangoni ḽau. A ri nga pambutsheli masimuni kana minḓirivheni. A ri nga nwi maḓi a tshisima naho tshi tshifhio. Ri ḓo tshimbila Nḓilani ya Khosi u swika ri tshi fhira shango ḽau.”+
23 Fhedzi Sihoni a si tendele Vhaisiraele vha tshi fhira nga shangoni ḽawe. Nṱhani hazwo, Sihoni a kuvhanganya vhathu vhawe vhoṱhe uri vha lwe na Vhaisiraele ngei sogani, a swika Yahazi a thoma u lwa na Vhaisiraele.+
24 Vhaisiraele vha mu kunda+ vha dzhia shango+ ḽawe u bva Arinoni+ u swika Yaboko,+ tsini na Vhaamoni, ngauri Yasere+ ndi mukano wa Vhaamoni.+
25 Vhaisiraele vha dzhia yeneyo miḓi yoṱhe, vha dzula miḓini yoṱhe ya Vhaamori,+ ngei Hesiboni na miḓanani yoṱhe ya nga tsini.*
26 Ngauri Hesiboni wo vha u muḓi wa Sihoni, khosi ya Vhaamori, we a lwa na khosi ya Moaba a mu dzhiela shango ḽawe ḽoṱhe u vhuya u swika Arinoni.
27 Ndi ngazwo vharendi vho vha vha tshi ri:
“Iḓa Hesiboni.
Muḓi wa Sihoni nga u fhaṱiwe u khwaṱhe.
28 Ngauri Hesiboni ho bva mulilo, muḓanani wa Sihoni ha bva khavhu.
Wo fhisa Ari muḓi wa Moaba, vhaṋe vha fhethu ha vhurabeli ha Arinoni.
29 Khombo iwe Moaba! U ḓo fheliswa, inwi vhathu vha Kamosi!+
O ita uri vharwa vhawe vha vhe tshavhi na vhananyana vhawe vha vhe mathubwa a Sihoni khosi ya Vhaamori.
30 Kha ri vha pfule nga misevhe;Hesiboni u ḓo fheliswa u swika Diboni;+Kha ri u fhelise u swika Nofari;Mulilo u ḓo phaḓalala u swika Medeba.”+
31 Vhaisiraele vha dzula shangoni ḽa Vhaamori.
32 Mushe a ruma vhaṅwe uri vha ye u ṱola muḓi wa Yasere.+ Vho thuba na miḓana ya nga tsini,* vha pandela Vhaamori vha re henefho.
33 Nga murahu ha zwenezwo, vha huma vha fara Nḓila i yaho Bashani. Ogo+ khosi ya Bashani a bva a ya khavho na vhathu vhawe vhoṱhe uri a lwe navho nndwani ya Ederei.+
34 Yehova a amba na Mushe a ri: “U songo mu ofha,+ ngauri ndi ḓo kumedzela ene na vhathu vhawe vhoṱhe na shango ḽawe zwanḓani zwau,+ u mu ite zwe wa ita Sihoni khosi ya Vhaamori, we a vha a tshi dzula ngei Hesiboni.”+
35 Ngauralo, vha mu vhulaya na vharwa vhawe na vhathu vhawe vhoṱhe, hu si sale na muthihi,+ vha dzhia shango ḽawe.+
Ṱhaluso dzi re magumoni a siaṱari
^ Zwine zwa amba uri “U Kumedzela Ndozwo.”
^ Kana “vhenga.”
^ Kana “mulilo.”
^ Kana “mulilo.”
^ Kana “Muedzini.”
^ Kana “miedzi.”
^ Kana “miedzi.”
^ Kana “Imbani.”
^ Kana “yo u tangaho.”
^ Kana “yo u tangaho.”
