Yeremia 23:1-40
23 “Khombo i ḓo ḓela vhalisa vhane vha tshinyadza na u balanganya nngu dza pfulo yanga!” u ralo Yehova.+
2 Zwe Yehova Mudzimu wa Isiraele a zwi vhudza vhalisa vhane vha khou lisa vhathu vhawe, ndi hezwi: “No balanganya nngu dzanga; no vha ni tshi dzulela u dzi pandela, a no ngo dzi ṱhogomela.”+
“Ndi ngazwo ndi tshi ḓo ni kaidzela vhuvhi haṋu,” u ralo Yehova.
3 “Ndi hone ndi tshi ḓo kuvhanganya masalela a nngu dzanga dzo balanganyelwaho kha mashango oṱhe,+ ndi ḓo dzi vhuisela mafuloni adzo,+ dzi ḓo dzwala dza vha nnzhi.+
4 Ndi ḓo ita uri dzi vhe na vhalisa vhane vha ḓo dzi lisa.+ A dzi tsha ḓo ofha kana u tshuwa, a hu na na nthihi ine ya ḓo xela,” u ralo Yehova.
5 “Hu ḓo ḓa maḓuvha,” u ralo Yehova, “ane ngao nda ḓo vusela Davida tavhi* ḽo lugaho.+ Khosi i ḓo vhusa, ya sumbedza ṱhalukanyo,+ ya haṱula nga nḓila yo teaho na u ita zwivhuya shangoni.+
6 Misini yawe Yuda u ḓo tshidzwa,+ Isiraele u ḓo dzula o tsireledzea.+ Dzina ḽine a ḓo vhidzwa ngaḽo ndi heḽi: Yehova Ndi Zwivhuya Zwashu.”+
7 “Naho zwo ralo, hu ḓa maḓuvha,” u ralo Yehova, “ane vha si tsha ḓo ri, ‘Ri ana nga Yehova a tshilaho, we a bvisa Vhaisiraele shangoni ḽa Egipita!’+
8 nṱhani hazwo vha ḓo ri, ‘Ri ana nga Yehova a tshilaho, we a bvisa na u vhuisa vhaḓuhulu vha nnḓu ya Isiraele vha tshi bva shangoni ḽa devhula na mashangoni oṱhe,’ e nda vha ndo vha balanganyela khao, vha ḓo dzula shangoni ḽavho.”+
9 Mulaedza u yaho kha vhaporofita, uri:
Mbilu yanga yo kwashekana ngomu hanga.
Marambo anga oṱhe a khou thenga-thenga.
Ndi nga munna o kambiwahoNga waini,Nga nṱhani ha Yehova na maipfi awe makhethwa.
10 Ngauri shango ḽo ḓala nga dziphombwe;+Shango ḽo ṱungufhala ngauri ḽo semiwa+Na pfulo ya sogani yo oma.+
Nḓila dzavho ndi mmbi, vha shumisa luvhi maanḓa avho.
11 “Muporofita na tshifhe vha na tshika.*+
Na nḓuni yanga ndo wana zwithu zwavho zwivhi,”+ u ralo Yehova.
12 “Nḓila dzavho dzi ḓo suvha dza vha na swiswi;+Vha ḓo sukumedzwa vha wa.
Ngauri ndi ḓo vha ḓisela khomboNga ṅwaha wa khaṱhulo,” u ralo Yehova.
13 “Ndo vhona zwithu zwi nengisaho kha vhaporofita vha Samaria.+
Zwine vha zwi porofita zwi ṱuṱuwedzwa nga Baali,Vha xedza vhathu vhanga vha Isiraele.
14 Ndo vhona zwithu zwi ofhisaho kha vhaporofita vha Yerusalema.
Vha ita vhupombwe+ na u amba mazwifhi;+Vha ṱuṱuwedza* vhaitazwivhi,A vha litshi u ita vhuvhi havho.
Kha nṋe vhoṱhe vha tou nga Sodoma,+Vhadzulapo vhawo vha tou nga Gomora.”+
15 Zwe Yehova wa mavhuthu a amba uri zwi ḓo ḓela vhaporofita, ndi hezwi:
“Ndi khou vha ḽisa tshimela tshi kalakataho*Na u vha ṋea maḓi a re na mulimo uri vha nwe.+
Ngauri vhaporofita vha Yerusalema vho phaḓaladza vhugunei shangoni ḽoṱhe.”
16 Yehova wa mavhuthu u ri:
“Ni songo thetshelesa zwine vhaporofita vha khou ni porofitela zwone.+
Vha khou ni fhura.*
Bono ḽine vha amba nga haḽo ḽi bva mbiluni dzavho,+A ḽi bvi mulomoni wa Yehova.+
17 Vha dzulela u vhudza vhane vha nnyadza, vha ri,‘Yehova u ri: “Ni ḓo vha na mulalo.”’+
Vha amba na vhoṱhe vhane vha ita tshikhuna vha ri,‘A hu na khombo ine ya ḓo ni wela.’+
18 Zwino ndi nnyi we a ima vhukati ha vhane vha vha tsini na YehovaUri a vhone na u pfa zwine Mudzimu a amba?
Ndi nnyi we a thetshelesa zwe a amba uri a kone u zwi pfa?
19 Ḓumbu ḽa mbiti dza Yehova ḽi ḓo vhudzula nga maanḓa;Ḽi ḓo vhudzula kha ṱhoho dza vhavhi sa tshiḓumbumukwe.+
20 Mbiti dza Yehova a dzi nga dzikiU swikela a tshi ita na u khunyeledza zwe a dzudzanya mbiluni yawe.
Ni ḓo pfesesa zwenezwi zwavhuḓi maḓuvhani a vhufhelo.
