Numeri 31:1-54
31 Yehova a amba na Mushe a ri:
2 “Lifhedza+ Vhamidiani+ zwe vha ita Vhaisiraele. Nga murahu u ḓo kona u vhulungwa na vhathu vha hau.”+
3 Mushe a amba na vhathu a ri: “Kuvhanganyani vhanna vhukati haṋu uri vha lwe na Vhamidiani na u lifhedzela Yehova kha Vhamidiani.
4 U rumele nndwani vhanna vha 1 000 vha bvaho kha lushaka luṅwe na luṅwe lwa tshaka dza Isiraele.”
5 Kha zwigidi zwa Isiraele,+ ho vha ho nangwa vha 1 000 kha lushaka luṅwe na luṅwe, ha kuvhangana vha 12 000 u itela u lwa.
6 Mushe a rumela nndwani vhanna vha 1 000 vha bvaho kha lushaka luṅwe na luṅwe khathihi na Finiasi+ murwa wa tshifhe Eliasara, we a vha o fara thundu khethwa na phalaphala+ dzine dza lidzwa uri vhathu vha ḓilugiselele nndwa.
7 Vha lwa na Vhamidiani, sa zwe Yehova a laya Mushe, vha vhulaya vhanna vhoṱhe.
8 Vho vhulaya mahosi a Midiani na vhaṅwe vhathu. Mahosi e a vhulawa o vha e: Evi, Rekemu, Tsuri, Huri na Reba, ane a vha mahosi maṱanu a Midiani. Vho dovha vha vhulaya na Bileamu+ murwa wa Beoro nga banga.
9 Fhedzi Vhaisiraele vha thuba vhafumakadzi na vhana vha Midiani. Vha dovha vha dzhia na zwifuwo zwavho zwoṱhe na thundu dzavho dzoṱhe.
10 Vha fhisa miḓi yavho yoṱhe ye vha vha vha tshi dzula khayo na madennde avho.
11 Vha dzhia thundu yoṱhe ye vha i thuba khathihi na vhathu na zwifuwo.
12 Vha ḓisa mathubwa na thundu dze vha thuba kha Mushe na tshifhe Eliasara na kha tshitshavha tsha Vhaisiraele, madenndeni a re midavhini ya sogani ḽa Moaba+ tsini na Yorodane tsini na Yeriko.
13 Mushe na tshifhe Eliasara na vharangaphanḓa vha tshitshavha vha ya vha vha ṱanganedza nnḓa ha madennde.
14 Fhedzi Mushe a sinyutshela vhanna vho nangwaho uri vha ye nndwani, vhalangammbi vha zwigidi na vhalangammbi vha maḓana vha bvaho nndwani.
15 Mushe a amba navho a ri: “Naa no litsha u vhulaya vhafumakadzi vhoṱhe?
16 Ndi vhone vhe vha tevhedza zwe Bileamu a amba, vha kunga Vhaisiraele uri vha si fhulufhedzee+ kha Yehova kha zwe vha ita ngei Pheoro,+ lwe dwadze ḽa ḓela tshitshavha tsha Yehova.+
17 Vhulayani vhana vhavho vhoṱhe vha vhatukana, ni vhulaye na vhafumakadzi vhoṱhe vho no itaho zwa vhudzekani.
18 Fhedzi ni litshe vhasidzana vhoṱhe vha sa athu u itaho zwa vhudzekani na vhanna.+
19 Ni athe madennde nnḓa ha madennde lwa maḓuvha a sumbe. Muṅwe na muṅwe we a vhulaya muthu na we a kwama tshitumbu+ a ḓikunakise+ nga ḓuvha ḽa vhuraru na nga ḓuvha ḽa vhusumbe, inwi na mathubwa aṋu.
20 Ni kunakise zwiambaro zwoṱhe kha tshivhi, tshiṅwe na tshiṅwe tsha mukumba, tshiṅwe na tshiṅwe tsho itwaho nga mamvele a mbudzi na tshiṅwe na tshiṅwe tsha thanda.”
21 Tshifhe Eliasara a amba na maswole e a ya nndwani a ri: “Maitele a mulayo e Yehova a laya Mushe ndi haya:
22 ‘Ndi musuku, siḽiva, koporo, tsimbi, thini na mutobvu,
23 tshiṅwe na tshiṅwe tshi sa swi, ni tshi pose muliloni uri tshi bve tshika. Naho zwo ralo, tshi dovhe tshi ṱanzwiwe nga maḓi uri tshi kune.+ Tshiṅwe na tshiṅwe tshine tsha swa nga mulilo ni tshi ṱanzwe nga maḓi.
