Numeri 32:1-42
-
Vha dzulaho vhubvaḓuvha ha Yorodane (1-42)
32 Vharwa vha Rubeni+ na vha Gada+ vho vha vhe na zwifuwo zwinzhi-zwinzhi, vha vhona uri shango ḽa Yasere+ na ḽa Giḽiada ho vha hu fhethu havhuḓi ha zwifuwo.
2 Ngauralo, vharwa vha Gada na vha Rubeni vha ḓa ha Mushe na tshifhe Eliasara na vharangaphanḓa vha tshitshavha vha ri:
3 “Shango ḽa Atharothe, Diboni, Yasere, Nimira, Hesiboni,+ Eleale, Sebamu, Nebo+ na ḽa Beoni,+
4 mashango e Yehova a a kunda tshitshavha tsha Isiraele+ tshi tshi zwi vhona, ndi mashango avhuḓi kha zwifuwo, vhashumeli vhau vha na zwifuwo zwinzhi.”+
5 Vha bvela phanḓa vha ri: “Arali u tshi ri takalela, ṋea vhashumeli vhau heḽi shango uri ḽi vhe ḽavho. U songo tenda ri tshi wela Mulambo wa Yorodane.”
6 Mushe a amba na vharwa vha Gada na vha Rubeni a ri: “Naa vhahaṋu vha ḓo ya nndwani ngeno inwi no dzula fhano?
7 Ndi ngani ni tshi kula nungo vhathu vha Isiraele uri vha si wetshele shangoni ḽine Yehova a ḓo vha ṋea ḽone?
8 Hezwi ndi zwe vhokhotsi aṋu vha zwi ita musi ndo vha ruma ri ngei Kadese-baranea uri vha ye u ṱola shango.+
9 Musi vha tshi gonya Govha* ḽa Esikolo,+ vha tshi vhona shango, vha kula nungo vhathu vha Isiraele uri vha si ye shangoni ḽe Yehova a vha ṋea ḽone.+
10 Nga ḽeneḽo ḓuvha Yehova a sinyuwa zwihulu a ana a ri:+
11 ‘Vhanna vhe vha bva Egipita vha re na miṅwaha ya 20 u ya nṱha vha nga si vhone shango+ ḽe nda anela Abrahamu, Isaka na Yakobo,+ ngauri a vho ngo ntevhela nga mbilu yoṱhe,
12 nga nnḓa ha Kalebe+ murwa wa Yefune wa lushaka lwa Kenisi na Yoshua+ murwa wa Nunu, ngauri vho tevhela Yehova nga mbilu yoṱhe.’+
13 Ngauralo, Yehova a sinyutshela Vhaisiraele a ita uri vha tendeleke sogani miṅwaha ya 40+ u swika murafho woṱhe we wa tshinya phanḓa ha Yehova u tshi fa.+
14 Inwi vhaitazwivhi ni khou ita zwi fanaho na zwe vhokhotsi aṋu vha zwi ita nga u ṋaṋisa mbiti dza Yehova uri a sinyutshele Isiraele.
15 Arali na mu shandukela ni si mu tevhele, u ḓo dovha a vha litsha sogani, ni ḓo ita uri avha vhathu vhoṱhe vha fheliswe.”
16 Nga murahu vha ḓa khae vha ri: “Ri tendele ri fhaṱe fhano madanga a matombo a zwifuwo zwashu na miḓi ya vhana vhashu.
17 Fhedzi riṋe ri ḓo dzula ro ḓilugiselela u lwa,+ ri ḓo ranga phanḓa Vhaisiraele u swika ri tshi vha swikisa hune vha ḓo dzula hone, ngeno vhana vhashu vha tshi ḓo dzula miḓini yo tsireledzwaho nga mbondo kha vhadzulapo vha ḽeneḽo shango.
18 A ri nga vhuyeleli nḓuni dzashu u swika Muisiraele muṅwe na muṅwe a tshi wana shango sa ifa ḽawe.+
19 Ngauri ri nga si wane ifa khathihi navho seli ha Yorodane na u fhirela phanḓa, ngauri riṋe ro no wana ifa ḽashu thungo ya vhubvaḓuvha ha Yorodane.”+
20 Mushe a amba navho a ri: “Arali na ita zwenezwi: ḓilugiseleni phanḓa ha Yehova uri ni kone u ya nndwani;+
21 arali muṅwe na muṅwe waṋu a ya nndwani, a wela seli ha Yorodane phanḓa ha Yehova, u swika a tshi pandela maswina awe phanḓa hawe,+
22 ḽeneḽo shango ḽa kundwa phanḓa ha Yehova,+ nga murahu ni nga vhuyelela+ ni si vhe na mulandu phanḓa ha Yehova na Isiraele. Ndi hone ḽeneḽo shango ḽi tshi ḓo vha ifa ḽaṋu phanḓa ha Yehova.+
23 Fhedzi arali na sa ita zwenezwo, ni ḓo vha no khakhela Yehova. Ni ḓivhe uri ni ḓo pfiswa vhuṱungu nga nṱhani ha vhutshinyi haṋu.
