Numeri 30:1-16
30 Mushe a amba na vharangaphanḓa+ vha tshaka dza Isiraele a ri: “Hezwi ndi zwe Yehova a laya:
2 Arali muthu a anela+ Yehova kana a ḓivhofha nga muano+ wa u ḓidzima, a songo litsha u ita zwe a amba.+ A ite zwoṱhe zwe a ana uri u ḓo zwi ita.+
3 “Arali mufumakadzi a anela Yehova kana a ḓivhofha nga muano wa u ḓidzima musi a tshi kha ḓi vha muṱuku a tshi kha ḓi dzula nḓuni ya khotsi awe,
4 khotsi awe a zwi pfa zwa uri o ita muano kana o ḓivhofha nga muano wa u ḓidzima, khotsi awe a si mu thivhele, u tea u ita zwe a ana, u ḓo ita muano wa u ḓidzima we a ḓivhofha ngawo.
5 Fhedzi arali khotsi awe a mu thivhela musi a tshi pfa uri o ana kana o ḓivhofha nga muano wa u ḓidzima, ha nga ḓo ita zwe a ana. Naho zwo ralo, Yehova u ḓo mu hangwela ngauri khotsi awe o mu thivhela.+
6 “Naho zwo ralo, arali a vhingwa a tshi kha ḓi vha o ana kana o fhulufhedzisa a songo thoma a humbula,
7 munna wawe a zwi pfa a si mu thivhele nga ḓuvha ḽe a zwi pfa ngaḽo, u ḓo ita zwe a ana.
8 Fhedzi arali munna wawe a mu thivhela nga ḓuvha ḽe a zwi pfa ngaḽo, a nga fhelisa muano kana zwe a fhulufhedzisa a songo thoma a humbula,+ Yehova u ḓo mu hangwela.
9 “Arali tshilikadzi kana mufumakadzi o ṱalwaho a ita muano, zwoṱhe zwe a ḓivhofha ngazwo zwi ḓo mu vhofha.
10 “Naho zwo ralo, arali mufumakadzi a ana kana a ḓivhofha nga muano wa u ḓidzima musi a tshi kha ḓi dzula nḓuni ya munna wawe,
11 munna wawe a zwi pfa a si mu thivhele kana u mu hanela, miano yawe yoṱhe kana u ḓivhofha hawe nga muano naho u ufhio zwi ḓo dzula zwo ralo.
12 Fhedzi arali nga ḓuvha ḽe a zwi pfa ngaḽo, munna wawe a fhelisa tshoṱhe muano naho u ufhio kana u ḓivhofha nga muano wa u ḓidzima, ha nga ḓo ita zwe a ana.+ Munna wawe o u fhelisa, Yehova u ḓo mu hangwela.
13 Kha muano naho u ufhio kana u ḓivhofha nga muano naho u ufhio wa u ḓidzima, munna wawe u ḓo ita phetho arali onoyo mufumakadzi a tshi fanela u ita zwe a ana kana u sa zwi ita.
14 Fhedzi arali munna wawe a songo mu thivhela na luthihi, ha fhela maḓuvha manzhi, a dovha a mu tendela uri a ite zwoṱhe zwe a ana kana a ite miano yawe yoṱhe ya u ḓidzima. O mu tendela uri a ite zwenezwo ngauri ho ngo mu thivhela nga ḓuvha ḽe a zwi pfa a tshi ana.
15 Fhedzi arali a i fhelisa nga murahu, musi ho no fhela tshifhinga u bva nga ḓuvha ḽe a zwi pfa ngaḽo, u ḓo vha na vhuḓifhinduleli ha mvelelo dza mulandu wawe.+
16 Enea ndi maitele e Yehova a laya Mushe ane a kwama munna na mufumakadzi wawe, na ane a kwama khotsi na ṅwananyana wawe ane a dzula nḓuni yawe.”
