Nzumbululo I Yaho Kha Yohane 7:1-17
7 Nga murahu ha zwenezwi, nda vhona vharuṅwa vhaṋa vho ima thungo nṋa dza ḽifhasi, vho fara mimuya miṋa ya ḽifhasi, uri i si vhudzule ḽifhasi kana lwanzhe kana miri.
2 Nda vhona muṅwe muruṅwa a tshi khou gonya a tshi bva vhubvaḓuvha, e na luswayo lwa Mudzimu a tshilaho; a vhidzelela vharuṅwa vhaṋa vho tendelwaho u tshinyadza ḽifhasi na lwanzhe,
3 a ri: “Ni songo tshinyadza ḽifhasi kana lwanzhe kana miri, u swikela ri tshi swaya+ vhalanda vha Mudzimu washu kha phanḓa dzavho.”+
4 Nda pfa uri tshivhalo tsha vho swaiwaho ndi 144 000,+ vhenevho vha bva kha tshaka dzoṱhe dza vharwa vha Isiraele:+
5 Kha lushaka lwa Yuda ho swaiwa vha 12 000;kha lushaka lwa Rubeni ndi vha 12 000;kha lushaka lwa Gada ndi vha 12 000;
6 kha lushaka lwa Ashere ndi vha 12 000;kha lushaka lwa Nafutali ndi vha 12 000;kha lushaka lwa Manase+ ndi vha 12 000;
7 kha lushaka lwa Simioni ndi vha 12 000;kha lushaka lwa Levi ndi vha 12 000;kha lushaka lwa Isashari ndi vha 12 000;
8 kha lushaka lwa Sebuloni ndi vha 12 000;kha lushaka lwa Yosefa ndi vha 12 000;kha lushaka lwa Benyamini ho swaiwa vha 12 000.
9 Nga murahu ha zwenezwi, nda vhona gogo ḽihulu, ḽi sa vhalei, ḽi bvaho kha tshaka dzoṱhe na ndimi*+ dzoṱhe, ḽo ima phanḓa ha Ngwana na phanḓa ha khuluṋoni, ḽo ambara zwiambaro zwitshena;+ ḽo fara matavhi a mitshevho.+
10 Ḽi dzula ḽi tshi vhidzelela ḽi tshi ri: “U tshidzwa hu bva kha Ngwana+ na kha Mudzimu washu o dzulaho kha khuluṋoni.”+
11 Vharuṅwa vhoṱhe vho imaho vho tanga khuluṋoni na vhahulwane+ na zwivhumbiwa zwiṋa zwi tshilaho, vha gwadama phanḓa ha khuluṋoni, vha rabela Mudzimu,
12 vha ri: “Amen! Mudzimu washu a re na vhuṱali, maanḓa na nungo nga a rendiwe, a ṋewe vhugala na u huliswa lini na lini.+ Amen.”
13 Muṅwe wa vhahulwane a amba na nṋe a ri: “Avha vho ambaraho zwiambaro zwitshena ndi vhonnyi,+ vha bva ngafhi?”
14 Nda mu fhindula nda ri: “Murena wanga, ndi iwe ane wa zwi ḓivha.” Ene a ri: “Vho bva maṱunguni mahulu,+ vho ṱanzwa zwiambaro zwavho vha zwi tshenisa nga malofha a Ngwana.+
15 Ndi ngazwo vho ima phanḓa ha khuluṋoni ya Mudzimu, vha tshi khou mu shumela masiari na vhusiku thembeleni yawe; Mudzimu o dzulaho kha khuluṋoni+ u ḓo vha tsireledza.*+
16 A vha tsha ḓo farwa nga nḓala na ḓora kana u fhiswa nga ḓuvha,+
17 ngauri Ngwana+ i re vhukati ha khuluṋoni, i ḓo vha lisa+ ya vha isa zwisimani zwa maḓi a vhutshilo.+ Mudzimu u ḓo phumula miṱodzi yoṱhe maṱoni avho.”+