Kha Vhakolosa 2:1-23
2 Ndi ṱoḓa ni tshi ḓivha uri ndi khou lwa nndwa khulu ndi tshi itela inwi na vha Laodikea+ na vha sa athu u mmbona.
2 Zwenezwi ndi uri vha khuthadzwe,+ vha funane, vha vhe na vhuthihi,+ uri vha kone u wana phaṱhutshedzo,* dzine dza vha u ḓivha nga ho teaho na u pfesesa zwavhuḓi tshiphiri tshikhethwa tsha Mudzimu, tshine tsha vha Kristo.+
3 Lupfumo lwoṱhe lwa vhuṱali na nḓivho lwo dzumbwa khae.+
4 Ndi amba zwenezwi uri hu si vhe na ane a ni xedza nga vhufhura.
5 Ndi a ni humbula naho ndi siho, ndi a takala ndi tshi vhona u dzudzanyea haṋu+ na uri ni na lutendo lwo khwaṱhaho kha Kristo.+
6 Vhunga no tenda Kristo Yesu Murena washu, dzulani ni na vhuthihi nae,
7 samusi no funzwa, ni ṱoke midzi na u fhaṱwa khae+ na u vha na lutendo lwo khwaṱhaho,+ ni dzule ni tshi livhuwa.+
8 Ṱhogomelani uri hu si vhe na ane a ni fasha* nga pfunzo dza vhaṱali na vhufhura+ ha sialala ḽa vhathu, u ya nga kuhumbulele kwa shango,* hu si u ya nga Kristo;
9 ngauri zwoṱhe zwine Mudzimu a vha zwone zwi kha Kristo.+
10 Nga nṱhani hawe, a hu na tshine na shaya, ngauri ndi ene ṱhoho ya mivhuso na vhavhusi vhoṱhe.+
11 No fumbiswa ngauri ni tenda Kristo, hu si nga nḓila ine vhathu vha zwi ita ngayo, fhedzi nga u bvula muvhili u re na tshivhi,+ ngauri ndi yone nḓila ine vhashumeli vha Kristo vha fumbiswa ngayo.+
12 Ngauri no vhulungwa nae kha ndovhedzo yawe.+ No vuswa nae ngauri ni na vhuthihi nae,+ ni tenda mishumo ya maanḓa ya Mudzimu we a mu vusa vhafuni.+
13 Zwiṅwe hafhu, naho no vha no fa kha vhutshinyi haṋu, ni songo fumbiswa, Mudzimu o ita uri ni tshile uri ni vhe na vhuthihi na Kristo.+ A ri hangwela vhutshinyi hoṱhe nga vhuthu,+
14 a thutha* mulayo woṱhe+ we ra vha ro ṅwalelwa wone,+ u tshi lwa na riṋe.+ A u fhelisa nga u u ombela kha danda.*+
15 Nga nṱhani ha zwenezwi, o bvula mivhuso na vhavhusi a vha ṱana khagala sa vho kundwaho,+ a vha ranga phanḓa sa vho fariwaho.
16 Ni songo tenda u haṱulwa nga zwine na ḽa na u nwa+ kana nga u pembelela vhuṱambo, ṅwedzi muswa+ kana savhatha.+
17 Zwenezwo zwithu ndi murunzi wa zwi ḓaho,+ fhedzi a itaho wonoyo murunzi ndi Kristo.+
18 Thanyelani vhane vha rabela vharuṅwa* na vhane vha si ḓiṱukufhadze zwa vhukuma, ngauri vha nga ita uri ni si wane malamba.+ Vhenevho vha farelela kha zwine vha zwi vhona, vha ḓikukumusa nga zwine vha zwi humbula zwi si na mushumo,
19 a vha khou farelela ṱhoho+ ya ane a ṋea muvhili zwine wa zwi shaya, a itaho uri zwipiḓa zwa muvhili zwi ṱumane. Mudzimu o shumisa ene uri muvhili woṱhe u aluwe.+
20 Arali no laṱa kuhumbulele kwa shango* na fa na Kristo,+ ndi ngani ni tshi kha ḓi tshila sa vhathu vha ḽino shango? Ndi ngani ni tshi kha ḓi tevhedza milayo ya ḽino shango?+
21 Milayo i ngaho heyi: “Ni songo fara, u thetshela kana u kwama.”
22 Yeneyi milayo i ambela kha zwithu zwine zwa fhela musi zwi tshi shumiswa. Ndi milayo ine vhathu vha i funza.+
23 Zwenezwo zwithu zwi vhonala zwi vhuṱali. Fhedzi vhane vha zwi ita, vha ḓinangela vhurabeli vhune vha vhu takalela. Vha ita uri mivhili yavho i pfe vhuṱungu, vha tshi itela uri vhathu vha vhone u nga vha a ḓiṱukufhadza.+ Fhedzi zwenezwo zwithu zwi nga si vha thuse u lwa na nyemulo dza ṋama.
Ṱhaluso dzi re magumoni a siaṱari
^ Kana “lupfumo.”
^ Thevhedz., “u ya nga zwithu zwa mutheo zwa shango.”
^ Kana “a ni ita mufariwa.”
^ Kana “phumula.”
^ Sedzani Mutevhe Wa Ṱhalutshedzo Ya Maipfi.
^ Kana “vha rabela u fana na vharuṅwa.”
^ Thevhedz., “laṱa zwithu zwa mutheo zwa shango.”
