Numeri 28:1-31
28 Yehova a dovha a amba na Mushe a ri:
2 “Laya Vhaisiraele u vha vhudze u ri: ‘Ni fanela u ṱhogomela musi ni tshi nṋekedza zwifhiwa zwanga, vhurotho hanga. Zwifhiwa zwa u fhiswa zwine zwa nukhelela kha nṋe zwi fanela u ṋekedzwa nga tshifhinga tshazwo tsho vhewaho.’+
3 “U vha vhudze u ri: ‘Tshifhiwa tshine tsha fhiswa nga mulilo tshine na ḓo tshi ṋekedza Yehova ndi hetshi: ngwana dza nduna mbili dzi sa lwaliho dzi re na ṅwaha muthihi nga ḓuvha sa tshifhiwa tsha u fhiswa tsha misi yoṱhe.+
4 Iṅwe ngwana ya nduna ni i ṋekedze nga matsheloni, iṅwe ngwana ya nduna ni i ṋekedze nga madekwana,*+
5 khathihi na tshipiḓa tshithihi kha zwa fumi tsha tshikalo tsha efa* ya fuḽauru tsekene sa tshifhiwa tsha thoro+ tsho ṱanganyiswaho na tshipiḓa tshithihi kha zwiṋa tsha hini* ya mapfura o kunaho.
6 Ndi tshifhiwa tsha u fhiswa+ tsha misi yoṱhe tshe tsha ṋekedzwa Thavhani ya Sinai uri tshi vhe tshifhiwa tsha u fhiswa tsha Yehova tshi nukhelelaho,
7 khathihi na tshifhiwa tshatsho tsha u nwiwa, tshipiḓa tshithihi kha zwiṋa tsha hini kha ngwana ya nduna iṅwe na iṅwe.+ U tevhulele halwa fhethu hukhethwa uri vhu vhe tshifhiwa tsha tshinwiwa kha Yehova.
8 U ṋekedze iṅwe ngwana ya nduna nga madekwana.* U i ṋekedze sa tshifhiwa tsha u fhiswa nga mulilo uri i nukhelele kha Yehova khathihi na tshifhiwa tsha thoro tshi fanaho na tshine tsha itwa nga matsheloni khathihi na tshifhiwa tshayo tsha u nwiwa.+
9 “‘Naho zwo ralo, nga ḓuvha ḽa Savhatha+ ni fanela u ṋekedza tshifhiwa tsha ngwana dza nduna mbili dzi re na ṅwaha muthihi dzi sa lwali na zwipiḓa zwivhili kha zwa fumi zwa fuḽauru tsekene sa tshifhiwa tsha thoro yo ṱanganyiswaho na mapfura, khathihi na tshifhiwa tshatsho tsha u nwiwa.
10 Hetshi ndi tshifhiwa tsha u fhiswa nga Savhatha, khathihi na tshifhiwa tsha u fhiswa tsha misi yoṱhe na tshifhiwa tshatsho tsha u nwiwa.+
11 “‘Mathomoni a ṅwedzi muṅwe na muṅwe ni ḓo ṋekedza Yehova tshifhiwa tsha u fhiswa tsha mbohwana mbili, thutha nthihi na ngwana dza nduna dza sumbe dzi sa lwaliho dzi re na ṅwaha muthihi,+
12 na zwipiḓa zwiraru kha zwa fumi zwa fuḽauru tsekene sa tshifhiwa tsha thoro+ yo ṱanganyiswaho na mapfura u itela mboho iṅwe na iṅwe na zwipiḓa zwivhili kha zwa fumi zwa fuḽauru tsekene sa tshifhiwa tsha thoro yo ṱanganyiswa na mapfura u itela thutha nthihi,+
13 na tshipiḓa tshithihi kha zwa fumi tsha fuḽauru tsekene tshi tshimbidzanaho na tshifhiwa tsha thoro tsho ṱanganyiswaho na mapfura u itela ngwana ya nduna iṅwe na iṅwe, sa tshifhiwa tsha u fhiswa, uri tshi vhe tshifhiwa tsha u fhiswa tsha Yehova tshi nukhelelaho.+
14 Zwifhiwa zwavho zwa u nwiwa zwi fanela u vha hafu ya hini ya waini kha mboho,+ kha thutha hu ḓo vha tshipiḓa tshithihi kha zwiraru tsha hini,+ kha ngwana ya nduna hu ḓo vha tshipiḓa tshithihi kha zwiṋa tsha hini.+ Ndi tshone tshifhiwa tsha u fhiswa ṅwedzi muṅwe na muṅwe ṅwaha woṱhe.
