Numeri 9:1-23
9 Yehova a amba na Mushe ngei sogani ḽa Sinai nga ṅwedzi wa u thoma+ nga ṅwaha wa vhuvhili musi vho no bva shangoni ḽa Egipita, a ri:
2 “Vhaisiraele vha lugiselele tshiṱhavhelo tsha Paseka+ nga tshifhinga tsho vhewaho.+
3 Nga ḓuvha ḽa vhu 14 ḽa wonoyo ṅwedzi nga madekwana* ni i lugiselele nga tshifhinga tshayo tsho vhewaho. Ni i lugiselele u ya nga milayo yayo yoṱhe na maitele ayo oṱhe o vhewaho.”+
4 Ngauralo, Mushe a vhudza Vhaisiraele uri vha lugiselele tshiṱhavhelo tsha Paseka.
5 Vha lugiselela tshiṱhavhelo tsha Paseka nga ṅwedzi wa u thoma, nga ḓuvha ḽa vhu 14 ḽa ṅwedzi nga madekwana,* ngei sogani ḽa Sinai. Vhaisiraele vha ita zwoṱhe zwe Yehova a laya Mushe.
6 Ho vha hu na vhaṅwe vhanna vhe vha ḓitshikafhadza nga u kwama tshitumbu,+ zwa ita uri vha si kone u lugiselela tshiṱhavhelo tsha Paseka nga ḽeneḽo ḓuvha. Nga zwenezwo, vhenevho vhanna vha ya ha Mushe na Aroni nga ḽeneḽo ḓuvha+
7 vha ri: “Ro ḓitshikafhadza nga u kwama tshitumbu. Ndi ngani ri tshi thivhelwa u ṋekedza Yehova tshifhiwa nga tshifhinga tsho vhewaho na vhaṅwe Vhaisiraele?”+
8 Mushe a tshi pfa zwenezwo a amba navho a ri: “Imani henefho, ndi thome ndi pfe zwine Yehova a ḓo zwi amba nga ha inwi.”+
9 Yehova a amba na Mushe a ri:
10 “Vhudza Vhaisiraele u ri: ‘Naho muṅwe muthu kha inwi kana kha vhaḓuhulu vhaṋu a ḓitshikafhadza nga tshitumbu+ kana e kule o fara lwendo, u tea u lugiselela Yehova tshiṱhavhelo tsha Paseka.
11 Vha i lugiselele nga ṅwedzi wa vhuvhili,+ nga ḓuvha ḽa vhu 14 nga madekwana.* Vha i ḽe na vhurotho vhu si na mbiliso na miroho i vhavhaho.+
12 A vho ngo tea u sia iṅwe ḽa vhuya ḽa tsha,+ a vho ngo fanela u vunḓa rambo ḽayo.+ Vha i lugiselele u ya nga milayo yoṱhe i tshimbidzanaho na Paseka.
13 Fhedzi arali muthu a si na tshika kana a songo fara lwendo, a litsha u lugiselela tshiṱhavhelo tsha Paseka, onoyo muthu u tea u vhulawa+ ngauri ho ngo isa tshifhiwa tsha Yehova nga tshifhinga tsho vhewaho. Onoyo muthu u ḓo ḓifhindulela kha tshivhi tshawe.
14 “‘Arali mutsinda a tshi khou dzula na inwi, na ene u fanela u lugiselela Yehova tshiṱhavhelo tsha Paseka.+ A ite nga u ralo u ya nga milayo ya Paseka na maitele ayo o vhewaho.+ Hu vhe na mulayo muthihi kha inwi une wa shuma kha mutsinda na kha mudzulapo.’”+
15 Nga ḓuvha ḽe ha athiwa dennde ḽikhethwa+ ḽi re na mbulungelo ya mulanga ḽo tibedzwa nga gole, fhedzi vhusiku ho vha hu tshi vhonala u nga hu na mulilo nṱha ha dennde ḽikhethwa u swika nga matsheloni.+
16 Tshifhinga tshoṱhe ho vha hu tshi itea hezwi: Gole ḽo vha ḽi tshi i tibedza nga masiari, vhusiku hu tshi vhonala u nga hu na mulilo.+
17 Tshifhinga tshoṱhe musi gole ḽi tshi takuwa kha dennde, Vhaisiraele vho vha vha tshi fanela u takuwa nga u ṱavhanya,+ fhethu hune gole ḽa ima hone, ho vha hu hone he Vhaisiraele vha vha vha tshi atha hone madennde.+
18 Vhaisiraele vho vha vha tshi takuwa musi vho vhudzwa nga Yehova, vho vha vha tshi atha madennde musi vho vhudzwa nga Yehova.+ Musi gole ḽi tshi kha ḓi vha nṱha ha dennde ḽikhethwa, vho vha vha sa takuwi.
19 Musi gole ḽi nṱha ha dennde ḽikhethwa lwa maḓuvha manzhi, Vhaisiraele vho vha vha tshi thetshelesa Yehova, vha sa takuwi.+
20 Nga zwiṅwe zwifhinga gole ḽo vha ḽi tshi fhedza maḓuvha a si gathi ḽi nṱha ha dennde ḽikhethwa. Vho vha vha sa athululi madennde arali Yehova a songo vha vhudza tshithu, vho vha vha tshi takuwa musi vho vhudzwa nga Yehova.
21 Nga zwiṅwe zwifhinga gole ḽo vha ḽi tshi dzula henefho u bva nga madekwana u swika nga matsheloni, musi gole ḽi tshi takuwa nga matsheloni vho vha vha tshi takuwa. Vho vha vha tshi takuwa musi gole ḽi tshi takuwa, hu sa londwi uri ndi nga masiari kana ndi nga madekwana.+
22 Hu sa londwi uri gole ḽi dzula maḓuvha mavhili, ṅwedzi kana tshifhinga tshilapfu nṱha ha dennde ḽikhethwa, Vhaisiraele vho vha vha sa athululi madennde avho, vho vha vha sa ṱuwi. Fhedzi musi ḽi tshi takuwa, vho vha vha tshi takuwa.
23 Vho vha vha tshi atha madennde avho musi vha tshi vhudzwa nga Yehova, vha tshi takuwa musi vho vhudzwa nga Yehova. Vho vha vha tshi thetshelesa zwine Yehova a amba, vha tshi ita zwe Yehova a zwi amba a tshi shumisa Mushe.
Ṱhaluso dzi re magumoni a siaṱari
^ Thevhedz., “vhukati ha madekwana mavhili.”
^ Thevhedz., “vhukati ha madekwana mavhili.”
^ Thevhedz., “vhukati ha madekwana mavhili.”
