Sakaria 4:1-14
4 Muruṅwa we a vha a tshi khou amba na nṋe a vhuya, a ḓa a mvusa, u fana na musi hu tshi vusiwa muthu we a vha o eḓela.
2 A amba na nṋe a ri: “U khou vhona mini?”
Nṋe nda ri: “Ndi khou vhona tshiṱomambone tsho itwaho nga musuku,+ tshi na tshigoḓelo nṱha hatsho. Tshenetshi tshiṱomambone tshi na mbone dza sumbe,+ dzo ṱomiwaho kha phaiphi dzatsho dza sumbe.
3 Tsini natsho hu na miri mivhili ya muṱwari,+ muṅwe u thungo ya tsha u ḽa ya tshigoḓelo, ngeno muṅwe u kha tsha monde.”
4 Nda vhudzisa muruṅwa we a vha a tshi khou amba na nṋe uri: “Murena wanga, zwenezwi zwithu zwi imela mini?”
5 Onoyo muruṅwa a mmbudzisa a ri: “Naa a u ḓivhi uri zwenezwi zwi imela mini?”
Nṋe nda ri: “A thi zwi ḓivhi, murena wanga.”
6 A dovha a amba na nṋe a ri: “Yehova o amba na Serubabele a ri: ‘“Zwenezwi zwithu zwoṱhe zwi ḓo itwa nga muya wanga,+ hu si nga mmbi kana nga maanḓa a muthu,”+ u ralo Yehova wa mavhuthu.
7 Iwe thavha khulu, u nnyi? Phanḓa ha Serubabele+ u ḓo vha mudavhi.+ Serubabele u ḓo vhea tombo ḽa u fhedzisela ḽa thembele, vhathu vha tshi khou vhidzelela vha tshi ri: “Ḽo naka! Ḽo naka!”’”
8 Yehova a dovha a amba na nṋe a ri:
9 “Ndi Serubabele we a ita mutheo wa heyi nnḓu,+ ndi ene ane a ḓo i fhedzisa.+ Ndi hone ni tshi ḓo ḓivha uri Yehova wa mavhuthu o nthuma kha inwi.
10 Hu songo vha na ane a nyadza ḓuvha ḽa musi zwi tshi thoma.*+ Ngauri vhathu vha ḓo takala musi vha tshi vhona Serubabele o fara tshishumiswa tsha u kala tshi re na luṱale.* Eneo maṱo a sumbe ane a khou lavhelesa ḽifhasi ḽoṱhe ndi a Yehova.”+
11 Nda mu vhudzisa nda ri: “Iyi miri mivhili ya miṱwari i re thungo ya tshanḓa tsha u ḽa na tsha monde tsha tshiṱomambone i imela mini?”+
12 Nda mu vhudzisa lwa vhuvhili nda ri: “Matavhi a miri mivhili ya miṱwari ane a khou shululela luḓi lwa muvhala wa musuku kha phaiphi mbili dzo itwaho nga musuku a imela mini?”
13 A mmbudzisa a ri: “Naa a u ḓivhi uri zwenezwi zwi imela mini?”
Nṋe nda ri: “A thi zwi ḓivhi, murena wanga.”
14 A ri: “Enea matavhi mavhili a imela vhaḓodzwa vhavhili vho imaho tsini na Murena wa ḽifhasi ḽoṱhe.”+
