Yeremia 27:1-22
27 Musi Yehoyakimi murwa wa Yosia, khosi ya Yuda a tshi thoma u vhusa Yehova o amba na Yeremia, a ri:
2 “Yehova o mmbudza uri, ‘Ḓiitele mabannda na dzhogo u zwi vhee mutsingani wau.
3 Nga murahu u zwi rumele kha khosi ya Edomo,+ kha khosi ya Moaba,+ kha khosi ya Vhaamoni,+ kha khosi ya Tiro+ na kha khosi ya Sidoni+ u tshi shumisa vhaḓinḓa vho ḓaho Yerusalema kha Khosi Tsedekia wa Yuda.
4 U vha laedze uri vha ṋee vhavhusi vhavho heyi ndaela:
“‘“Yehova wa mavhuthu, Mudzimu wa Isiraele, u ri; Hezwi ndi zwine na fanela u vhudza vhavhusi vhaṋu,
5 ‘Ndi nṋe we a sika ḽifhasi, vhathu na zwivhanda zwi re kha ḽifhasi nga maanḓa anga mahulu na nga tshanḓa tshanga; ndi zwi ṋea ane nda funa.*+
6 Ndo kumedzela eneo mashango oṱhe zwanḓani zwa mushumeli wanga Khosi Nebukadanetsara+ wa Babele; ndo mu ṋea na zwivhanda uri zwi mu shumele.
7 Tshaka dzoṱhe dzi ḓo shumela ene na murwa wawe na muḓuhulu wawe u vhuya u swika muvhuso wawe u tshi wa,+ nga tshenetsho tshifhinga tshaka nnzhi na mahosi a re na maanḓa a ḓo mu ita phuli.’+
8 “‘“‘Arali lushaka kana muvhuso naho u ufhio wa hana u shumela Khosi Nebukadanetsara wa Babele na u hana u ḓivhea nga fhasi ha dzhogo ya khosi ya Babele, ndi ḓo pfisa vhuṱungu lwonolwo lushaka nga banga,+ nga nḓala na nga dwadze,’ u ralo Yehova, ‘u swikela ndi tshi lu fhedza nga tshanḓa tshawe.’
9 “‘“‘Nga zwenezwo, ni songo thetshelesa vhaporofita vhaṋu, mingome yaṋu, vhaḽori vhaṋu, vhamanditi vhaṋu na vhaloi vhaṋu, vhane vha ri: “A ni nga shumeli khosi ya Babele.”
10 Ngauri vha khou ni porofitela mazwifhi, uri ni iswe kule na shango ḽa haṋu, ndi ḓo ni balanganya nda ni fhelisa.
11 “‘“‘Fhedzi lushaka lune lwa ḓivhea nga fhasi ha dzhogo ya khosi ya Babele lwa i shumela, ndi ḓo lu tendela lu tshi dzula* kha shango ḽalwo,’ u ralo Yehova, ‘uri lu ḽi lime na u dzula khaḽo.’”’”
12 Ndo dovha nda amba zwi fanaho na kha Khosi Tsedekia+ wa Yuda nda ri: “Ḓivhee nga fhasi ha dzhogo ya khosi ya Babele, u shumele ene na vhathu vhawe, ndi hone u tshi ḓo tshila.+
13 Ndi ngani iwe na vhathu vhau ni tshi fanela u vhulawa nga banga,+ nga nḓala+ na nga vhulwadze,+ sa zwe Yehova a zwi amba nga ha lushaka lune lwa sa ḓo shumela khosi ya Babele?
14 Ni songo thetshelesa zwine vhaporofita vha khou ni vhudza zwone vha tshi ri, ‘Ni nga si shumele khosi ya Babele,’+ ngauri vha khou ni porofitela mazwifhi.+
15 “‘A tho ngo vha ruma,’ u ralo Yehova, ‘fhedzi vha khou porofita mazwifhi dzinani ḽanga, arali na vha thetshelesa zwi ḓo ita uri ndi ni balanganye, ni fe, inwi na vhaporofita vhane vha khou ni porofitela.’”+
16 Nda vhudza vhotshifhe na vhenevha vhathu vhoṱhe, nda ri: “Yehova u ri, ‘Ni songo thetshelesa zwine vhaporofita vha khou ni porofitela zwone, vha tshi ri: “Thundu dza nḓuni ya Yehova dzi ḓo vhuiswa nga u ṱavhanya dzi tshi bva Babele!”+ ngauri vha khou ni porofitela mazwifhi.+
17 Ni songo vha thetshelesa. Shumelani khosi ya Babele ni tshile.+ Ndi ngani uno muḓi u tshi fanela u vha shubi?
18 Fhedzi arali vhe vhaporofita, Yehova o amba navho, kha vha humbele Yehova wa mavhuthu uri thundu dzo salaho nḓuni ya Yehova, nḓuni* ya khosi ya Yuda, na ngei Yerusalema dzi si iswe Babele.’
19 “Zwe Yehova wa mavhuthu a zwi amba nga ha phuphu,+ sambelo ḽihulu ḽi vhidzwaho Lwanzhe,+ zwigoloi+ na thundu yo salaho kha uno muḓi,
20 ye Khosi Nebukadanetsara wa Babele a si i dzhie musi a tshi thuba Yekonya murwa wa Yehoyakimi, khosi ya Yuda, a tshi vha dzhia Yerusalema a vha isa Babele vhe na vharangaphanḓa vhoṱhe vha Yuda na Yerusalema;+
21 zwe Yehova wa mavhuthu, Mudzimu wa Isiraele a zwi amba nga ha thundu yo salaho nḓuni ya Yehova, nḓuni* ya khosi ya Yuda na Yerusalema, ndi hezwi:
22 ‘“Dzi ḓo iswa Babele,+ dzi ḓo dzula henefho u vhuya u swika ḓuvha ḽine nda ḓo dzi humbula,” u ralo Yehova. “Nga murahu ndi ḓo dzi vhuisa nda dzi vhea vhudzuloni hadzo.”’”+
Ṱhaluso dzi re magumoni a siaṱari
^ Thevhedz., “ane nda vhona zwo mu tea.”
^ Thevhedz., “awela.”
^ Kana “pfamoni.”
^ Kana “pfamoni.”
