Kha Vharoma 12:1-21
12 Vhahashu, nga nṱhani ha uri Mudzimu o ni khathutshela, ndi a ni humbela uri ni ṋekedze mivhili yaṋu+ sa tshiṱhavhelo tshikhethwa,+ tshi tshilaho na tshi ṱanganedzeaho kha Mudzimu, nga u ita zwenezwo ni ḓo vha ni tshi khou shumela Mudzimu nga ṱhalukanyo yaṋu yoṱhe.+
2 Ni songo edzisa vhathu vha ḽino shango,* shandulani nḓila ine na humbula ngayo,+ uri ni kone u ṱalukanya+ zwine Mudzimu a zwi funa, zwine zwa vha zwavhuḓi, zwo fhelelaho na zwine zwa mu takadza.
3 Nga nṱhani ha vhuthu vhuhulu he nda sumbedzwa hone, ndi ni vhudza noṱhe uri ni songo humbula uri ni khwine u fhira zwine na vha zwone,+ fhedzi ni vhe na muhumbulo wo tshaho, ni tshi tevhedza lutendo lwe na ṋewa lwone nga Mudzimu.+
4 Vhunga kha muvhili muthihi hu na miraḓo minzhi,+ fhedzi yeneyo miraḓo yoṱhe a i shumi mishumo i fanaho,
5 naho ri vhanzhi, ri muvhili muthihi ngauri ri na vhuthihi na Kristo, ri miraḓo ine ya shumisana.+
6 Samusi ri na zwifhiwa zwi sa fani u ya nga vhuthu vhuhulu he ra sumbedzwa hone,+ arali hu u porofita, kha ri porofite u ya nga lutendo lwe ra ṋewa lwone;
7 arali ri tshi kona u thusa vhaṅwe, kha ri vha thuse; ane a kona u funza, kha funze;+
8 ane a ṱuṱuwedza, kha ṱuṱuwedze;+ ane a ṋea,* kha zwi ite nga mafunda;+ ane a ranga phanḓa, kha zwi ite nga u fhisea;+ ane a khathutshela, kha zwi ite o takala.+
9 Lufuno lwaṋu lu songo vha na muhoyo.+ Vhengani vhuvhi,+ ni fune zwivhuya.
10 Ni funane zwi tshi bva mbiluni sa murathu na mukomana. Kha u hulisa vhaṅwe ni vhe wa u thoma.+
11 Ni shumese, ni songo vha vhabva.+ Ni tendele muya mukhethwa u tshi ita uri ni fhisee.+ Ni shumele Yehova* sa mulanda.+
12 Takalani ngauri ni na fhulufhelo. Konḓelelani musi ni maṱunguni.+ Ni dzule ni tshi rabela.+
13 Ni kovhelane na vhakhethwa zwine vha zwi shaya.+ Ni dzule ni tshi ṱanganedza vhaeni.+
14 Dzulani ni tshi fhaṱutshedza vhane vha ni tovhola;+ fhaṱutshedzani, ni songo sema.+
15 Ni takale na vho takalaho; ni lile na vha lilaho.
16 Dzhiani vhaṅwe vhathu nga nḓila ine na ḓidzhia ngayo; ni songo ḓihudza, fhedzi ni ḓiṱukufhadze.+ Ni songo ḓidzhia sa vho ṱalifhaho.+
17 Ni songo lifhedza vhuvhi nga vhuvhi.+ Lingedzani u ita zwo lugaho phanḓa ha vhathu vhoṱhe.
18 Itani zwoṱhe zwine na nga kona uri ni vhe na mulalo na vhathu vhoṱhe.+
19 Vhafunwa, ni songo ḓilifhedzela, fhedzi litshani Mudzimu a sumbedze mbiti dzawe;+ ngauri ho ṅwaliwa u pfi: “‘Ndifhedzo ndi yanga; ndi ḓo lifhedza,’ u ralo Yehova.”*+
20 Fhedzi, “arali swina ḽau ḽi na nḓala, ḽi ṋee ḽi ḽe; arali ḽi na ḓora, ḽi ṋee ḽi nwe; ngauri u tshi ita zwenezwo u ḓo vha u tshi khou ḽi okela maxale* a fhisaho kha ṱhoho.”+
21 U songo tenda u kundwa nga vhuvhi, fhedzi dzula u tshi kunda vhuvhi nga zwivhuya.+
Ṱhaluso dzi re magumoni a siaṱari
^ Sedzani Mutevhe Wa Ṱhalutshedzo Ya Maipfi.
^ Kana “ṋeela.”
^ Kana “masimbe.”
