Kha Tito 3:1-15
3 Bvela phanḓa u tshi vha humbudza uri vha ḓiṱukufhadze na uri vha thetshelese mivhuso na vhavhusi,+ vha dzule vho ḓilugiselela u ita mishumo yoṱhe yavhuḓi,
2 uri vha si ambe vhaṅwe luvhi, vha si hanedzane, fhedzi vha humbulele,+ vha sumbedze u vuḓa kha vhathu vhoṱhe.+
3 Ngauri na riṋe ro vha ri si na ṱhalukanyo, ri sa thetshelesi, ro xedzwa, ri phuli dza nyemulo na miḓifho yo fhambanaho, ri tshi ita vhuvhi, ri na vhutshivha, ri tshi nengisa na u vhengana.
4 Fhedzi Mudzimu ane a ri tshidza o ri sumbedza vhuthu+ na u ri funa.
5 O ri tshidza nge a ri khathutshela,+ hu si nga nṱhani ha mishumo yo lugaho ye ra i ita.+ O ri tshidza nga u ri kunakisa, zwe zwa ita uri ri tshile+ na u ita uri ri vhe vhaswa nga muya mukhethwa.+
6 O ri ṋea wonoyu muya nga vhunzhi* a tshi shumisa Yesu Kristo Mutshidzi washu,+
7 uri musi ro no dzhiiwa sa vho lugaho nga nṱhani ha vhuthu vhuhulu ha Mudzimu,+ ri vhe maḽaifa+ a re na fhulufhelo ḽa u tshila tshoṱhe.+
8 Zwenezwi ndi ngoho, ndi ṱoḓa uri u dzule u tshi amba nga hazwo, uri vhe vha tenda Mudzimu vha dzule vha tshi humbula u ita mishumo mivhuya. Hezwi zwithu ndi zwavhuḓi, zwi vhuyedza vhathu.
9 Fhedzi u songo ṱaṱa khani nga zwithu zwa vhutsilu na nga mutevhe wa lushaka na u ṱaṱa khani nga ha Mulayo, ngauri a zwi vhuyedzi, ndi mahandana.+
10 U songo konana+ na ane a funza pfunzo dza mazwifhi,+ musi wo no mu kaidza luvhili,+
11 ngauri onoyo muthu o bva nḓilani, o ita tshivhi, o ḓihaṱula.
12 Musi ndi tshi ruma Aritema kana Tixiko+ ngeo, u ḓe nga u ṱavhanya kha nṋe ngei Nikopoli ngauri ndi ṱoḓa u fhedza vhuria henefho.
13 U thuse Apolo na Zena ane a ḓivha Mulayo nga zwoṱhe zwine wa nga kona, musi vhe lwendoni lwavho uri hu si vhe na tshine vha tshi shaya.+
14 Fhedzi u dovhe u ite uri vhahashu vha gude u ita mishumo mivhuya uri vha kone u thusa vha shayaho,+ uri vha dzule vha tshi ita mishumo mivhuya.+
15 Vhoṱhe vhane nda vha navho vha a u lumelisa. U lumelise vhane vha ri funa na vha re na lutendo lu fanaho na lwashu.
Ngavhe Mudzimu a tshi ni sumbedza vhuthu vhuhulu noṱhe.
Ṱhaluso dzi re magumoni a siaṱari
^ Kana “mafunda.”
