Kha Vharoma 13:1-14
13 Vhathu* vhoṱhe kha vha ḓiṱukufhadze kha mivhuso,+ ngauri a hu na muvhuso u sa bvi kha Mudzimu.+ Yoṱhe yo vhewa nga Mudzimu.+
2 Ngauralo, ane a lwa na muvhuso u khou lwa na ndugiselelo ya Mudzimu; vhane vha lwa na ndugiselelo ya Mudzimu vha ḓo haṱulwa.
3 Vhavhusi a vha ofhiwi nga vhane vha ita zwivhuya, fhedzi vha ofhiwa nga vhane vha ita vhuvhi.+ Arali ni sa ṱoḓi u ofha vhavhusi, dzulani ni tshi ita zwivhuya,+ vha ḓo ni takalela;
4 ngauri vha khou shumela Mudzimu uri vha ni itele zwivhuya. Vha na banga ḽa u pfisa vhuṱungu, a vho ngo ḽi farela mahala. Ndi vhashumeli vha Mudzimu, vha pfisa vhuṱungu vhane vha ita vhuvhi.
5 Zwo tea uri ni ḓiṱukufhadze kha vhavhusi, hu si nga u ofha u pfiswa vhuṱungu, fhedzi nga nṱhani ha luvalo lwaṋu.+
6 Ndi ngazwo ni tshi badela mithelo; ngauri ndi vhashumeli vha Mudzimu vha shumelaho vhathu nga u ita zwenezwi tshifhinga tshoṱhe.
7 Vhoṱhe ni vha ṋee zwo vha fanelaho, a ṱoḓaho muthelo, ni mu ṋee muthelo;+ a ṱoḓaho u luvhiwa, ni mu luvhe; a ṱoḓaho u ofhiwa, ni mu ofhe;+ a ṱoḓaho u huliswa, ni mu hulise.+
8 Ni songo koloda muthu tshithu, nga nnḓa ha uri ni funane;+ ngauri ane a funa muṅwe u khunyeledza mulayo.+
9 Mulayo uri, “U songo vha phombwe,+ u songo vhulaya,+ u songo tswa,+ u songo emula,”+ ngauri milayo yoṱhe yo katelwa kha maipfi ane a ri: “U tea u funa muhura wau vhunga u tshi ḓifuna.”+
10 A re na lufuno ha iteli muhura wawe vhuvhi;+ ngauri lufuno lu khunyeledza mulayo.+
11 Itani zwenezwi ni tshi ḓivha uri tshifhinga tsho swika tsha uri ni karuwe,+ ngauri zwino u tshidzwa hashu hu tsini u fhira musi ri tshi kha ḓi bva u vha vhatendi.
12 Ḽi vho tsha; hu si kale hu ḓo vha masiari. Kha ri bvule mishumo ya swiswi,+ ri ambare zwiṱhavhane zwine zwa shumiswa hu na tshedza.+
13 Kha ri tshimbile zwavhuḓi sa vha tshimbilaho+ masiari, ri songo ya zwimimani zwi sa langei, ri songo vha zwidakwa, ri songo ḓifara luvhi nga zwa vhudzekani, ri songo ita tshivhi ri sa shoni,*+ ri songo vusa dzinndwa na u vha na vivho.+
14 Fhedzi ambarani Murena Yesu Kristo,+ ni songo dzula no dzudzanya uri ni fushe nyemulo dza ṋama.+
Ṱhaluso dzi re magumoni a siaṱari
^ Nga Tshigerika ndi aselgeia. Sedzani Mutevhe Wa Ṱhalutshedzo Ya Maipfi.