21 Vhaporofita vha a gidima naho ndi songo vha ruma.
Vha a porofita naho ndi songo amba navho.+
22 Fhedzi arali vha vhe vho ima vhukati ha vhane vha vha tsini hanga,Vho vha vha tshi ḓo vha vho ita uri vhathu vhanga vha ite zwine nda ambaNdo vha ndi tshi ḓo vha ita uri vha litshe nḓila dzavho mmbi na mishumo yavho mivhi.”+
23 “Naa ndi Mudzimu musi ndi tsini fhedzi, kana ndi dovha nda vha Mudzimu naho ndi kule?” u ralo Yehova.
24 “Naa muthu a nga dzumbama fhethu ho dzumbamaho ndi sa mu vhone?”+ u ralo Yehova.
“Naa a thi ḓadzi ḽiṱaḓulu na ḽifhasi?”+ u ralo Yehova.
25 “Ndo pfa vhaporofita vhane vha khou porofita mazwifhi dzinani ḽanga, vha tshi ri, ‘Ndo ḽora! Ndo ḽora!’+
26 Vhaporofita vha ḓo bvela phanḓa vha tshi porofita mazwifhi u swika lini? Vha amba vhufhura vhu re mbiluni dzavho.+
27 Vha ṱoḓa uri vhathu vhanga vha hangwe dzina ḽanga nga nṱhani ha miḽoro ine vha amba nga hayo sa zwe zwa itwa nga vhomakhulukuku wavho vha tshi hangwa dzina ḽanga nga nṱhani ha Baali.+
28 Litshani muporofita a ambe zwe a ḽora, fhedzi ane a vha na mulaedza wanga a u ambe nga u fhulufhedzea.”
“Ndi mini zwine zwa ita uri maṱanga a fane na thoro?” u ralo Yehova.
29 “Naa maipfi anga ha ngi mulilo+ kana hamula ine ya kwashekanya tombo ḽihulu?”+ u ralo Yehova.
30 “Ndi lwa na vhaporofita,” u ralo Yehova, “vhane vha shanda zwine nda amba vha tshi itela u vhudza vhathu zwine vha funa.”+
31 “Ndi lwa na vhaporofita,” u ralo Yehova, “vhane vha shumisa lulimi lwavho, vha ri, ‘O ri!’”+
32 “Ndi lwa na vhaporofita vha miḽoro ya mazwifhi,” u ralo Yehova, “vhane vha i anetshela uri vha xedze vhathu vhanga nga nṱhani ha mazwifhi avho na nga u zuwa havho.”+
“Fhedzi a tho ngo vha ruma kana u vha laedza. Vha nga si vhuyedze havha vhathu na luthihi,”+ u ralo Yehova.
33 “Musi vhenevha vhathu kana muporofita kana tshifhe vha tshi u vhudzisa uri, ‘Muhwalo* wa Yehova ndi ufhio?’ u vha fhindule u ri, ‘“Muhwalo ndi inwi! Ndi ḓo ni posela kule,”+ u ralo Yehova.’
34 Kha muporofita kana tshifhe kana vhathu vhane vha ri, ‘Uyu ndi muhwalo* wa Yehova!’ Onoyo munna ndi ḓo mu dzhiela vhukando na vha muṱa wawe.
35 Muṅwe na muṅwe waṋu u khou vhudza khonani yawe na wahawe uri, ‘Yehova o fhindula a ri mini? Yehova o ri mini?’
36 Fhedzi ni songo tsha amba nga ha muhwalo* wa Yehova, ngauri muhwalo* ndi zwine muṅwe na muṅwe waṋu a amba zwone, no shandula maipfi a Mudzimu a tshilaho, Yehova wa mavhuthu, Mudzimu washu.
37 “Zwine wa ḓo zwi vhudza muporofita ndi hezwi, ‘Yehova o u fhindula a ri mini? Yehova o amba na iwe a ri mini?
38 Fhedzi arali na dzulela uri, “Muhwalo* wa Yehova!” zwine Yehova a zwi amba ndi hezwi: “Nga nṱhani ha zwine na amba na ri, ‘Heḽi ipfi ndi muhwalo* wa Yehova,’ musi ndo ni vhudza uri, ‘Ni songo amba uri: “Muhwalo* wa Yehova!”’
39 ndi ḓo ni takulela nṱha nda ni laṱela kule, u katela na muḓi we nda ṋea inwi na vhomakhulukuku waṋu.
40 Ndi ḓo ita uri ni shoniswe na u nyadziwa lini na lini, a zwi nga ḓo hangwiwa.”’”+
Ṱhaluso dzi re magumoni a siaṱari
^ Kana “muḽaifa.”
^ Kana “vho gunea.”
^ Thevhedz., “khwaṱhisa zwanḓa zwa.”
^ Kana “haṱaho.”
^ Kana “Vha khou ni fhulufhedzisa zwi siho.”
^ Kana “Mulaedza u lemelaho.” Ḽeneḽi ipfi ḽa Tshihevheru ḽi na nyamba huvhili, ḽi nga ambela kha: “mulaedza wa ndeme wa Mudzimu” kana “tshithu tshi lemelaho.”
^ Kana “mulaedza u lemelaho.”
^ Kana “mulaedza u lemelaho.”
^ Kana “mulaedza u lemelaho.”
^ Kana “Mulaedza u lemelaho.”
^ Kana “mulaedza u lemelaho.”
^ Kana “Mulaedza u lemelaho.”
