Numeri 35:1-34
35 Yehova a amba na Mushe ngei midavhini ya sogani ḽa Moaba tsini na Yorodane+ ngei Yeriko a ri:
2 “Laya Vhaisiraele uri kha mashango avho vha kovhele Vhalevi miḓi ine vha ḓo dzula khayo sa ifa ḽavho,+ vha ṋee Vhalevi pfulo u mona na miḓi yeneyo.+
3 Vha ḓo dzula kha yeneyo miḓi, pfulo i ḓo vha ya masambi avho na zwifuwo zwavho zwi re madangani, thundu dzavho na zwiṅwe zwifuwo zwavho zwoṱhe.
4 Pfulo ya miḓi ine na ḓo i ṋea Vhalevi i vhe khubithi* dza 1 000 u bva kha luvhondo lwo monaho na muḓi.
5 Nnḓa ha muḓi nga thungo ya vhubvaḓuvha ni kale khubithi dza 2 000, thungo ya tshipembe ni kale khubithi dza 2 000, thungo ya vhukovhela ni kale khubithi dza 2 000, thungo ya devhula ni kale khubithi dza 2 000, muḓi u vhe vhukati. Yeneyi i ḓo vha pfulo ya miḓi yavho.
6 “Ni ṋee Vhalevi miḓi ya 6 ya vhushavhelo,+ hune muthu we a vhulaya muṅwe a ḓo shavhela hone,+ ni dovhe ni vha ṋee miṅwe miḓi ya 42.
7 Miḓi yoṱhe ine na ḓo i ṋea Vhalevi i ḓo vha 48, khathihi na pfulo+ yayo.
8 Miḓi ine na ḓo vha ṋea yone i ḓo bva kha mashango a Vhaisiraele.+ Kha tshigwada tshihulwane ni ḓo dzhia miḓi minzhi, kha tshigwada tshiṱuku ni ḓo dzhia miḓi miṱuku.+ Tshigwada tshiṅwe na tshiṅwe tshi ḓo ṋea Vhalevi miṅwe ya miḓi yatsho zwi tshi ya nga ifa ḽe tsha ḽi wana.”
9 Yehova a dovha a amba na Mushe a ri:
10 “Amba na Vhaisiraele u ri: ‘Ni khou wela Mulambo wa Yorodane na dzhena shangoni ḽa Kanana.+
11 Ni nange miḓi ine na nga kona u swika khayo ine ya ḓo shuma sa miḓi ya vhushavhelo hune muthu o vhulayaho muṅwe a songo ḓiimisela a ḓo shavhela hone.+
12 Yeneyo miḓi i ḓo shuma sa vhushavhelo kha inwi musi ni tshi shavha mulifhedzi wa malofha,+ uri muthu we a vhulaya a si vhulawe a sa athu u sengiswa phanḓa ha tshitshavha.+
13 Yeneyo miḓi ya rathi ya vhushavhelo ine wa ḓo i nanga i ḓo shuma zwenezwo.
14 Ni nange miḓi miraru thungo ino ya Yorodane,+ miṅwe miraru i vhe shangoni ḽa Kanana+ uri i shume sa miḓi ya vhushavhelo.
15 Yeneyo miḓi ya rathi i ḓo shuma sa vhushavhelo ha Vhaisiraele na ha vhatsinda+ vha re vhukati havho, uri ane a vhulaya muṅwe a songo ḓiimisela a shavhele henefho.+
16 “‘Fhedzi arali o mu rwa nga tsimbi a fa, ndi muvhulayi. Onoyo muvhulayi a vhulawe.+
17 Arali o mu rwa nga tombo ḽo eḓanaho u vhulaya a fa, ndi muvhulayi. Onoyo muvhulayi a vhulawe.
18 Arali o mu rwa nga thanda yo eḓanaho u vhulaya a fa, ndi muvhulayi. Onoyo muvhulayi a vhulawe.
19 “‘Mulifhedzi wa malofha ndi ene ane a fanela u vhulaya muvhulayi. Musi a tshi ṱangana na muvhulayi ndi ene ane a fanela u mu vhulaya.
20 Zwiṅwe hafhu, arali o fa ngauri o tou mu sukumedza nga nṱhani ha vengo kana o mu posa nga tshiṅwe tshithu a tshi khou ṱoḓa u mu vhulaya,*+
21 kana o mu rwa nga tshanḓa nga nṱhani ha vengo a fa, onoyo we a mu rwa a vhulawe. Ndi muvhulayi. Mulifhedzi wa malofha u ḓo vhulaya onoyo muvhulayi musi a tshi ṱangana nae.
22 “‘Arali o mu vhulaya a songo ḓiimisela, a songo mu sukumedza nga nṱhani ha vengo kana a songo mu posa nga tshiṅwe tshithu uri a mu vhulaye,*+
23 kana o mu rwa nga tombo a songo mu vhona ngeno hu si na vhuswina kana o vha a sa khou ṱoḓa u mu huvhadza, onoyo muthu a fa,
24 tshitshavha tshi fanela u haṱula vhukati ha muvhulayi na mulifhedzi wa malofha u tendelana na yeneyi khaṱhulo.+
25 Tshitshavha tshi tshidze onoyo muvhulayi zwanḓani zwa mulifhedzi wa malofha, tshi mu vhuyedzedze ngei muḓini wa vhushavhelo he a vha o shavhela hone, a dzule henefho u swika tshifhe muhulu we a ḓodzwa nga mapfura makhethwa+ a tshi fa.
26 “‘Arali onoyo muvhulayi a bvela nnḓa ha muḓi wawe wa vhushavhelo he a shavhela hone,
27 mulifhedzi wa malofha a mu wana nnḓa ha mukano wa muḓi wawe wa vhushavhelo, a vhulaya onoyo muvhulayi, mulifhedzi ha na mulandu wa malofha.
28 Ngauri muvhulayi u tea u dzula muḓini wawe wa vhushavhelo u swika tshifhe muhulu a tshi fa. Fhedzi musi tshifhe muhulu o no fa, a nga vhuyelela shangoni ḽa hawe.+
29 Zwenezwo zwi ḓo shuma sa maitele a u haṱula kha mirafho yaṋu yoṱhe fhethu hoṱhe hune na dzula hone.
30 “‘Ane a vhulaya+ muthu, a vhulawe arali hu na dziṱhanzi;+ fhedzi a hu na ane a ḓo vhulawa arali hu na ṱhanzi nthihi fhedzi.
31 A no ngo tea u dzhia tshirengululi ni tshi itela vhutshilo ha muvhulayi o tewaho nga u fa, ngauri u fanela u vhulawa.+
32 A no ngo tea u dzhia tshirengululi tsha we a shavhela muḓini wawe wa vhushavhelo, na mu tendela a tshi vhuyelela shangoni ḽa hawe tshifhe muhulu a sa athu u fa.
33 “‘Ni songo tshikafhadza shango ḽine na dzula khaḽo, ngauri malofha a a tshikafhadza shango,+ a hu nga ḓo vha na tshipfumelelo hu tshi itelwa malofha e a shululwa shangoni, nga nnḓa ha malofha a onoyo we a a shulula.+
34 A no ngo tea u tshikafhadza shango ḽine na dzula khaḽo, ḽine nda dzula khaḽo; ngauri nṋe Yehova ndi dzula vhukati ha vhathu vha Isiraele.’”+
Ṱhaluso dzi re magumoni a siaṱari
^ Khubithi nthihi i lingana na senthimithara dza 44,5. Sedzani Ṱhume. B14.
^ Thevhedz., “o tou mu lalela.”
^ Thevhedz., “a songo tou mu lalela.”
