Yeremia 24:1-10
-
Mahuyu avhuḓi na a si avhuḓi (1-10)
24 Ndi hone Yehova a tshi ntsumbedza mimanngi mivhili ya mahuyu ye ya vha yo vhewa phanḓa ha thembele ya Yehova, musi Khosi Nebukadanetsara wa Babele o no isa Yekonya*+ murwa wa Yehoyakimi,+ khosi ya Yuda vhuthubwani, khathihi na vhakololo vha Yuda na vhanna vha re na vhutsila na vhane vha ita zwithu nga tsimbi;* o vha bvisa Yerusalema a vha isa Babele.+
2 Muṅwe manngi wo vha u na mahuyu avhuḓi vhukuma, ane a fana na mahuyu a u thoma u vhibva, fhedzi muṅwe manngi wo vha u na mahuyu a si avhuḓi, a sa ḽei.
3 Yehova a mmbudzisa a ri: “Yeremia, u vhona mini?” Nṋe nda ri: “Ndi vhona mahuyu avhuḓi vhukuma, na ane a si vhe avhuḓi o vhaisalaho vhukuma lune a si ḽee.”+
4 Ndi hone Yehova a tshi amba na nṋe a ri:
5 “Yehova Mudzimu wa Isiraele u ri, ‘Ndi ḓo dzhia Vhayuda vha re vhuthubwani vhe vhavhuḓi u fana na enea mahuyu avhuḓi, vhe nda vha bvisa fhano nda vha isa shangoni ḽa Vhakaladea.
6 Ndi ḓo dzula ndo vha sedza uri ndi vha tsireledze, ndi ḓo ita uri vha vhuyelele kha ḽeneḽi shango.+ Ndi ḓo vha fhaṱa, a thi nga vha thuthi; ndi ḓo vha ṱavha, a thi nga vha tupuli.+
7 Ndi ḓo ita uri vha ḓivhe zwa uri ndi nṋe Yehova.+ Vha ḓo vha vhathu vhanga, nṋe nda vha Mudzimu wavho,+ ngauri vha ḓo vhuyelela kha nṋe nga mbilu yavho yoṱhe.+
8 “‘Fhedzi mahuyu a si avhuḓi, o vhaisalaho vhukuma lune a si ḽee,+ Yehova o amba hezwi nga hao: “Khosi Tsedekia+ wa Yuda, vhakololo vhawe, masalela a Yerusalema o salaho kha ḽino shango, na vhane vha dzula shangoni ḽa Egipita,+ ndi ḓo vha dzhia vha tshi nga eneo mahuyu.
9 Ndi ḓo ita uri vha ofhise kha tshaka dzoṱhe,+ musi dzi tshi vhona khombo ye nda vha ḓisela. Vha ḓo nyadziwa; ha itwa miswaswo ngavho,* vha ḓo goḓiwa, vha semiwa+ fhethu hoṱhe he nda vha balanganyela hone.+
10 Ndi ḓo vha ḓisela banga,+ nḓala na dwadze,+ u swika vha tshi fheliswa kha shango ḽe nda ṋea vhone na vhomakhulukuku wavho.”’”
Ṱhaluso dzi re magumoni a siaṱari
^ U dovha a pfi Yehoyakini kana Konya.
^ Kana “vhafuli vha tsimbi.” Kana khamusi, “vhafhaṱi vha mitsheṱo.”
^ Kana “vha koleliwa.”