Kha Vhafilipi 3:1-21
3 Tsha u fhedza vhahashu, dzulani no takala Murenani.+ A thi netiswi nga u ni ṅwalela zwithu zwe nda vha ndo no ni ṅwalela, ngauri ndi khou itela u ni tsireledza.
2 Thanyelani vha songo kunaho,* vhane vha ita zwivhi na vhane vha ṱuṱuwedza u fumba.*+
3 Ngauri riṋe ro fumba zwa vhukuma,+ riṋe vhane ra shumela Mudzimu ri tshi thuswa nga muya wawe, ri tshi zuwa nga zwe Kristo Yesu a zwi ita,+ a ri fhulufheli zwine vhaṅwe vhathu vha zwi fhulufhela.
4 Naho zwo ralo, nṋe ndi nga zuwa u fhira ane a ṱoḓa u zuwa nga zwine a zwi fhulufhela, ngauri
5 ndo fumbiswa nga ḓuvha ḽa vhumalo,+ ndi Muisiraele wa lushaka lwa Benyamini, ndi Muhevheru o bebwaho nga Vhahevheru,+ ndi Mufarisei+ we a vha a tshi tevhedza mulayo;
6 ndo ḓiimisela u tovhola tshivhidzo,+ ndi tshi tevhedza zwoṱhe zwine mulayo wa ri zwo luga.
7 Fhedzi zwithu zwe zwa vha zwi zwa ndeme kha nṋe, ndo zwi ṱutshela tshoṱhe ndo takala nga nṱhani ha Kristo.+
8 Zwiṅwe hafhu, ndo ṱutshela zwithu zwoṱhe ndi tshi itela u wana nḓivho ya ndeme vhukuma nga ha Kristo Yesu Murena wanga. Nga nṱhani hawe, ndo ṱutshela zwithu zwoṱhe, nda zwi dzhia zwi mathukhwi, uri ndi takalelwe nga Kristo,
9 na uri ndi vhe na vhuthihi nae. Fhedzi ndi dzhiiwa sa o lugaho ngauri ndi tenda+ Kristo,+ hu si ngauri ndi tevhedza Mulayo. Mudzimu u dzhia vhane vha tenda Kristo sa vho lugaho.+
10 Ndo ḓiimisela u ḓivha nga hae na maanḓa awe a u vusa vhafu+ na u tambula u fana nae,+ na u tenda u fa u fana nae,+
11 uri ndi vhone arali zwi tshi nga konadzea uri ndi vhe muṅwe wa vhane vha ḓo thoma u vuswa.+
12 A si uri ndo no zwi wana kana ndo no itwa o fhelelaho, fhedzi ndi khou lwela+ uri ndi vhone arali ndi tshi nga wana zwe Kristo Yesu a nnangela zwone.+
13 Vhahashu, a thi ḓidzhii ndo no zwi wana; fhedzi zwine nda ita ndi hezwi: Ndi hangwa zwi re murahu,+ nda hovhelela zwi re phanḓa,+
14 ndi lwela u wana malamba+ ngei ṱaḓulu a zwe Mudzimu a ri vhidzela+ zwone nga Kristo Yesu.
15 Nga zwenezwo, vhoṱhe vha re na lutendo lwo khwaṱhaho,+ kha ri humbule nga ha zwe nda ni vhudza, arali ni sa humbuli nga ha zwenezwi, Mudzimu u ḓo ni thusa uri ni zwi humbule.
16 Samusi ro no vha na lutendo lwo khwaṱhaho, kha ri dzule ri tshi tshimbila nga yeneyi nḓila.
17 Vhahashu, ivhani vhane vha edzisa nṋe,+ ni sedze vhane vha tshimbila nga nḓila i tendelanaho na tsumbo ye ra ni vhetshela yone.
18 Ngauri hu na vhanzhi vhe nda vha ndi tshi dzula ndi tshi amba nga havho, fhedzi zwino ndi amba nga havho ndi tshi khou lila, ngauri vha nyadza uri Kristo o fa kha danda.*
19 Vha ḓo fheliswa, mudzimu wavho ndi thumbu dzavho, vha ḓihudza nga zwi shonisaho, vha dzula vha tshi humbula zwithu zwa shango.+
20 Fhedzi hayani+ hashu ndi ngei ṱaḓulu,+ ri dzula ro lavhelela mutshidzi a bvaho henengei, ane a vha Murena Yesu Kristo,+
21 ane a ḓo shumisa maanḓa awe mahulu uri a shandule mivhili yashu i nyadzeaho, i fane na muvhili wawe wa vhugala,+ na u vhusa zwithu zwoṱhe.+
Ṱhaluso dzi re magumoni a siaṱari
^ Thevhedz., “mmbwa.”
^ Kana “vhane vha tshea muvhili.”
^ Sedzani Mutevhe Wa Ṱhalutshedzo Ya Maipfi.
