Kha Vhagalata 1:1-24
1 Ndi nṋe muapostola Paulo ane a khou ni ṅwalela. A tho ngo nangiwa nga muthu uri ndi vhe muapostola, ndo nangiwa nga Yesu Kristo+ na Mudzimu ane a vha Khotsi ashu,+ we a mu vusa vhafuni.
2 Nṋe na vhahashu vhane nda vha navho, ri khou ṅwalela zwivhidzo zwa Galata, ri ri:
3 Ngavhe Mudzimu Khotsi ashu na Murena washu Yesu Kristo, vha tshi ni sumbedza vhuthu vhuhulu na u ita uri ni vhe na mulalo.
4 Kristo o ḓiṋekedzela a tshi itela zwivhi zwashu+ uri a ri vhofholole kha ḽino shango* ḽivhi+ u ya nga u funa ha Mudzimu ane a vha Khotsi ashu,+
5 ane a tea u rendwa lini na lini. Amen.
6 Zwi a mmangadza uri no ṱavhanya na ṱanganedza maṅwe mafhungo maḓifha,+ na ṱutshela Mudzimu we a ni vhidza nga u ita uri Kristo a ni sumbedze vhuthu vhuhulu.
7 A si uri hu na maṅwe mafhungo maḓifha; hu tou vha na vhane vha ṱoḓa u ni xedza+ nga u shanda mafhungo maḓifha nga ha Kristo.
8 Naho riṋe kana muruṅwa a bvaho ṱaḓulu a ni ḓivhadza mafhungo maḓifha a sa fani na e ra ni ḓivhadza one, nga a semiwe.
9 Samusi ndo no zwi amba, ndi dovha nda ri: Ane a ni ḓivhadza mafhungo maḓifha a sa fani na e na a ṱanganedza, nga a semiwe.
10 Ndi ṱoḓa u takalelwa nga Mudzimu hu si nga vhathu. A thi ṱoḓi u takadza vhathu. Arali ndo vha ndi tshi kha ḓi takadza vhathu, ndo vha ndi tshi ḓo vha ndi si mulanda wa Kristo.
11 Vhahashu, ndi ṱoḓa ni tshi ḓivha uri mafhungo maḓifha ane nda ni ḓivhadza one a si a vhathu;+
12 a tho ngo a wana kha muthu, a tho ngo tou a funzwa, ndo tou a dzumbululelwa nga Yesu Kristo.
13 Samusi ni tshi zwi ḓivha uri ndi tshi kha ḓi vha kha vhurereli ha Tshiyuda,+ ndo vha ndi tshi tovhola zwihulu tshivhidzo tsha Mudzimu, ndi tshi ṱoḓa u tshi tshinyadza.+
14 Ndo vha ndi tshi khou ita mvelaphanḓa khulu kha vhurereli ha Tshiyuda u fhira vhanzhi vha lushaka lwa hashu vha thanga dzanga, samusi ndo vha ndi tshi tevhela masialala a vhokhotsi anga+ nga mbilu yoṱhe.
15 Fhedzi Mudzimu we a ita uri ndi bebwe, na u ntsumbedza vhuthu vhuhulu+ nga u mmbidza, o vhona zwo tea
16 uri ndi ḓivhadze vhathu vha dziṅwe tshaka+ mafhungo maḓifha, uri vha ḓivhe Murwa wawe. Musi a tshi nnanga uri ndi ite zwenezwi, a tho ngo humbela nyeletshedzo kha muthu;
17 kana u ya Yerusalema u humbela nyeletshedzo kha vho vhaho vhaapostola phanḓa hanga, fhedzi ndo ya Arabia, nda kona u humela Damaseko.+
18 Ho no fhela miṅwaha miraru nda ya Yerusalema+ u dalela Kefa,*+ nda dzula nae maḓuvha a 15.
19 Ndo vhona muapostola Yakobo+ murathu wa Murena fhedzi.
20 Ndi a ni khwaṱhisedza phanḓa ha Mudzimu uri zwe nda ni ṅwalela ndi ngoho.
21 Nga murahu nda ya dzinguni ḽa Siria na ḽa Kilikia.+
22 Fhedzi ndo vha ndi sa ḓivhiwi zwivhidzoni zwa Yudea zwi re na vhuthihi na Kristo.
23 Vho vha vha tshi pfa hu tshi pfi: “Muthu we a vha a tshi ri tovhola,+ a tshi ṱoḓa u fhelisa vhurereli hashu,+ u vho ḓivhadza mafhungo maḓifha.”
24 Zwe zwa itea kha nṋe zwa ita uri vha rende Mudzimu.
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ U dovha a pfi Petro.
