Numeri 36:1-13
-
Mulayo u ambaho nga ha vhafumakadzi vha re na ifa vha ṱoḓaho u vhingwa (1-13)
36 Vharangaphanḓa vha miṱa vhane vha vha vhaḓuhulu vha Giḽiada murwa wa Maxiri+ murwa wa Manase wa miṱa ya vharwa vha Yosefa, vha ḓa vha amba na Mushe na vharangaphanḓa na ṱhoho dza miṱa ya Vhaisiraele.
2 Vha ri: “Yehova o laya muṋe washu uri a kovhe shango nga madeṅwa+ uri ḽi vhe ifa ḽa Vhaisiraele; muṋe wanga o laiwa nga Yehova uri a dzhie ifa ḽa Tselopahada wahashu, a ḽi ṋee vhananyana vhawe.+
3 Arali vha vhingwa nga vhanna vha bvaho kha luṅwe lushaka lwa Vhaisiraele, ifa ḽa vhenevho vhafumakadzi ḽi ḓo bviswa kha ifa ḽa vhokhotsi ashu, ḽa ṱanganyiswa na ifa ḽa lushaka lune vha ḓo vhingwa khalwo uri ḽi bviswe nga madeṅwa kha ifa ḽashu.
4 Nga Ṅwaha wa Mbofholowo+ wa vhathu vha Isiraele, ifa ḽa vhenevho vhafumakadzi ḽi ḓo dovha ḽa ṱanganyiswa na ifa ḽa lushaka lune vha ḓo vhingwa khalwo, uri ifa ḽi bve kha ifa ḽa lushaka lwa vhokhotsi ashu.”
5 Mushe a vhudza Vhaisiraele zwe a laiwa nga Yehova a ri: “Lushaka lwa vharwa vha Yosefa lu khou amba zwone.
6 Hezwi ndi zwe Yehova a zwi amba nga ha vhananyana vha Tselopahada a ri: ‘Vha nga vhingwa nga muthu naho e ufhio ane vha mu funa. Naho zwo ralo, vha vhingwe nga muthu a bvaho kha muṱa wa lushaka lwa khotsi avho.
7 Ifa ḽa Vhaisiraele a ḽo ngo fanela u bva kha luṅwe lushaka ḽa ya kha luṅwe, ngauri Vhaisiraele vha fanela u farelela kha ifa ḽa lushaka lwa vhomakhulukuku wavho.
8 Ṅwananyana ane a wana ifa kha lushaka lwa Isiraele a vhe mufumakadzi wa muḓuhulu wa lushaka+ lwa khotsi awe uri Vhaisiraele vha dzule vhe na ifa ḽa vhomakhulukuku wavho.
9 Ifa a ḽo ngo fanela u bva kha luṅwe lushaka ḽa ya kha luṅwe, ngauri tshaka dza Vhaisiraele dzi fanela u farelela kha ifa ḽadzo.’”
10 Vhananyana vha Tselopahada vha ita zwe Yehova a laya Mushe.+
11 Nga zwenezwo, Mahala, Thiritsa, Hogola, Milika na Noaxe vhananyana vha Tselopahada+ vha vhingwa nga vharwa vha vhakomana na vharathu vha khotsi avho.
12 Vha vha vhafumakadzi vha vhanna vha miṱa ya Manase murwa wa Yosefa uri ifa ḽavho ḽi dzule ḽi kha lushaka lwa muṱa wa khotsi avho.
13 Hedzi ndi dzindaela na mahaṱulele zwe Yehova a zwi ṋea Vhaisiraele a tshi shumisa Mushe ngei midavhini ya sogani ḽa Moaba tsini na Yorodane ngei Yeriko.+