24 Nga zwenezwo, ni nga fhaṱa miḓi ya vhana vhaṋu na madanga a nngu dzaṋu,+ fhedzi ni ite zwe na fhulufhedzisa.”
25 Vharwa vha Gada na vha Rubeni vha amba na Mushe vha ri: “Vhashumeli vhau vha ḓo ita zwe muṋe washu a laya.
26 Vhana vhashu, vhafumakadzi vhashu, masambi ashu na zwifuwo zwashu zwoṱhe zwi ḓo sala henefho miḓini ya Giḽiada,+
27 fhedzi vhashumeli vhau vha ḓo wela seli, vhanna vhoṱhe vha lwa phanḓa ha Yehova,+ sa zwe muṋe washu a amba.”
28 Ndi hone Mushe a tshi ṋea ndaela tshifhe Eliasara na Yoshua murwa wa Nunu na vharangaphanḓa vha miṱa ya vhokhotsi vha tshaka dza Isiraele.
29 Mushe a amba navho a ri: “Arali vharwa vha Gada na vha Rubeni vha wela na inwi seli ha Yorodane, vhoṱhe vho lugela u lwa phanḓa ha Yehova, shango ḽa kundwa phanḓa haṋu, ni vha ṋee shango ḽa Giḽiada uri ḽi vhe ifa ḽavho.+
30 Arali vha sa ni tikedza nndwani, vha si wele seli na inwi, vha dzule vhukati haṋu shangoni ḽa Kanana.”
31 Vharwa vha Gada na vha Rubeni vha fhindula vha ri: “Vhashumeli vhau vha ḓo ita zwe Yehova a amba.
32 Riṋe ri ḓo ya nndwani, ra wela seli phanḓa ha Yehova ra ya shangoni ḽa Kanana,+ fhedzi ifa ḽine ra ḓo ḽi wana ḽi ḓo vha ḽi thungo ha Yorodane.”
33 Mushe a vha ṋea ḽone, a ḽi ṋea vharwa vha Gada na vha Rubeni,+ ḽiṅwe a ḽi ṋea hafu ya lushaka lwa Manase+ murwa wa Yosefa, a vha ṋea muvhuso wa Sihoni,+ khosi ya Vhaamori na muvhuso wa Ogo,+ khosi ya Bashani na shango ḽoṱhe ḽi re nga fhasi ha yeneyo miḓi, na miḓi yo tangaho ḽeneḽo shango.
34 Vharwa vha Gada vha fhaṱa* miḓini ya Diboni,+ Atharothe,+ Aroere,+
35 Atherote-sofani, Yasere,+ Yogobeha,+
36 Bethe-nimira+ na Betheharani,+ ine ya vha miḓi yo tsireledzwaho nga mbondo, vha fhaṱa madanga a matombo a masambi.
37 Vharwa vha Rubeni vha fhaṱa Hesiboni,+ Eleale,+ Kirethaimi,+
38 Nebo+ na Baali-meoni,+ madzina a miḓi yeneyo o vha o shandulwa, khathihi na Sibima; vha thoma u ira yeneyo miḓi ye vha i fhaṱulula maṅwe madzina.
39 Vharwa vha Maxiri+ murwa wa Manase vha lwa na shango ḽa Giḽiada vha ḽi thuba, vha pandela Vhaamori vha dzulaho henefho.
40 Mushe a ṋea Maxiri murwa wa Manase shango ḽa Giḽiada, a dzula khaḽo.+
41 Yairi murwa wa Manase a lwa navho, a thuba miḓana yavho ya madennde, a ri i pfi Hafothe-yairi.*+
42 Noba a lwa na shango ḽa Kenathi na miḓana ya nga tsini* a i thuba, a ri i pfi Noba ḽine ḽa vha dzina ḽawe.
Ṱhaluso dzi re magumoni a siaṱari
^ Kana “Muedzi.”
^ Kana “fhaṱulula.”
^ Zwine zwa amba uri “Miḓana Ya Madennde A Yairi.”
^ Kana “yo u tangaho.”
