Kha Vhahevheru 4:1-16
4 Samusi hu tshee na fhulufhelo ḽa u dzhena fhethu hawe ha vhuawelo, kha ri ṱhogomele uri hu si vhe na ane a si dzhene.+
2 Ngauri na riṋe ro ḓivhadzwa mafhungo maḓifha,+ samusi na vhone vho ḓivhadzwa; fhedzi a vho ngo vhuyelwa nga ipfi ḽe vha ḽi pfa, ngauri vho vha vhe si na lutendo lu fanaho na lwa vhe vha thetshelesa.
3 Fhedzi riṋe vha re na lutendo ri a dzhena fhethu hawe ha vhuawelo, samusi o ri: “Ndo ana ndo sinyuwa nda ri, ‘A vha nga dzheni fhethu hanga ha vhuawelo,’”+ naho ene o awela musi a tshi fhedza mishumo yawe u bva tshee shango ḽa sikwa.+
4 Ngauri kha luṅwe luṅwalo ho ambiwa nga ha ḓuvha ḽa vhusumbe ha pfi: “Mudzimu o awela nga ḓuvha ḽa vhusumbe a si tsha shuma tshithu,”+
5 a dovha a ri: “A vha nga dzheni fhethu hanga ha vhuawelo.”+
6 Vhe vha thoma u ḓivhadzwa mafhungo maḓifha a vho ngo dzhena henefho fhethu ha vhuawelo ngauri a vho ngo thetshelesa. Fhedzi hu kha ḓi vha na vhaṅwe vhane vha ḓo dzhena khaho,+
7 ndi ngazwo nga murahu ha tshifhinga tshilapfu kha phisalema ya Davida o dovha a vhea ḽiṅwe ḓuvha a ri, “Ṋamusi”; samusi ho ambiwa afho nṱha ha pfi, “Ṋamusi arali na pfa ipfi ḽawe, ni songo rindidza mbilu dzaṋu.”+
8 Arali Yoshua+ a vhe o vha isa fhethu ha vhuawelo, Mudzimu o vha a sa ḓo amba nga ha ḽiṅwe ḓuvha.
9 Ndi ngazwo vhathu vha Mudzimu vha tshi kha ḓi vha na ḓuvha ḽa u awela ḽine ḽa nga ḽa Savhatha.+
10 Ngauri we a dzhena fhethu ha Mudzimu ha vhuawelo, o awela mishumoni yawe, samusi na Mudzimu o awela kha yawe.+
11 Nga zwenezwo, kha ri ite zwoṱhe zwine ra nga kona uri ri dzhene fhethu ha vhuawelo, uri hu si vhe na ane a tevhedza tsumbo yeneiḽa ya u sa thetshelesa.+
12 Ngauri ipfi ḽa Mudzimu ḽi a tshila, ḽi na maanḓa,+ ḽi na vhuhali vhu fhiraho ha banga ḽa mutshea-hoṱhe,+ ḽi phuletshedza ḽa swika nga ngomu-ngomu ha muthu lune ḽa dzumbulula zwine muthu a vha zwone nga ngomu na nga nnḓa, ḽa swika kha marambo* na mwongo,* ḽi a kona u khethekanya zwine muthu a zwi humbula na zwe a ḓiimisela u zwi ita.
13 Ngauri a hu na tsiko yo dzumbamaho phanḓa hawe,+ a hu na tsho dzumbiwaho, zwoṱhe zwi khagala phanḓa hawe. Ndi ene ane ra ḓo ḓifhindulela khae.+
14 Yesu Murwa wa Mudzimu+ ndi ene tshifhe muhulu washu, o dzhena ṱaḓulu, kha ri bvele phanḓa ri tshi amba nga ha lutendo lune ra vha nalwo khae.+
15 Tshifhe muhulu washu u a pfesesa uri ri a shaya nungo,+ na ene o lingwa kha zwoṱhe u fana na riṋe, fhedzi ho ngo ita tshivhi.+
16 Kha ri sendele tsini na khuluṋoni ya vhuthu vhuhulu, ri rabele ro vhofholowa,+ uri Mudzimu a ri thuse nga tshifhinga tsho teaho ngauri u a khathutshela, u na vhuthu vhuhulu.
Ṱhaluso dzi re magumoni a siaṱari
^ Thevhedz., “zwiendanungo.”
^ Ndi zwithu zwine zwa nga mapfura zwi wanalaho kha marambo.
