Sakaria 8:1-23
8 Yehova wa mavhuthu o dovha a amba na nṋe a ri:
2 “Yehova wa mavhuthu u ri, ‘Ndi ḓo funa Tsioni,+ nda vha na ndavha nae.’”
3 “Yehova u ri, ‘Ndi ḓo vhuyelela Tsioni+ nda dzula Yerusalema;+ Yerusalema u ḓo vhidzwa muḓi wa ngoho,*+ thavha ya Yehova wa mavhuthu ya vhidzwa thavha khethwa.’”+
4 “Yehova wa mavhuthu u ri, ‘Vhakalaha na vhakegulu vha ḓo dovha vha dzula khoroni dza Yerusalema, muṅwe na muṅwe o fara thonga yawe nga nṱhani ha vhulala.+
5 Khoroni dza muḓi hu ḓo ḓala vhatukana na vhasidzana vha tshi khou tamba.’”+
6 “Yehova wa mavhuthu u ri, ‘Naho nga tshenetsho tshifhinga zwi tshi ḓo vhonala zwi tshi konḓa kha vho salaho, naa zwi nga konḓela na nṋe?’ u ralo Yehova wa mavhuthu.”
7 “Yehova wa mavhuthu u ri, ‘Ndi khou tshidza vhathu vhanga vha re mashangoni a vhubvaḓuvha na a vhukovhela.+
8 Ndi ḓo vha vhuisa vha dzula Yerusalema;+ vha vha vhathu vhanga, nṋe nda vha Mudzimu wavho+ wa ngoho* na wa u luga.’”
9 “Yehova wa mavhuthu u ri, ‘Ivhani na tshivhindi,+ inwi vhane na pfa zwine vhaporofita vha amba,+ zwenezwiḽa zwe zwa ambiwa musi hu tshi itiwa mutheo wa nnḓu ya Yehova wa mavhuthu uri hu fhaṱiwe thembele.
10 Ngauri musi zwenezwo zwi sa athu u itea, ho vha hu sa holelwi muthu kana tshivhanda;+ ho vha hu si na ane a dzhena kana u bva o vhofholowa nga nṱhani ha swina, ngauri ndo ita uri vhathu vhoṱhe vha lwe nga tshavho.’
11 “‘Fhedzi zwino vhathu vho salaho a thi nga vha fari nga nḓila ye nda fara ngayo vha tshifhingani tsho fhiraho,’+ u ralo Yehova wa mavhuthu.
12 ‘Ngauri mulalo u ḓo ṱavhiwa; munḓirivhe u ḓo aṋwa mitshelo na shango ḽa medza zwimela,+ ḽiṱaḓulu ḽi ḓo wisa ṅwando; ndi ḓo ita uri zwenezwi zwithu zwoṱhe zwi vhe ifa kha vho salaho.+
13 Inwi vha nnḓu ya Yuda na ya Isiraele, samusi no vha samba vhukati ha dzitshaka,+ ndi ḓo ni tshidza na vha phaṱhutshedzo.+ Ni songo ofha!+ Ivhani na tshivhindi.’+
14 “Yehova wa mavhuthu u ri, ‘“Samusi ndo vha ndo ḓiimisela u ni ḓisela khombo nge vhomakhulukuku waṋu vha ntsinyusa,” u ralo Yehova wa mavhuthu, “ndi si shandule muhumbulo,+
15 zwino ndo ḓiimisela u itela Yerusalema na vha nnḓu ya Yuda zwivhuya.+ Ni songo ofha!”’+
16 “‘Ni fanela u ita hezwi: Ni songo zwifhelana,+ nḓila ine na haṱula ngayo i vhe ya ngoho na u ita uri hu vhe na mulalo.+
17 Ni songo itelana vhukwila,+ ni songo funa miano ya mazwifhi;+ ngauri zwenezwi zwoṱhe ndi a zwi vhenga,’+ u ralo Yehova.”
18 Yehova wa mavhuthu a dovha a amba na nṋe a ri:
19 “Yehova wa mavhuthu u ri, ‘U ḓidzima zwiḽiwa nga ṅwedzi wa vhuṋa,+ nga ṅwedzi wa vhuṱanu,+ nga ṅwedzi wa vhusumbe+ na nga ṅwedzi wa vhufumi+ zwi ḓo vha zwiitea zwa u pembela na u takala zwa vha nnḓu ya Yuda, zwine zwa vha vhuṱambo ha u takala.+ Ngauralo, funani ngoho na mulalo.’
20 “Yehova wa mavhuthu u ri, ‘Zwi ḓo itea uri vhathu na vha dzulaho miḓini minzhi vha ḓe;
21 vha dzulaho kha muṅwe muḓi vha ḓo ya kha vha dzulaho kha muṅwe muḓi vha ri: “Kha ri ye u ṱoḓa Yehova wa mavhuthu, ri humbele uri Yehova a ri khathutshele. Na nṋe ndi khou ya.”+
22 Vhathu vhanzhi na vha tshaka dzi re na maanḓa vha ḓo ḓa Yerusalema vha ṱoḓa Yehova wa mavhuthu+ na u humbela uri Yehova a vha khathutshele.’
23 “Yehova wa mavhuthu u ri, ‘Nga tshenetsho tshifhinga vhathu vha fumi vhane vha bva kha tshaka dza nyambo dzoṱhe+ vha ḓo fara tshiambaro* tsha Muyuda,* vha ri: “Ri ṱoḓa u ṱuwa na iwe,+ ngauri ro zwi pfa uri Mudzimu u na inwi.”’”+
Ṱhaluso dzi re magumoni a siaṱari
^ Kana “u fhulufhedzea.”
^ Kana “ane a fhulufhedzea.”
^ Kana “lupendelo lwa tshiambaro.”
^ Thevhedz., “munna wa Muyuda.”
