Nzumbululo I Yaho Kha Yohane 4:1-11
4 Nga murahu ha zwenezwi, nda vhona vothi ḽi tshi vulea ṱaḓulu, ipfi ḽe nda thoma u ḽi pfa ḽi tshi khou amba na nṋe ḽo vha ḽi tshi nga phalaphala, ḽi tshi ri: “Gonya ngeno ndi u sumbedze zwithu zwine zwa fanela u itea.”
2 Nga murahu ha zwenezwi, muya wa Mudzimu wa ḓa kha nṋe nga u ṱavhanya, nda vhona khuluṋoni ṱaḓulu na o dzulaho khayo.+
3 Onoyo o dzulaho khayo o vha a tshi nga tombo ḽa yasipere+ na ḽa sadiasi,* u mona na khuluṋoni ho vha hu na musengavhadzimu une wa fana na emeralidi.+
4 U mona na yeneyo khuluṋoni ho vha hu na khuluṋoni dza 24, kha dzenedzo khuluṋoni nda vhona ho dzula vhahulwane vha 24+ vho ambara zwiambaro zwitshena, ṱhohoni dzavho vho ambara khare dza musuku.
5 Henefho kha khuluṋoni hu tshi khou bva lupenyo+ na maipfi na mibvumo;+ hu na mbone dza sumbe dzi tshi khou duga phanḓa ha khuluṋoni, dzi imelaho mimuya ya sumbe ya Mudzimu.+
6 Phanḓa ha khuluṋoni ho vha hu na tshithu tshi ngaho lwanzhe lu penyaho+ sa ngilasi kana khristaḽa.
Vhukati ha khuluṋoni na u mona nayo hu na zwivhumbiwa zwiṋa zwi tshilaho+ zwo ḓalaho maṱo nga phanḓa na nga murahu.
7 Tshivhumbiwa tshi tshilaho tsha u thoma tshi tshi nga ndau,+ tsha vhuvhili tshi tshi nga mboho,+ tsha vhuraru+ tshi na tshifhaṱuwo tshi ngaho tsha muthu, tsha vhuṋa+ tshi tshi nga goni.+
8 Zwenezwi zwivhumbiwa zwiṋa zwi tshilaho zwi na phapha dza rathi; dzi na maṱo nga nnḓa na nga ngomu.+ Vhusiku na masiari, zwi dzula zwi tshi ri: “Mukhethwa, mukhethwa, mukhethwa ndi Yehova*+ Mudzimu, Ramaanḓaoṱhe, we a vha e hone, a re hone na ane a khou ḓa.”+
9 Musi zwivhumbiwa zwi tshilaho zwi tshi ṋea vhugala na u hulisa na u livhuwa Mudzimu o dzulaho kha khuluṋoni, ane a tshila lini na lini,+
10 vhahulwane vha 24+ vha gwadama phanḓa ha Mudzimu o dzulaho kha khuluṋoni na u mu rabela ngauri u tshila lini na lini, vha bvula khare dzavho vha dzi vhea phanḓa ha khuluṋoni, vha ri:
11 “Iwe Yehova* Mudzimu wa maanḓa,+ wo fanelwa nga vhugala+ na u huliswa,+ ngauri wo sika zwithu zwoṱhe,+ zwo vha hone na u sikwa nge wa zwi funa.”
Ṱhaluso dzi re magumoni a siaṱari
^ Kana “na tombo ḽitswuku ḽa mutengo muhulu.”
