Numeri 8:1-26
8 Yehova a amba na Mushe a ri:
2 “Amba na Aroni uri: ‘Tshifhinga tshoṱhe musi u tshi funga mbone, mbone dza sumbe dzi fanela u vhonetshela phanḓa ha tshiṱomambone.’”+
3 Aroni a ita zwenezwo: A funga mbone dzatsho henefho phanḓa ha tshiṱomambone,+ sa zwe Yehova a laedza Mushe.
4 Tshiṱomambone tsho vha tsho itwa nga heyi nḓila: Tsho vha tsho itwa nga musuku wo fulwaho; u bva kha tsinde ḽatsho u swika kha maluvha, tsho vha tsho tou fulwa.+ Tshiṱomambone tsho vha tsho itwa u ya nga bono+ ḽe Yehova a ḽi sumbedza Mushe.
5 Yehova a dovha a amba na Mushe a ri:
6 “Dzhia Vhalevi vha re vhukati ha Vhaisiraele, u vha kunakise.+
7 U vha kunakise nga heyi nḓila: U vha shashe nga maḓi a ṱanzwaho tshivhi, vha ḓivheule nga tshireza muvhili woṱhe, vha kuvhe zwiambaro zwavho, vha ṱambe.+
8 Vha dzhie mbohwana+ na tshifhiwa tshayo tsha thoro+ tsha fuḽauru tsekene yo ṱanganyiswaho na mapfura, iwe u dzhie na iṅwe mbohwana ya tshifhiwa tsha u pfumelela tshivhi.+
9 U imise Vhalevi phanḓa ha dennde ḽa muṱangano, u kuvhanganye na tshitshavha tshoṱhe tsha Vhaisiraele.+
10 Musi u tshi isa Vhalevi phanḓa ha Yehova, Vhaisiraele vha vhee zwanḓa zwavho kha Vhalevi.+
11 Aroni a ṋekedze* Vhalevi kha Yehova sa tshifhiwa tsha u dzungudzwa+ tshi bvaho kha Vhaisiraele, uri vha shume mushumo wa Yehova.+
12 “Vhalevi vha ḓo vhea zwanḓa zwavho kha ṱhoho dza mboho.+ Iṅwe vha ḓo i ṋekedza sa tshifhiwa tsha u pfumelela tshivhi, iṅwe sa tshifhiwa tshi fhiselwaho Yehova u itela u pfumelela+ Vhalevi.
13 U imise Vhalevi phanḓa ha Aroni na vharwa vhawe, u vha ṋekedze* kha Yehova sa tshifhiwa tsha u dzungudzwa.
14 U khethe Vhalevi vhukati ha Vhaisiraele, Vhalevi vha ḓo vha vhanga.+
15 Nga murahu Vhalevi vha ḓo ḓa vha shuma denndeni ḽa muṱangano. Heyi ndi yone nḓila ine wa fanela u vha kunakisa ngayo na u vha ṋekedza* sa tshifhiwa tsha u dzungudzwa.
16 Ngauri vho kumedzwa nṋe vhukati ha Vhaisiraele. Vhudzuloni ha matanzhe oṱhe a Vhaisiraele,+ ndi ḓo vha ita vhanga.
17 Ngauri tanzhe ḽiṅwe na ḽiṅwe ḽa Vhaisiraele ndi ḽanga, ḽa vhathu na ḽa zwifuwo.+ Nga ḓuvha ḽe nda vhulaya matanzhe oṱhe a shangoni ḽa Egipita ndo ḓikhethela vhone.+
18 Ndi ḓo dzhia Vhalevi vhudzuloni ha matanzhe oṱhe a Vhaisiraele.
19 Ndi ḓo kumedzela Vhalevi kha Aroni na vharwa vhawe vhukati ha Vhaisiraele, uri vha shumele Vhaisiraele denndeni ḽa muṱangano+ uri vha pfumelele Vhaisiraele, uri Vhaisiraele vha si welwe nga khombo+ nge vhathu vha Isiraele vha sendela tsini na fhethu hukhethwa.”
20 Mushe na Aroni na tshitshavha tshoṱhe tsha Vhaisiraele tsha ita zwenezwi kha Vhalevi. Vhaisiraele vha ita zwoṱhe zwe Yehova a laedza Mushe nga ha Vhalevi.
21 Vhalevi vha ḓikunakisa vha kuvha zwiambaro zwavho,+ Aroni a vha ṋekedza* sa tshifhiwa tsha u dzungudzwa phanḓa ha Yehova.+ Nga murahu, Aroni a vha itela tshipfumelelo tsha u vha kunakisa.+
22 Nga murahu ha zwenezwo, Vhalevi vha ya vha shuma mushumo wavho denndeni ḽa muṱangano phanḓa ha Aroni na vharwa vhawe. Vha ita zwe Yehova a laedza Mushe nga ha Vhalevi.
23 Yehova a amba na Mushe a ri:
24 “Hezwi zwi shuma kha Vhalevi: U bva kha munna a re na miṅwaha ya 25 u ya nṱha, u ḓo vha muṅwe wa tshigwada tsha vhane vha shuma denndeni ḽa muṱangano.
25 Musi o no pfuka miṅwaha ya 50 u ḓo ṱutshela tshenetsho tshigwada, a si tsha shuma.
26 A nga shumela vhahawe vhane vha ṱhogomela dennde ḽa muṱangano, fhedzi ho ngo tea u shuma henefho. Hezwi ndi zwine wa fanela u zwi ita kha Vhalevi na vhuḓifhinduleli havho.”+
Ṱhaluso dzi re magumoni a siaṱari
^ Thevhedz., “dzungudze,” zwine zwa vha u isa phanḓa na murahu.
^ Thevhedz., “dzungudze,” zwine zwa vha u isa phanḓa na murahu.
^ Thevhedz., “dzungudza,” zwine zwa vha u isa phanḓa na murahu.
^ Thevhedz., “dzungudza,” zwine zwa vha u isa phanḓa na murahu.