Yeremia 14:1-22
14 Zwe Yehova a zwi vhudza Yeremia nga ha gomelelo ndi hezwi:+
2 Yuda u khou lila,+ khoro dzawo dzo tshinyala.
Dzo mbombomela mavuni dzo ṱungufhala,Yerusalema hu pfala tshililo.
3 Vhashumeli vha rumiwa nga vhaṋe vhavho u ka maḓi.
Vha ya milindini ya maḓi* vha wana hu si na maḓi.
Vha vhuya na mvuvhelo dzavho dzi si na tshithu.
Vho shona na u kulea nungo,Vho fukedza ṱhoho dzavho.
4 Fhasi ho fhanduwa,Ngauri shangoni a hu na mvula,+Vhalimi vho tsikeledzea, vha fukedza ṱhoho dzavho.
5 Na ntsa i ṱutshela ṅwana wayoNgauri a hu na hatsi.
6 Donngi dzi ima nṱha ha zwikwara zwi si na miri.
Dzi femeleka sa phunguwe;Maṱo adzo o kovhela ngauri a hu na zwimela.+
7 Naho vhukhakhi hashu vhu tshi ri vhona mulandu,Iwe Yehova, dzhia vhukando u tshi itela dzina ḽau.+
Ngauri mishumo yashu ya u sa fhulufhedzea ndi minzhi,+Ro khakhela iwe.
8 Iwe fhulufhelo ḽa Isiraele, Mutshidzi wawe+ zwifhingani zwa maṱungu,Ndi ngani u tshi nga mutsinda kha ḽino shango,U tshi nga mutshimbili ane a lala a fhira?
9 Ndi ngani u tshi nga muthu o mangalaho,U tshi nga muhali a sa koni u tshidza?
Ngauri u vhukati hashu, Iwe Yehova,+Ri vhidzwa nga dzina ḽau.+
U songo ri laṱa.
10 Zwe Yehova a zwi amba nga ha havha vhathu ndi hezwi: “Vha funesa u mona-mona;+ a vha dzuli fhasi.+ Ndi ngazwo Yehova a sa vha takaleli.+ Zwino u ḓo humbula mulandu wavho, a vha sengisela zwivhi zwavho.”+
11 Yehova o amba na nṋe a ri: “U songo rabelela vhenevha vhathu uri vha ḓelwe nga zwivhuya.+
12 Musi vha tshi ḓidzima zwiḽiwa, a thi thetshelesi khumbelo dzavho,+ musi vha tshi ita zwifhiwa zwa u fhiswa na zwifhiwa zwa thoro, a thi zwi takaleli,+ ndi ḓo vha fhelisa nga banga, nga nḓala na nga malwadze.”+
13 Nṋe nda ri: “Yowee, Yehova Murena Muvhusahoṱhe! Vhaporofita vha vha vhudza uri: ‘A ni nga vhoni banga, na nḓala i nga si ni ḓele, fhedzi ndi ḓo ni ḓisela mulalo wa vhukuma henefha fhethu.’”+
14 Ndi hone Yehova a tshi amba na nṋe a ri: “Vhaporofita vha khou porofita mazwifhi dzinani ḽanga.+ A tho ngo vha ruma kana u vha laya kana u amba navho.+ Vha khou ni porofitela mabono a mazwifhi na u sokou bvumba khathihi na vhufhura vhu re mbiluni dzavho.+
15 Nga zwenezwo, zwe Yehova a zwi amba nga ha vhaporofita vhane vha khou porofita dzinani ḽanga naho ndi songo vha ruma, vha ambaho uri a hu na banga kana nḓala zwine zwa ḓo vha hone kha ḽino shango, ndi hezwi: ‘Vhenevho vhaporofita vha ḓo vhulawa nga banga na nga nḓala.+
16 Na vhathu vhane vha porofita khavho vha ḓo laṱiwa nḓilani dza Yerusalema nga nṱhani ha nḓala na banga, hu si vhe na ane a vhulunga vhone,+ vhafumakadzi vhavho, vharwa vhavho kana vhananyana vhavho. Ngauri ndi ḓo vha ḓisela maṱungu o vha fanelaho.’+
17 “U vha vhudze hezwi,‘Maṱo anga nga a tsengise miṱodzi vhusiku na masiari, a sa aweli,+Ngauri ṅwananyana wa vhathu vhanga o rwiwa a vunḓekana tshoṱhe,+O huvhadzwa zwihulu.
18 Ndi tshi ya masimuni,Ndi vhona vho vhulawaho nga banga!+
Ndi tshi dzhena muḓini,Ndi vhona vhane vha khou fa nga nḓala!+
Ngauri vhaporofita na vhotshifhe vho ya shangoni ḽine vha si ḽi ḓivhe.’”+
19 Naa wo laṱa Yuda tshoṱhe, kana u nengwa Tsioni?+
Ndi ngani wo ri rwa lune ri si vhe na dzilafho?+
Ho vha ho lavhelelwa mulalo, fhedzi a hu na tshivhuya tsho ḓaho,Ho lindelwa tshifhinga tsha u fhodziwa, fhedzi ha ḓa zwi ofhisaho!+
20 Yehova, ri tenda vhuvhi hashu,Na vhukhakhi ha vhomakhulukuku washu,Ngauri ro khakhela iwe.+
21 U songo ri laṱa, u tshi itela dzina ḽau;+U songo nyadza khuluṋoni yau ya vhugala.
U humbule mulanga we wa u vhofha na riṋe, u songo u fhelisa.+
22 Naa midzimu ya zwifanyiso i sa vhuyedzi tshithu ya dzitshaka i nga nisa mvula,Kana ḽiṱaḓulu ḽi nga nisa mvula nga ḽone ḽiṋe?
Naa a si iwe U woṱhe, Iwe Yehova Mudzimu washu?+
Fhulufhelo ḽashu ndi iwe,Ngauri ndi iwe u woṱhe we wa ita zwenezwi zwithu zwoṱhe.
Ṱhaluso dzi re magumoni a siaṱari
^ Kana “zwisimani.”
