Nzumbululo I Yaho Kha Yohane 22:1-21
22 A ntsumbedza mulambo wa maḓi a vhutshilo,+ u vhonadzaho sa khristaḽa, u tshi elela u tshi bva kha khuluṋoni ya Mudzimu na ya Ngwana,+
2 u tshi fhira nga vhukati ha nḓila khulu ya muḓi. Thungo dzoṱhe dza mulambo hu na miri ya vhutshilo i aṋwaho mitshelo lwa 12 ṅwaha muṅwe na muṅwe. Maṱari ayo o itelwa u fhodza dzitshaka.+
3 A hu tsha ḓo vha na tsho semiwaho. Fhedzi khuluṋoni ya Mudzimu na ya Ngwana+ dzi ḓo vha kha wonoyo muḓi, vhalanda vhawe vha ḓo mu itela mishumo mikhethwa;
4 vha ḓo vhona tshifhaṱuwo tshawe,+ dzina ḽawe ḽi ḓo vha kha phanḓa dzavho.+
5 Zwiṅwe hafhu, a ḽi tsha ḓo kovhela,+ a vha nga ṱoḓi luvhone kana tshedza tsha ḓuvha ngauri Yehova* Mudzimu u ḓo vha vhonetshela,+ vha ḓo vhusa lini na lini.+
6 A amba na nṋe a ri: “Haya maipfi ndi ngoho, a a fhulufhedzea;+ Yehova* Mudzimu we a hevhedza vhaporofita+ o rumela muruṅwa wawe uri a sumbedze vhalanda vhawe zwine zwa ḓo itea hu si kale.
7 Ndi khou ḓa nga u ṱavhanya.+ Hu takala ane a tevhedza maipfi a vhuporofita ha hoyu mupombo.”+
8 Ndi nṋe Yohane we a pfa na u vhona zwenezwi zwithu. Musi ndi tshi zwi pfa na u zwi vhona, nda gwadama uri ndi rabele muruṅwa we a ntsumbedza zwenezwi zwithu.
9 Fhedzi ene a ri: “U songo ita nga u ralo! Na nṋe ndi mulanda u fana na iwe na vhahau vha re vhaporofita na vhane vha tevhedza maipfi a hoyu mupombo. Rabela Mudzimu.”+
10 A dovha a ri: “Haya maipfi a vhuporofita ha hoyu mupombo u songo a ita tshiphiri, ngauri tshifhinga tsho vhewaho tshi tsini.
11 A songo lugaho a dzule a tshi ita zwi songo lugaho, a re na vhuyaḓa a dzule e na vhuyaḓa; fhedzi o lugaho a dzule a tshi ita zwo lugaho, na mukhethwa a dzule e mukhethwa.
12 “‘Ndi khou ḓa nga u ṱavhanya. Ndi ḓo lambedza muṅwe na muṅwe u ya nga mishumo yawe.+
13 Ndi nṋe Alfa na Omega,*+ wa u thoma na wa u fhedzisela, mathomo na magumo.
14 Hu takala vhane vha kuvha zwiambaro zwavho,+ uri vha kone u ḽa mitshelo ya miri ya vhutshilo+ na u dzhena muḓini nga khoro dzawo.+
15 Nnḓa ha muḓi hu wanala dzimmbwa,* vhane vha ita zwa vhungome, vhane vha ḓifara luvhi nga zwa vhudzekani,* vhavhulayi, vha gwadamelaho midzimu ya zwifanyiso na vhane vha funa mazwifhi na u dzula vha tshi zwifha.’+
16 “‘Nṋe Yesu ndo ruma muruṅwa wanga uri a ni ḓivhadze zwenezwi zwithu uri zwi vhuyedze zwivhidzo. Ndi nṋe mudzi na ṅwana wa Davida,+ ṋaledzi i penyaho nga matsheloni.’”+
17 Muya mukhethwa na muselwa+ zwi dzula zwi tshi ri: “Iḓa!” Na a zwi pfaho nga a ri: “Iḓa!” Na a re na ḓora nga a ḓe;+ ane a funa nga a dzhie maḓi a vhutshilo nga mahala.+
18 “Ndi khou ḓivhadza vhane vha pfa maipfi a vhuporofita ha hoyu mupombo ndi ri: Ane a engedza kha zwo ṅwaliwaho,+ Mudzimu u ḓo mu engedzela ṱhamu dzo ṅwaliwaho kha hoyu mupombo;+
19 ane a fhungudza maipfi a vhuporofita ha hoyu mupombo, Mudzimu ha nga tendi a tshi wana zwithu zwavhuḓi zwo ṅwaliwaho kha hoyu mupombo, ha nga mu tendeli a tshi ḽa mitshelo ya miri ya vhutshilo,+ ha nga mu tendeli a tshi dzhena muḓini mukhethwa.+
20 “Ane a ḓivhadza zwenezwi zwithu u ri, ‘Ndi khou ḓa nga u ṱavhanya.’”+
“Amen! Iḓa, Murena Yesu.”
21 Ngavhe Murena Yesu a tshi sumbedza vhakhethwa vhuthu vhuhulu.
Ṱhaluso dzi re magumoni a siaṱari
^ Kana “Ndi nṋe A na Z.” Alfa ndi ḽeḓere ḽa u thoma, Omega ndi ḽeḓere ḽa u fhedzisela kha maḽeḓere a Tshigerika.
^ Ndi vhane vha ita zwithu zwi nengisaho phanḓa ha Mudzimu.
^ Sedzani Mutevhe Wa Ṱhalutshedzo Ya Maipfi.
