Nzumbululo I Yaho Kha Yohane 13:1-18
13 Ḽigweṋa ḽa ima muṱavhani wa lwanzhe ḽi sa dzinginyei.
Nda vhona tshivhanda+ tshi tshi bva lwanzheni,+ tshi na ṋanga dza fumi na ṱhoho dza sumbe, tshi na khare dza fumi kha ṋanga dzatsho, fhedzi kha ṱhoho dzatsho hu na madzina a semaho Mudzimu.
2 Tshivhanda tshe nda tshi vhona tsho vha tshi tshi fana na nngwe, tshi na milenzhe i fanaho na ya tshivhingwi na mulomo u fanaho na wa ndau. Ḽigweṋa+ ḽa ṋea tshivhanda nungo, khuluṋoni na maanḓa mahulu.+
3 Nda vhona iṅwe ya ṱhoho dzatsho yo vhaisala zwihulu, fhedzi yeneyo ṱhoho yo vhaisalaho zwihulu ya fhola,+ ḽifhasi ḽoṱhe ḽa tevhela tshivhanda ḽi tshi tshi takalela vhukuma.
4 Vha rabela ḽigweṋa ngauri ḽo ṋea tshivhanda maanḓa, vha rabela tshivhanda vha ri: “Ndi nnyi ane a nga tshivhanda, ndi nnyi ane a nga lwa natsho?”
5 Tshivhanda tsha ṋewa maanḓa a u zuwa na u sasaladza Mudzimu na u ita zwine tsha funa miṅwedzi ya 42.+
6 Tsha aṱama mulomo watsho tsha sema+ Mudzimu na dzina ḽawe na hune a dzula hone na vha re ṱaḓulu.+
7 Tsha tendelwa u lwa na vhakhethwa, tsha vha kunda,+ tsha ṋewa maanḓa a u vhusa vhathu vhoṱhe na ndimi* dzoṱhe na tshaka dzoṱhe.
8 Vhoṱhe vha dzulaho kha ḽifhasi vha ḓo tshi rabela. U bva tshee shango ḽa sikwa, madzina avho ho ngo ṅwaliwa kha mupombo wa vhutshilo+ wa Ngwana yo ṱhavhiwaho.+
9 A re na nḓevhe nga a pfe.+
10 O tewaho nga u thubiwa, u ḓo thubiwa. A vhulayaho nga banga, u ḓo vhulawa nga banga.+ Ndi ngazwo vhakhethwa+ vha tshi fanela u konḓelela+ na u vha na lutendo.+
11 Nda vhona tshiṅwe tshivhanda tshi tshi bva kha ḽifhasi, tshi na ṋanga mbili dzi ngaho dza ngwana, tsha thoma u amba sa ḽigweṋa.+
12 Tsha shumisa maanḓa oṱhe a tshivhanda tsha u thoma,+ tshivhanda tsha u thoma tsho lavhelesa. Tsha ita uri ḽifhasi na vho dzulaho khaḽo vha rabele tshivhanda tsha u thoma, tshe ṱhoho yatsho yo vhaisalaho zwihulu ya fhola.+
13 Tsha ita vhuṱolo* vhuhulu, tsha ita uri mulilo u wele kha ḽifhasi u tshi bva ṱaḓulu vhathu vha tshi zwi vhona.
14 Tsha xedza vho dzulaho kha ḽifhasi nga vhuṱolo* he tsha tendelwa u vhu ita, tshivhanda tshi tshi zwi vhona, ngeno tshi tshi vhudza vho dzulaho kha ḽifhasi uri vha ite tshifanyiso+ tsha tshivhanda tshe ṱhoho yatsho yo vhaisalaho zwihulu ya fhola.+
15 Tsho tendelwa u vhudzulela mufemo kha tshifanyiso tsha tshivhanda uri tshi tshile, tshi kone u amba na u ita uri hu vhulawe vhoṱhe vha hanaho u rabela tshifanyiso tsha tshivhanda.
16 Tshi kombetshedza vhathu vhoṱhe, vhaṱuku na vhahulwane, vhapfumi na vhashai, vhalanda na vha si vhalanda, uri vha swaiwe kha tshanḓa tsha u ḽa kana kha phanḓa dzavho,+
17 uri hu si vhe na ane a renga kana u rengisa arali e si na luswayo, lune lwa vha dzina+ ḽa tshivhanda kana nomboro i tshimbidzanaho na dzina ḽatsho.+
18 A re na ṱhalukanyo nga a vhale nomboro dza tshivhanda, ngauri ndi nomboro ya muthu, yeneyo nomboro ndi 666.+ Zwenezwi zwi nga pfeseswa fhedzi nga o ṱalifhaho.