24 Nga ḓuvha ḽa vhusumbe ni kuvhe zwiambaro zwaṋu uri zwi kune, musi no no fhedza zwenezwo ni kone u dzhena madenndeni.’”+
25 Yehova a amba na Mushe a ri:
26 “Iwe khathihi na tshifhe Eliasara na vharangaphanḓa vha miṱa ya vhokhotsi vha tshitshavha ni vhale zwe na dzhia, khathihi na mathubwa a vhathu na a zwifuwo.
27 Ni kovhekanye zwe zwa dzhiiwa zwi vhe zwipiḓa zwivhili uri zwi kovhelwe maswole e a ya nndwani na tshitshavha tshoṱhe.+
28 U bvise tshithihi* kha zwa 500, tsha vhathu, tsha kholomo, tsha donngi na tsha nngu uri zwi vhe muthelo wa Yehova.
29 Ni bvise tshithihi kha mukovhe wavho, ni tshi ṋee tshifhe Eliasara uri tshi vhe muṋeelo wa Yehova.+
30 U dovhe u bvise tshithihi kha zwa 50 zwo kovhelwaho Vhaisiraele, tsha vhathu, tsha kholomo, tsha donngi na tsha nngu, na tsha zwifuwo zwoṱhe, u zwi ṋee Vhalevi+ vhane vha shuma denndeni ḽikhethwa* ḽa Yehova.”+
31 Mushe na tshifhe Eliasara vha ita zwe Yehova a laya Mushe.
32 Vhathu vho dzhia nngu dzi linganaho 675 000,
33 kholomo dza 72 000,
34 na donngi dza 61 000.
35 Vhafumakadzi vha sa athu u itaho zwa vhudzekani na vhanna+ vho vha vhe 32 000.
36 Mukovhe wa vhe vha ya nndwani wo vha u nngu dza 337 500.
37 Muthelo we wa bviselwa Yehova wo vha u nngu dza 675.
38 Kholomo dzo vha dzi 36 000, vha bvisela Yehova khadzo muthelo wa dza 72.
39 Donngi dzo vha dzi 30 500, vha bvisela Yehova khadzo muthelo wa dza 61.
40 Vhathu vho vha vhe 16 000, vha bvisela Yehova muthelo wa vha 32.
41 Mushe a dzhia muthelo we wa vha u muṋeelo wa Yehova a u ṋea tshifhe+ Eliasara, sa zwe Yehova a laya Mushe.
42 Mukovhe we wa vha u wa Vhaisiraele, we Mushe a u kovhekanya u tshi bva kha mukovhe wa maswole e a ya nndwani,
43 wo vha u mukovhe wa nngu dza 337 500,
44 wa kholomo wo vha u 36 000,
45 wa donngi wo vha u 30 500,
46 wa vhathu wo vha u 16 000.
47 Mushe a bvisa hafu kha mukovhe wa Vhaisiraele, kha zwa 50 a bvisa tshithihi tsha vhathu na tsha zwifuwo a zwi ṋea Vhalevi+ vhane vha shuma denndeni ḽikhethwa ḽa Yehova,+ sa zwe Yehova a laya Mushe.
48 Vhanna vho nangwaho vhane vha vha vhalangammbi vha maswole a zwigidi,+ vharangaphanḓa vha zwigidi na vharangaphanḓa vha maḓana, vha ḓa ha Mushe,
49 vha ri: “Riṋe vhashumeli vhau ro vhala maswole ane ra a langa, ra wana hu si na na muthihi o ṱahelaho kha riṋe.+
50 Muṅwe na muṅwe washu kha ṋekedze zwe a zwi wana uri zwi vhe tshifhiwa tsha Yehova, ri mu ṋekedze madzanga a musuku, mabengele, rinngi, zwiṅiṋa na dziṅwe dzhuweḽari, uri ri ḓipfumelele phanḓa ha Yehova.”
51 Mushe na tshifhe Eliasara vha ṱanganedza musuku u bvaho khavho na dzhuweḽari dzoṱhe.
52 Musuku woṱhe we wa ṋeelwa Yehova wo vha u shekele* dza 16 750, u tshi bva kha vharangaphanḓa vha zwigidi na vharangaphanḓa vha maḓana.
53 Ḽiswole ḽiṅwe na ḽiṅwe ḽo dzhia thundu dze ḽa dzi thuba.
54 Mushe na tshifhe Eliasara vha ṱanganedza musuku u bvaho kha vharangaphanḓa vha zwigidi na kha vharangaphanḓa vha maḓana vha u ḓisa denndeni ḽa muṱangano wa vha tshihumbudzi kha vhathu vha Isiraele phanḓa ha Yehova.
Ṱhaluso dzi re magumoni a siaṱari
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
^ Shekele nthihi i lemela gramu dza 11,4. Sedzani Ṱhume. B14.