15 Hu ṋekedzwe Yehova tshibudzana tshithihi sa tshifhiwa tsha u pfumelela tshivhi u engedza kha tshifhiwa tsha u fhiswa tsha misi yoṱhe khathihi na tshifhiwa tshatsho tsha u nwiwa.
16 “‘Nga ṅwedzi wa u thoma nga ḓuvha ḽa vhu 14 ḽa ṅwedzi hu ḓo vha Paseka ya Yehova.+
17 Nga ḓuvha ḽa vhu 15 nga wonoyo ṅwedzi hu ḓo vha na vhuṱambo. Hu ḓo ḽiwa vhurotho vhu si na mbiliso maḓuvha a sumbe.+
18 Nga ḓuvha ḽa u thoma hu ḓo vha na muṱangano mukhethwa. Ni songo shuma mushumo naho u ufhio u lemelaho.
19 Ni ṋekedze Yehova zwifhiwa zwa u fhiswa nga mulilo zwi ngaho mbohwana mbili, thutha nthihi, ngwana dza nduna dza sumbe dza ṅwaha muthihi. Ni ṋekedze zwifuwo zwi sa lwaliho.+
20 Ni ṋekedze na zwifhiwa zwazwo zwa thoro zwa fuḽauru tsekene yo ṱanganyiswaho na mapfura,+ zwiraru zwi ḓo vha zwa mboho, zwipiḓa zwivhili kha zwa fumi zwi ḓo vha zwa thutha.
21 U ṋekedze tshipiḓa tshithihi kha zwa fumi u tshi itela ngwana ya nduna iṅwe na iṅwe kha ngwana dza nduna dza sumbe
22 khathihi na mbudzi nthihi ya tshifhiwa tsha u pfumelela tshivhi uri ni ḓiitele tshipfumelelo.
23 Nga nnḓa ha tshifhiwa tsha u fhiswa tsha nga matsheloni tshine tsha vha tshifhiwa tsha u fhiswa tsha misi yoṱhe, ni ḓo ṋekedza zwenezwo.
24 Nga nḓila i fanaho maḓuvha oṱhe a sumbe, ni ṋekedze zwiḽiwa,* tshifhiwa tshi fhiswaho nga mulilo, tshi nukhelelaho kha Yehova. Tshi ṋekedzwe khathihi na tshifhiwa tsha u fhiswa tsha misi yoṱhe na tshifhiwa tsha u nwiwa.
25 Nga ḓuvha ḽa vhusumbe ni vhe na muṱangano mukhethwa.+ Ni songo shuma mushumo naho u ufhio u lemelaho.+
26 “‘Nga ḓuvha ḽa zwiranzhe,+ musi ni tshi ṋekedza Yehova tshifhiwa tsha thoro ntswa,+ ni vhe na muṱangano mukhethwa kha vhuṱambo haṋu ha khaṋo.+ Ni songo shuma mushumo naho u ufhio u lemelaho.+
27 Ni ṋekedze mbohwana mbili, thutha nthihi, ngwana dza nduna dza sumbe dzi re na ṅwaha muthihi+ dza tshifhiwa tsha u fhiswa uri tshi nukhelele kha Yehova,
28 tshifhiwa tsha thoro tsha fuḽauru tsekene yo ṱanganyiswaho na mapfura tshi vhe zwipiḓa zwiraru kha zwa fumi kha mboho iṅwe na iṅwe, zwipiḓa zwivhili kha zwa fumi kha thutha nthihi,
29 tshipiḓa tshithihi kha zwa fumi u tshi itela ngwana ya nduna iṅwe na iṅwe ya kha ngwana dza nduna dza sumbe,
30 na tshibudzana tshithihi uri ni ḓipfumelele.+
31 Ni zwi ṋekedze ni tshi engedza kha tshifhiwa tsha u fhiswa tsha misi yoṱhe na tshifhiwa tshatsho tsha thoro. Zwi vhe zwi zwifuwo zwi sa lwaliho,+ khathihi na zwifhiwa zwazwo zwa u nwiwa.
Ṱhaluso dzi re magumoni a siaṱari
^ Thevhedz., “vhukati ha madekwana mavhili.”
^ Tshipiḓa tshithihi kha zwa fumi tsha efa tshi lingana na ḽithara dza 2,2. Sedzani Ṱhume. B14.
^ Hini i lingana na ḽithara dza 3,67. Sedzani Ṱhume. B14.
^ Thevhedz., “vhukati ha madekwana mavhili.”
^ Thevhedz., “vhurotho.”
