Numeri 5:1-31
5 Yehova a dovha a amba na Mushe a ri:
2 “Laya Vhaisiraele uri vha bvisele nnḓa ha madennde muthu a re na mapele+ na ane a rothisa luḓi+ na o ḓitshikafhadzaho nga u fara tshitumbu.+
3 Hu sa londwi uri ndi munna kana mufumakadzi, vha bviselwe nnḓa ha madennde, uri vha si tshikafhadze+ madennde a vhane nda dzula vhukati havho.”+
4 Vhaisiraele vha ita nga u ralo, vha vha bvisela nnḓa ha madennde. Vhaisiraele vha ita zwe Yehova a laedza Mushe.
5 Yehova a bvela phanḓa a tshi amba na Mushe a ri:
6 “Vhudza Vhaisiraele u ri: ‘Arali munna kana mufumakadzi a ita tshivhi nga u sa fhulufhedzea kha Yehova, onoyo muthu u na mulandu.+
7 A bule+ tshivhi tshe a tshi ita, a lifhe mulandu wawe nga vhuḓalo, a dovhe a engedze tshipiḓa tshithihi kha zwiṱanu tsha mutengo watsho;+ a lifhele we a mu khakhela.
8 Fhedzi arali o khakhelwaho a si na shaka ḽa tsini ḽine ḽa nga lifhelwa, hu fanela u lifhelwa Yehova, zwi ḓo vha zwa tshifhe, nga nnḓa ha thutha ya tshipfumelelo ine tshifhe a ḓo mu pfumelela ngayo.+
9 “‘Muṋeelo muṅwe na muṅwe mukhethwa+ u bvaho kha Vhaisiraele une wa ṋekedzwa tshifhe u vhe wawe.+
10 Zwithu zwikhethwa zwa muthu muṅwe na muṅwe zwi ḓo dzula zwi zwawe. Zwiṅwe na zwiṅwe zwine muthu a zwi ṋea tshifhe, zwi ḓo vha zwa tshifhe.’”
11 Yehova a bvela phanḓa a tshi amba na Mushe a ri:
12 “Amba na Vhaisiraele u ri: ‘Zwine zwa fanela u itwa arali mufumakadzi wa muṅwe munna o ita tshivhi a si fhulufhedzee,
13 o ita zwa vhudzekani na muṅwe munna,+ fhedzi munna wawe a si zwi ḓivhe zwi si bvele khagala, a ḓishata tshika fhedzi hu si na ṱhanzi yo mu vhonaho, a sa athu u wanedzwa:
14 Hu sa londwi uri munna wawe u na vivho, u sola u fhulufhedzea ha mufumakadzi wawe ngauri o ḓitshikafhadza kana onoyo munna e na vivho, a tshi sola u fhulufhedzea ha mufumakadzi wawe ngeno a songo ḓitshikafhadza,
15 onoyo munna a ise mufumakadzi wawe ha tshifhe. A dovhe a ise na tshifhiwa tsha onoyo mufumakadzi na tshipiḓa tshithihi kha zwa fumi tsha tshikalo tsha efa* tsha fuḽauru ya baḽi. A songo shela mapfura khayo kana zwioro zwitshena, ngauri ndi tshifhiwa tsha thoro tsha vivho, tshifhiwa tsha thoro tsha u mu humbudza vhukhakhi.
16 “‘Tshifhe a mu imise phanḓa ha Yehova.+
17 Tshifhe u ḓo dzhia maḓi makhethwa a re kha mudzio wa vumba, a kumba buse ḽi re fhasi ha dennde ḽikhethwa* a ḽi shela kha maḓi.
18 Tshifhe u ḓo imisa onoyo mufumakadzi phanḓa ha Yehova, a mu vhofholola mavhudzi, a vhea tshifhiwa tsha thoro kha zwanḓa zwawe uri zwi vhe tshihumbudzi, tshifhiwa tsha thoro tsha vivho,+ tshanḓa tsha tshifhe tshi fanela u vha tshi na maḓi a dungaho ane a ita uri a semiwe.+
19 “‘Tshifhe u ḓo anisa onoyo mufumakadzi nga u amba nae a ri: “Arali u songo ita zwa vhudzekani na muṅwe munna musi u tshi kha ḓi vha nga fhasi ha munna wau,+ wa ita tshivhi wa vha na tshika, u ḓo vha wo vhofholowa kha mvelelo dza haya maḓi a vhavhaho ane a ita uri u semiwe.
