Nzumbululo I Yaho Kha Yohane 19:1-21
19 Nga murahu ha zwenezwi, nda pfa zwine zwa nga ipfi ḽa gogo ḽihulu ngei ṱaḓulu. Ḽa ri: “Rendani Yehova!*+ U tshidzwa na vhugala na maanḓa ndi zwa Mudzimu washu,
2 ngauri khaṱhulo yawe ndi ya ngoho, yo luga.+ Ngauri o haṱula mufumakadzi ane a rengisa muvhili we a tshinya ḽifhasi nga u ḓifara luvhi nga zwa vhudzekani,* o lifhedzela malofha a vhalanda vhawe a re zwanḓani zwa onoyo mufumakadzi.”+
3 Nga u ṱavhanya ḽa amba lwa vhuvhili ḽa ri: “Rendani Yehova!*+ Vhutsi vhu bvaho kha onoyo mufumakadzi vhu duba lini na lini.”+
4 Vhahulwane vha 24+ na zwivhumbiwa zwiṋa zwi tshilaho+ vha gwadama vha rabela Mudzimu o dzulaho kha khuluṋoni, vha ri: “Amen! Rendani Yehova!”*+
5 Zwiṅwe hafhu, ha pfala ipfi kha khuluṋoni ḽi tshi ri: “Rendani Mudzimu washu, inwi vhalanda vhawe noṱhe,+ vhane na mu ofha, vha vhuimo ha fhasi na ha nṱha.”+
6 Nda pfa zwi ngaho ipfi ḽa gogo ḽihulu na ḽi ngaho muungo wa maḓi manzhi na ḽi ngaho mibvumo mihulu. Ḽa ri: “Rendani Yehova,*+ ngauri Yehova* Mudzimu washu, Ramaanḓaoṱhe,+ o thoma u vhusa.+
7 Kha ri takale ri pembele ri mu ṋee vhugala, ngauri mbingano ya Ngwana yo swika, mufumakadzi wayo o ḓilugisa.
8 O tendelwa u ambara zwiambaro zwa labi ḽa ḽinene ḽi penyaho, ḽo kunaho, ḽavhuḓi, ngauri ḽeneḽo labi ḽi imela mishumo yo lugaho ya vhakhethwa.”+
9 A amba na nṋe a ri, “Ṅwala uri: Hu takala vho rambiwaho munyanyani wa Ngwana.”+ A dovha a ri: “Enea ndi maipfi a ngoho a Mudzimu.”
10 Ndi tshi pfa zwenezwo nda gwadama phanḓa hawe uri ndi mu rabele. Fhedzi ene a ri: “U songo ita nga u ralo!+ Na nṋe ndi mulanda u fana na iwe na vhahau vha re na mushumo wa u huwelela nga ha Yesu.+ Rabela Mudzimu+ ngauri vhuporofita ho itelwa u amba ngoho nga ha Yesu.”+
11 Nda vhona ḽiṱaḓulu ḽi tshi vulea, nda vhona bere tshena.+ We a vha o i ṋamela a tshi pfi A Fhulufhedzeaho+ na Wa Ngoho,+ onoyo u haṱula na u lwa nndwa yo lugaho.+
12 Maṱo awe o vha a tshi nga mulilo,+ e na khare nnzhi ṱhohoni yawe. O ṅwaliwa dzina ḽine hu si vhe na ane a ḽi ḓivha, fhedzi ḽi ḓivhiwa nga ene muṋe,
13 o ambara tshiambaro tshi re na malofha,* u vhidzwa u pfi Ipfi+ ḽa Mudzimu.
14 Zwiṅwe hafhu, o vha a tshi khou tevhelwa nga mavhuthu a ṱaḓulu o ṋamelaho bere tshena, o ambara zwiambaro zwitshena zwa labi ḽa ḽinene, zwo kunaho, zwavhuḓi.
15 Mulomoni wawe hu tshi bva banga ḽilapfu ḽi re na vhuhali,+ uri a kone u vhulaya dzitshaka ngaḽo, u ḓo dzi lisa nga lubaḓa lwa tsimbi.+ Zwiṅwe hafhu, u sukekanya nḓirivhe fhethu hune dza sukiwa hone, hune ha imela mbiti dza Mudzimu Ramaanḓaoṱhe.+
16 Kha tshiambaro tshawe tsini na tshirumbi, ho vha ho ṅwaliwa u pfi, Khosi ya mahosi na Murena wa marena.+
17 Nda dovha nda vhona muruṅwa o ima kha ḓuvha, a vhidzelela, a amba na zwiṋoni zwoṱhe zwe zwa vha zwi tshi khou fhufha makoleni* a ri: “Iḓani ngeno ni kuvhanganele tshilalelo tshihulu tsha Mudzimu,+
18 ni ḽe ṋama ya mahosi, ya vhalangammbi, ya vhanna vha re na maanḓa,+ ya bere, ya vhaṋameli vhadzo,+ ya vhoṱhe vha si vhalanda, ya vhalanda na ya vha vhuimo ha fhasi na ha nṱha.”
19 Nda vhona tshivhanda na mahosi a ḽifhasi na mmbi dzavho vho kuvhangana uri vha lwe na o ṋamelaho bere na mmbi yawe.+
20 Tshivhanda tsha farwa na muporofita wa u zwifha+ we a vha a tshi ita vhuṱolo phanḓa hatsho, a tshi xedza vha re na luswayo lwa tshivhanda+ na vhane vha rabela tshifanyiso tshatsho.+ Vha poswa vhoṱhe vha tshi kha ḓi tshila dzivhani ḽa mulilo ḽi dugaho tsevhela.+
21 Fhedzi vhaṅwe vhoṱhe vha vhulawa nga banga ḽilapfu ḽi bvaho mulomoni wa o ṋamelaho bere.+ Zwiṋoni zwoṱhe zwa fura nga ṋama dzavho.+
Ṱhaluso dzi re magumoni a siaṱari
^ Kana “Haleluya!”
^ Nga Tshigerika ndi porneia. Sedzani Mutevhe Wa Ṱhalutshedzo Ya Maipfi.
^ Kana “Haleluya!”
^ Kana “Haleluya!”
^ Kana “Haleluya!”
^ Kana khamusi, “tshiambaro tsho shashiwaho malofha.”
^ Kana “tshikhalani.”
