Yeremia 26:1-24
26 Musi hu tshi thoma u vhusa Yehoyakimi+ murwa wa Yosia khosi ya Yuda, Yehova o vhudza Yeremia uri a ambe hezwi:
2 “Yehova u ri, ‘Ima muṱani wa nnḓu ya Yehova u ambe zwine zwa ḓo ḓela vhathu vhoṱhe vha miḓi ya Yuda vhane vha ḓa u rabela nḓuni ya Yehova. U vha vhudze zwoṱhe zwe nda u laedza; u songo sia na fhungo na ḽithihi.
3 Khamusi vha ḓo thetshelesa, muṅwe na muṅwe wavho a rembuluwa kha nḓila dzawe mmbi, ndi hone ndi tshi ḓo shandula muhumbulo wanga nga ha khombo ye nda vha ndi tshi ṱoḓa u vha ḓisela yone nga nṱhani ha mishumo yavho mivhi.+
4 U ambe navho u ri: “Yehova u ri, ‘Arali na sa pfa zwe nda amba ni si tevhedze mulayo* wanga we nda ni ṋea wone,
5 ni si thetshelese zwine vhashumeli vhanga vha vhaporofita vha zwi amba, vhe nda vha ruma kha inwi lunzhi-lunzhi, ni si vha thetshelese,+
6 ndi hone yeneyi nnḓu ndi tshi ḓo i ita zwe nda ita Shiḽo,+ ndi ḓo ita uri wonoyu muḓi u vhe wo semiwaho kha tshaka dzoṱhe dza ḽifhasi.’”’”+
7 Vhotshifhe na vhaporofita na vhathu vhoṱhe vha pfa Yeremia a tshi amba zwenezwo e nḓuni ya Yehova.+
8 Musi Yeremia a tshi fhedza u vhudza vhathu vhoṱhe zwe Yehova a mu laedza zwone, vhotshifhe na vhaporofita na vhathu vhoṱhe vha mu fara vha ri: “U ḓo fa.
9 Ndi ngani wo porofita dzinani ḽa Yehova, wa ri, ‘Heyi nnḓu i ḓo nga Shiḽo, hoyu muḓi u ḓo fheliswa wa sala u si na vhathu’?” Vhathu vhoṱhe vha kuvhanganela Yeremia nḓuni ya Yehova.
10 Musi vhakololo vha Yuda vha tshi pfa zwenezwo, vha ḓa nḓuni ya Yehova vha tshi bva nḓuni* ya khosi, vha dzula fhasi muṋangoni wa khoro ntswa ya nnḓu ya Yehova.+
11 Vhotshifhe na vhaporofita vha amba na vhakololo na vhathu vhoṱhe, vha ri: “Hoyu munna o tewa nga u haṱulelwa lufu,+ ngauri o porofita uri wonoyu muḓi u ḓo welwa nga khombo samusi no ḓipfela nga dzaṋu nḓevhe.”+
12 Ndi hone Yeremia a tshi amba na vhakololo vhoṱhe na vhathu vhoṱhe, a ri: “Ndi Yehova we a nthuma uri ndi porofite zwoṱhe zwe na zwi pfa zwa uri yeneyi nnḓu na wonoyu muḓi zwi ḓo welwa nga khombo.+
13 Shandukani ni laṱe nḓila dzaṋu na mishumo yaṋu, ni thetshelese zwine Yehova Mudzimu waṋu a zwi amba, ndi hone Yehova a tshi ḓo shandula muhumbulo wawe nga ha khombo ye a amba uri i ḓo ni wela.+
14 Fhedzi nṋe ndi zwanḓani zwaṋu. Nnyiteni zwoṱhe zwine na vhona zwo fanela.
15 Hone ni ḓivhe uri arali na mmbulaya, malofha a si na mulandu a ḓo vhilwa kha inwi na kha uno muḓi na kha vhadzulapo vhawo, ngauri ndi ngoho uri Yehova o nthuma uri ndi ni vhudze zwenezwi zwoṱhe zwe na zwi pfa.”
16 Ndi hone vhakololo na vhathu vhoṱhe vha tshi amba na vhotshifhe na vhaporofita vha ri: “Uyu munna ho ngo fanela u vhulawa, ngauri o amba na riṋe dzinani ḽa Yehova Mudzimu washu.”
17 Zwiṅwe hafhu, vhaṅwe vhahulwane vha shango vha takuwa vha amba na tshivhidzo tshoṱhe vha ri:
18 “Mika+ wa Moresethe o porofita misini ya Hiskia+ khosi ya Yuda, a amba na vhathu vhoṱhe vha Yuda, a ri, ‘Yehova wa mavhuthu u ri:
“Tsioni u ḓo limiwa sa tsimu,Yerusalema u ḓo vha shubi,+Thavha ya Nnḓu i ḓo nga zwikwara zwi re ḓakani.”’+
19 “Naa Khosi Hiskia wa Yuda na Vhayuda vhoṱhe vho mu vhulaya? Naa ho ngo ofha Yehova, a humbela uri Yehova a mu takalele, zwa ita uri Yehova a shandule muhumbulo wawe nga ha khombo ye a amba uri i ḓo vha wela?+ Ri tsini na u ḓiḓisela khombo khulu.
20 “Ho vha hu na muṅwe munna we a vha a tshi khou porofita dzinani ḽa Yehova, we a vha a tshi pfi Uriya, murwa wa Shemaya a bvaho ngei Kiriate-yearimi,+ we a porofita nga ha khombo ine ya ḓo wela wonoyu muḓi na ḽeneḽi shango u fana na zwe zwa ambiwa nga Yeremia.
21 Khosi Yehoyakimi+ na vhahali vhawe vhoṱhe na vhakololo vhoṱhe vho pfa zwe a amba, khosi yo vha i tshi ṱoḓa u mu vhulaya.+ Musi Uriya a tshi zwi pfa, a tshuwa a shavhela Egipita.
22 Ndi hone Khosi Yehoyakimi a tshi rumela Elinathani+ murwa wa Akiboro na vhaṅwe vhanna ngei Egipita.
23 Vha ya vha dzhia Uriya ngei Egipita, vha mu isa kha Khosi Yehoyakimi, we a mu vhulaya nga banga+ a mu vhulunga mavhiḓani a vhathu zwavho.”
24 Fhedzi Ahikamu+ murwa wa Shafani+ a imelela Yeremia uri vhathu vha si mu vhulaye.+