20 Fhedzi arali wo ita tshivhi musi u tshi kha ḓi vha nga fhasi ha munna wau nga u ḓitshikafhadza, wo ita zwa vhudzekani na muṅwe munna+ nga nnḓa ha munna wau—”
21 Tshifhe u ḓo ita uri onoyo mufumakadzi a ite muano une wa katela na u semiwa, tshifhe u ḓo amba na onoyo mufumakadzi a ri: “Ngavhe Yehova a tshi ita uri u vhe tsumbo ya u semiwa na musi vhathu vhahau vha tshi ana, samusi Yehova a tshi ita uri u si bebe na u ita uri thumbu yau i kukumuwe.
22 Eneo maḓi ane a ita uri muthu a semiwe a ḓo dzhena malani au a ita uri thumbu yau i kukumuwe, u si bebe.” Mufumakadzi u fanela u fhindula a ri: Amen! Amen!”*
23 “‘Tshifhe a ṅwale eneo masamba kha bugu, a i ṱanzwe nga maḓi a vhavhaho.
24 U ḓo ita uri onoyo mufumakadzi a nwe eneo maḓi a vhavhaho ane a ḓo ita uri a semiwe, eneo maḓi ane a ita uri a semiwe a dzhene khae a mu pfise vhuṱungu.
25 Tshifhe a dzhie tshifhiwa tsha thoro tsha vivho+ tshanḓani tsha onoyo mufumakadzi a dzungudzele phanḓa na murahu tshifhiwa tsha thoro phanḓa ha Yehova, a tshi vhee tsini na aḽeṱare.
26 Tshifhe u ḓo ṱusa tshifhiwa tsha thoro nga tshanḓa tshawe sa tshifhiwa tsha tshihumbudzi, a tshi dubisa kha aḽeṱare,+ nga murahu u ḓo nwisa onoyo mufumakadzi eneo maḓi.
27 Musi a tshi mu nwisa maḓi, arali onoyo mufumakadzi e na tshika a songo fhulufhedzea kha munna wawe, maḓi eneo ane a ita uri a semiwe a ḓo dzhena khae a mu pfisa vhuṱungu, onoyo mufumakadzi u ḓo semiwa kha vhathu vha hawe.
28 Naho zwo ralo, arali onoyo mufumakadzi a songo ḓitshikafhadza, o kuna, ha nga ḓo pfiswa vhuṱungu, u ḓo vhifha muvhilini a kona u beba vhana.
29 “‘Ndi wone mulayo wa vivho+ wa mufumakadzi ane a ita tshivhi a ḓitshikafhadza musi e nga fhasi ha munna wawe,
30 kana musi munna a tshi vha na vivho, a humbulela uri mufumakadzi wawe ha fhulufhedzei; a imise mufumakadzi wawe phanḓa ha Yehova, tshifhe a ite zwoṱhe zwine wonoyu mulayo wa amba.
31 Munna ha nga ḓo vha na mulandu, fhedzi mufumakadzi wawe u ḓo ḓifhindulela kha vhukhakhi hawe.’”
Ṱhaluso dzi re magumoni a siaṱari
^ Tshipiḓa tshithihi kha zwa fumi tsha efa tshi lingana na ḽithara dza 2,2. Sedzani Ṱhume. B14.
^ “Ndi dennde ḽa vhurabeli ḽine ḽa hwalea ḽe ḽa vha ḽi tshi shumiswa nga Vhaisiraele; nga zwiṅwe zwifhinga ḽo vha ḽi tshi vhidzwa ‘dennde ḽa muṱangano.’”
^ Kana “Nga zwi ralo! Nga zwi ralo!”
