Vhurifhi Ha Yakobo 1:1-27
1 Nṋe Yakobo,+ mulanda wa Mudzimu na wa Murena Yesu Kristo, ndi lumelisa tshaka dza 12 dzo balanganaho.
2 Vhahashu, ni takale musi ni tshi sedzana na milingo yo fhambananaho,+
3 samusi ni tshi zwi ḓivha uri u lingwa haṋu lutendo nga yeneyi nḓila zwi ḓo ita uri ni kone u konḓelela.+
4 Fhedzi itani uri u konḓelela hu khunyeledze mushumo waho, uri ni vhe vho fhelelaho, ni sa solei kha zwithu zwoṱhe, hu si na tshine na shaya.+
5 Ane a shaya vhuṱali, nga a dzule a tshi humbela Mudzimu,+ u ḓo mu ṋea,+ ngauri u ṋea vhoṱhe nga mbilu yoṱhe a sa gunguli.+
6 Fhedzi a dzule a tshi humbela e na lutendo,+ a sa timatimi,+ ngauri ane a timatima u nga gabelo ḽa lwanzhe, ḽine ḽa vhudzulwa nga muya ḽa ya ngeno na ngei.
7 Onoyo a songo lavhelela u wana tshithu tshi bvaho kha Yehova;*
8 ngauri u a timatima,+ ha na vhuimo kha zwoṱhe zwine a zwi ita.
9 Fhedzi wahashu a shayaho nga a takalele* u huliswa hawe,+
10 na wahashu o pfumaho a takalele u ṱukufhadzwa hawe,+ ngauri mupfumi u ḓo puta sa luvha ḽi re tsimuni.
11 U fana na ḓuvha ḽi tshi ṱavha ḽa fhisa zwimela zwa puta, maluvha azwo a fhufhurea na lunako lwazwo lwa fhela. Na mupfumi u ḓo lovha a tshi kha ḓi pandamedza lupfumo.+
12 Hu takala ane a dzula a tshi konḓelela mulingo,+ ngauri u ḓo wana khare ya vhutshilo,+ musi o no takalelwa nga Mudzimu. Yehova* o fhulufhedzisa yeneyo khare vhane vha dzula vha tshi Mu funa.+
13 Musi muthu a tshi lingwa a songo ri: “Ndi lingwa nga Mudzimu.” Ngauri a hu na ane a nga linga Mudzimu uri a ite vhuvhi, na Mudzimu ha lingi muthu uri a ite vhuvhi.
14 Ane a lingwa u vha a tshi khou kokodzwa na u kungwa* nga nyemulo yawe.+
15 Musi nyemulo yo no hulela, i bveledza tshivhi; musi tshivhi tsho no itwa, tshi ḓisa lufu.+
16 Vhahashu vha funwaho, ni songo fhurwa.
17 Zwifhiwa zwoṱhe zwavhuḓi na zwo fhelelaho zwi bva ṱaḓulu,+ zwi tsa zwi tshi bva kha Khotsi o sikaho tshedza tsha ṱaḓulu,+ ha shanduki, ha fani na mirunzi i sa imi fhethu huthihi.+
18 Ngauri o ita uri ri vhe hone nge a zwi funa,+ a tshi shumisa ipfi ḽawe ḽa ngoho. O ita zwenezwi uri ri vhe vha u thoma kha vhe a vha sika.+
19 Vhahashu vha funwaho, ḓivhani hezwi: Muthu u fanela u ṱavhanya u thetshelesa, a lenge u amba,+ a lenge u sinyuwa,+
20 ngauri u sinyuwa a zwi iti uri muthu a ite zwo lugaho phanḓa ha Mudzimu.+
21 Nga zwenezwo, laṱani tshika dzoṱhe na vhuvhi hoṱhe,*+ ni tende nga u ḓiṱukufhadza musi Mudzimu a tshi zwala ipfi ḽawe kha inwi, ḽine ḽa kona u ni tshidza.
22 Naho zwo ralo, ivhani vhaiti vha zwine ipfi ḽa amba zwone,+ ni songo vha vhapfi fhedzi, na ḓifhura nga u humbula uri zwo eḓana u sokou thetshelesa.
23 Ane a pfa zwine ipfi ḽa amba, fhedzi a si zwi ite,+ onoyo u fana na muthu ane a sedza tshifhaṱuwo tshawe kha tshivhoni.
24 Ngauri u a ḓisedza a ṱuwa, a ṱavhanya a hangwa uri o vha o itisa hani.
25 Fhedzi ane a sedzesa mulayo wa Mudzimu wo fhelelaho+ une wa vhofholola, a ita zwine wa amba, ha tsha vha ane a sokou thetshelesa a hangwa, fhedzi u ita mushumo wa Mudzimu. U ḓo u ita o takala.+
26 Ane a humbula uri u gwadamela Mudzimu, fhedzi a sa koni u langa lulimi lwawe,+ u khou ḓifhura, vhurabeli hawe ndi ha mahandana.
27 Vhurabeli ho kunaho na vhu si na tshika phanḓa ha Mudzimu ane a vha Khotsi ashu, ndi hovhu: u ṱhogomela zwisiwana+ na tshilikadzi+ vhuṱunguni havho+ na u dzula u si na tshika ya ḽino shango.+
Ṱhaluso dzi re magumoni a siaṱari
^ Thevhedz., “zuwe nga ha.”
^ Kana “fashwa.”
^ Kana khamusi, “vhuvhi ho andaho.”
