Kha Vhafilipi 2:1-30
2 Samusi ni na vhuthihi na Kristo, ni tshi ṱuṱuwedza na u khuthadza vhaṅwe ni tshi itiswa nga lufuno, ni tshi ṱhogomela vhaṅwe, ni tshi vha funa na u vha pfela vhuṱungu,
2 itani uri ndi takale nga ho engedzeaho nga u vha na muhumbulo u fanaho, u funana nga nḓila i fanaho, u vha na vhuthihi na u vha na kuhumbulele ku fanaho.+
3 Ni songo ita zwa dzikhakhathi+ kana u ḓihudza,+ fhedzi ni ḓiṱukufhadze ni dzhie vhaṅwe vhe vhahulwane kha inwi.+
4 Ni songo lavhelesa zwaṋu fhedzi,+ ni lavhelese na zwa vhaṅwe.+
5 Dzulani ni tshi humbula u fana na Kristo Yesu,+
6 we naho o vha e kha tshivhumbeo tsha Mudzimu,+ a si humbule u dzhia vhuimo ha Mudzimu uri a lingane nae.+
7 Fhedzi o ṱutshela zwoṱhe zwe a vha e nazwo, a fana na mulanda.+ A vha muthu.+
8 Zwiṅwe hafhu, musi a tshi vha muthu, o ḓiṱukufhadza na u thetshelesa u swika a tshi fa+ kha danda.*+
9 Ndi ngazwo Mudzimu o mu hulisa a mu ṋea vhuimo ha nṱha,+ a mu ṋea nga vhuthu dzina ḽi fhiraho madzina oṱhe,+
10 uri vhoṱhe vha gwadame dzinani ḽa Yesu, vha re ṱaḓulu, vha re kha ḽifhasi na vha re fhasi ha mavu,+
11 na uri vhoṱhe vha tende uri Yesu Kristo ndi Murena,+ uri hu rendwe Mudzimu ane a vha Khotsi.
12 Vhahashu vhane nda vha funa, no vha ni tshi dzula ni tshi thetshelesa musi ndi na inwi, zwino ni khou thetshelesa zwihulu naho ndi siho. Nga zwenezwo, shumani nga maanḓa ni tshi ofha na u tetemela uri ni tshidzwe.
13 Ngauri Mudzimu ndi ene ane a ni khwaṱhisa, a ita uri ni tame u ita zwine a funa na u vha na maanḓa a u ita.
14 Dzulani ni tshi ita zwoṱhe ni sa gunguli,+ ni sa hanedzani,+
15 uri ni vhe vha sa solei na vha si na mulandu, ni vhe vhana vha Mudzimu+ vho kunaho, naho ni tshi khou tshila na murafho muvhi u sa iti zwo lugaho,+ ni vhonetshele vhukati hawo sa tshedza shangoni.+
16 Dzulani no farelela ipfi ḽa vhutshilo.+ Ndi hone ndi tshi ḓo takala nga ḓuvha ḽa Kristo, ndi tshi ḓivha uri a tho ngo gidimela mahala kana u shumela mahala.
17 Naho ndi tshi khou shululwa sa tshifhiwa tsha u nwiwa+ kha tshiṱhavhelo+ nga u ita mushumo, ndi takala na inwi noṱhe ngauri na inwi ni khou u ita ngauri ni na lutendo.
18 Na inwi ni fanela u takala na nṋe.
19 Ndi fhulufhela uri arali Murena Yesu o zwi funa ndi ḓo ni rumela Timotheo+ hu si kale, uri na nṋe ndi ṱuṱuwedzee musi ndi tshi pfa nga ha inwi.
20 Ngauri a thi na muṅwe ane a nga ene, ane a ḓo ni ṱhogomela zwa vhukuma.
21 Ngauri vhaṅwe vhoṱhe a vha na ndavha na Yesu Kristo, vha na ndavha na vhone vhaṋe fhedzi.
22 Fhedzi ni a ḓivha uri ene ho ngo tou ralo, ngauri o shuma na nṋe nga maanḓa, sa ṅwana+ a tshi shuma na khotsi awe, uri mushumo wa u huwelela mafhungo maḓifha u aluwe.
23 Ndi fhulufhela uri ndi ḓo ruma ene musi ndo no vhona uri hu ḓo itea mini kha nṋe.
24 Ndi fhulufhela uri arali Murena a tshi zwi funa, ndi ḓo ḓa hu si kale.+
25 Zwa zwino ndi vhona zwi khwine uri ndi ni rumele wahashu Epafrodito, ane a shuma na nṋe na ane a vha swole u fana na nṋe. No mu rumela kha nṋe uri a ntshumele nga u nthusa kha zwine nda zwi shaya.+
26 O ni ṱuvha noṱhe. O tsikeledzea musi a tshi pfa uri ni a zwi ḓivha uri o vha a tshi khou lwala.
27 Ndi ngoho uri o lwala lwe a ṱoḓou fa; fhedzi Mudzimu o mu khathutshela, ho ngo khathutshela ene fhedzi, o khathutshela na nṋe, uri ndi si dzule ndi tshi pfa vhuṱungu.
28 Ndi ḓo mu rumela nga u ṱavhanya uri musi ni tshi mu vhona ni dovhe ni takale, uri na nṋe ndi si tsha vhilaela nga maanḓa.
29 Mu ṱanganedzeni no takala sa zwine na ṱanganedzisa zwone vhane vha shumela Murena, ni dzule ni tshi ṱhonifha vhathu vho raloho,+
30 ngauri o ṱoḓou fa a tshi khou shumela Kristo,* o vhea vhutshilo hawe khomboni uri a ntshumele, ngauri inwi no kundelwa u zwi ita nge na vha ni siho.+
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana khamusi, “a tshi khou shumela Murena.”
