Sakaria 1:1-21
-
Vha humbelwa uri vha vhuyelele kha Yehova (1-6)
-
“Vhuyelelani kha nṋe na nṋe ndi ḓo vhuyelela kha inwi” (3)
-
-
Bono ḽa u thoma: Vhaṋameli vha bere vha re vhukati ha miri ya miṱhala (7-17)
-
“Yehova u ḓo dovha a khuthadza Tsioni” (17)
-
-
Bono ḽa vhuvhili: Maṋanga maṋa na vhanna vhaṋa vha re na vhutsila (18-21)
1 Nga ṅwedzi wa vhumalo nga ṅwaha wa vhuvhili hu tshi khou vhusa Dario,+ Yehova o amba na muporofita Sakaria*+ murwa wa Berekia murwa wa Ido, a ri:
2 “Yehova o sinyutshela zwihulu vhokhotsi aṋu.+
3 “U ye u vha vhudze uri nṋe Yehova wa mavhuthu ndo ri: ‘Ndi nṋe Yehova wa mavhuthu. Vhuyelelani kha nṋe na nṋe ndi ḓo vhuyelela kha inwi.’+ Zwo ambiwa nga nṋe Yehova wa mavhuthu.”
4 “‘Ni songo fana na vhokhotsi aṋu, vhe vhaporofita vha tshifhingani tsho fhiraho vha amba navho vha ri: “Yehova wa mavhuthu u ri, ‘Litshani nḓila dzaṋu mmbi na mishumo yaṋu mivhi.’”’+
“‘Fhedzi vha si thetshelese, vha si vhe na ndavha na nṋe,’+ u ralo Yehova.
5 “‘Zwino vhokhotsi aṋu vha ngafhi? Naa vhenevho vhaporofita vha kha ḓi tshila?
6 Vhokhotsi aṋu ndo vha vhudza milayo ine vha fanela u i tevhedza. Ndo rumela vhashumeli vhanga vha vhaporofita uri vha vha vhudze zwine zwa ḓo itea khavho arali vha sa tevhedza yeneyo milayo. Naa zwenezwo zwithu a zwo ngo itea khavho?’+ Vha vhuyelela kha nṋe, vha ri: ‘Yehova wa mavhuthu o ri ita zwo teaho nḓila dzashu na mishumo yashu, samusi o vha o ḓiimisela u zwi ita.’”+
7 Nga ḓuvha ḽa vhu 24 ḽa ṅwedzi wa vhu 11, une wa vha ṅwedzi wa Sebata,* nga ṅwaha wa vhuvhili hu tshi khou vhusa Dario,+ Yehova o ita uri nṋe muporofita Sakaria murwa wa Berekia murwa wa Ido, ndi vhone bono:
8 “Ho vha hu vhusiku. Nda vhona munna o ṋamela bere tswuku, o ima muedzini vhukati ha miri ya miṱhala; murahu hawe hu na bere tswuku, dza buraweni na tshena.”
9 Nda ri: “Murena wanga, ndi vhonnyi avha?”
Muruṅwa we a vha a tshi khou amba na nṋe, a mphindula a ri: “Ndi ḓo u sumbedza uri ndi vhonnyi.”
10 Munna we a vha o ima tsini na miri ya miṱhala a ri: “Havha ndi vhone vhe Yehova a vha ruma uri vha tshimbile vha tshi lavhelesa kha ḽifhasi.”
11 Vha amba na muruṅwa wa Yehova we a vha o ima vhukati ha miri ya miṱhala vha ri: “Ro tshimbila ri tshi lavhelesa kha ḽifhasi ḽoṱhe, ra wana ho dzika hu si na khakhathi.”+
12 Muruṅwa wa Yehova a ri: “Iwe Yehova wa mavhuthu, u ḓo khathutshela lini Yerusalema na miḓi ya Yuda+ ye wa i sinyutshela lwa miṅwaha ya 70?”+
13 Yehova a khuthadza na u fhindula zwavhuḓi onoyo muruṅwa we a vha a tshi khou amba na nṋe.
14 Onoyo muruṅwa a amba na nṋe a ri: “Vhidzelela uri, ‘Yehova wa mavhuthu u ri: “Ndi funa Yerusalema na Tsioni, ndi na ndavha navho.+
15 Ndo sinyutshela zwihulu tshaka dzo ḓigeḓaho.+ Ndo vha ndi tshi ṱoḓa u kaidzanyana vhathu vhanga,+ fhedzi vhathu vha dzenedzo tshaka vho tou ṋaṋisa vhuṱungu havho.”’+
16 “Nga zwenezwo, Yehova u ri: ‘“Ndi ḓo dovha nda khathutshela Yerusalema,+ nnḓu yanga i ḓo fhaṱiwa henefho,”+ u ralo Yehova wa mavhuthu, “hu ḓo kaliwa uri hu fhaṱululwe Yerusalema.”’+
17 “Dovha u vhidzelele u ri, ‘Yehova wa mavhuthu u ri: “Miḓi yanga i ḓo dovha ya ḓala zwivhuya; Yehova u ḓo dovha a khuthadza Tsioni,+ a dovha a nanga Yerusalema.”’”+
18 Nda lavhelesa nda vhona maṋanga maṋa.+
19 Nda vhudzisa muruṅwa we a vha a tshi khou amba na nṋe, nda ri: “Ndi mini izwi?” Ene a ri: “Haya ndi maṋanga e a balanganya Yuda,+ Isiraele+ na Yerusalema.”+
20 Ndi hone Yehova a tshi ntsumbedza vhanna vhaṋa vha re na vhutsila.
21 Nda ri: “Vhenevha vhanna vha khou ḓa u ita mini?”
A ri: “Haya ndi maṋanga e a balanganya Yuda lwe ha si vhe na ane a kona u lwa nao.* Vhenevha vhanna vha ḓo ḓa vha tshuwisa eneo maṋanga, vha fhelisa maṋanga a tshaka dze dza lwa na shango ḽa Yuda nga maṋanga adzo, dzi tshi itela u ḽi balanganya.”
Ṱhaluso dzi re magumoni a siaṱari
^ Zwine zwa amba uri “Yehova O Zwi Humbula.”
^ Sedzani Ṱhume. B15.
^ Thevhedz., “takusa ṱhoho.”
