Numeri 25:1-18
25 Musi Vhaisiraele vha tshi khou dzula Sitima,+ vhathu vha thoma u ḓifara luvhi nga zwa vhudzekani na vhananyana vha Moaba.+
2 Vhafumakadzi vha ramba vhenevho vhathu uri vha ḓe musi vha tshi itela midzimu yavho zwiṱhavhelo,+ vhenevho vhathu vha thoma u ḽa zwiṱhavhelo na u gwadamela midzimu yavho.+
3 Vhaisiraele vha ṱanganela kha u gwadamela Baali wa Pheoro,+ Yehova a sinyutshela Isiraele.
4 Yehova a amba na Mushe a ri: “Dzhia vharangaphanḓa vhoṱhe vha vhenevha vhathu u vha fhahee phanḓa ha Yehova masiari tshivhangalala* uri Yehova a si tsha sinyutshela Isiraele.”
5 Mushe a amba na vhahaṱuli vha Isiraele a ri:+ “Muṅwe na muṅwe waṋu u fanela u vhulaya vhanna vhoṱhe vha re nga fhasi hawe vhe vha ṱanganela kha u gwadamela Baali wa Pheoro.”+
6 Musi vha tshi khou lila muṋangoni wa dennde ḽa muṱangano, ha fhira muṅwe wa Vhaisiraele o ḓa na mufumakadzi wa Mumidiani kha vhahawe,+ Mushe a tshi zwi vhona, na tshitshavha tshoṱhe tsha Vhaisiraele tshi tshi khou zwi vhona.
7 Musi Finiasi+ murwa wa Eliasara murwa wa tshifhe Aroni a tshi zwi vhona, a takuwa vhukati ha tshitshavha nga u ṱavhanya a dzhia pfumo.
8 A tevhela onoyo munna wa Muisiraele nga ngomu denndeni a vha ṱhavha nga pfumo, a phula thumbu ya onoyo munna wa Isiraele na ya onoyo mufumakadzi. Dwadze ḽa fhela kha Vhaisiraele.+
9 Vhe vha fa nga dwadze vho vha vha tshi lingana 24 000.+
10 Yehova a amba na Mushe a ri:
11 “Finiasi+ murwa wa Eliasara murwa wa tshifhe Aroni o humisa mbiti dzanga kha vhathu vha Isiraele, ngauri ho ngo konḓelela u sa fhulufhedzea havho kha nṋe.+ Nga zwenezwo, a tho ngo fhelisa Vhaisiraele samusi ndi tshi ṱoḓa uri vha ḓikumedze tshoṱhe kha nṋe.+
12 Nga zwenezwo, u mu vhudze u ri: ‘Ndi khou vhofha nae mulanga wa mulalo.
13 U ḓo shuma sa mulanga wa lini na lini wa vhutshifhe hawe na ha vhana vhawe+ ngauri ho ngo konḓelela u sa fhulufhedzea kha Mudzimu wawe,+ a pfumelela vhathu vha Isiraele.’”
14 Nga zwenezwo dzina ḽa munna wa Muisiraele we a vhulawa khathihi na mufumakadzi wa Mumidiani o vha e Simiri murwa wa Seilu, murangaphanḓa wa vha nnḓu ya vhokhotsi a Vhasimioni.
15 Mufumakadzi wa Mumidiani we a vhulawa o vha a tshi pfi Kosibi ṅwananyana wa Tsuri;+ Tsuri o vha e murangaphanḓa wa lushaka lwa vha nnḓu ya vhokhotsi vha ngei Midiani.+
16 Nga murahu, Yehova a amba na Mushe a ri:
17 “Ilwa na Vhamidiani u vha vhulaye,+
18 ngauri vho lwa na iwe nga u u lukela maano mavhi nga nṱhani ha Pheoro+ na Kosibi ṅwananyana wa murangaphanḓa wa Midiani, we a vhulawa+ nga ḓuvha ḽa dwadze nga zwe a ita Pheoro.”+
Ṱhaluso dzi re magumoni a siaṱari
^ Thevhedz., “ḓuvhani.”