Yeremia 28:1-17
-
Yeremia na Henania muporofita wa mazwifhi (1-17)
28 Nga wonoyo ṅwaha, Tsedekia+ khosi ya Yuda a tshi kha ḓi bva u thoma u vhusa, nga ṅwaha wa vhuṋa, nga ṅwedzi wa vhuṱanu, muporofita Henania murwa wa Asuru wa ngei Gibeoni+ a amba na nṋe nḓuni ya Yehova phanḓa ha vhotshifhe na vhathu vhoṱhe, a ri:
2 “Yehova wa mavhuthu, Mudzimu wa Isiraele, u ri, ‘Ndi ḓo vunḓa dzhogo ya khosi ya Babele.+
3 Hu sa athu u fhela miṅwaha mivhili ndi ḓo vhuisa thundu dzoṱhe dza nnḓu ya Yehova dze Khosi Nebukadanetsara wa Babele a dzi dzhia henefha a dzi isa Babele.’”+
4 “‘Ndi ḓo vhuisa Yekonya+ murwa wa Yehoyakimi+ khosi ya Yuda, na vhathu vhoṱhe vha Yuda vhe vha iswa vhuthubwani Babele,’+ u ralo Yehova, ‘ngauri ndi ḓo vunḓa dzhogo ya khosi ya Babele.’”
5 Ndi hone muporofita Yeremia a tshi amba na muporofita Henania phanḓa ha vhotshifhe na vhathu vhoṱhe vho imaho nḓuni ya Yehova.
6 Muporofita Yeremia a ri: “Amen!* Ngavhe Yehova a tshi ita zwenezwi! Ngavhe Yehova a tshi ita zwe wa porofita nga u vhuisa fhano thundu ya nnḓu ya Yehova na vhathu vhoṱhe vhe vha iswa vhuthubwani ngei Babele!
7 Nga zwenezwo, ndi khou humbela uri u thetshelese mulaedza une nda vhudza iwe na vhathu vhoṱhe.
8 Vhaporofita vha kale vhe vha tshila phanḓa hanga na phanḓa hau vho porofita nga ha mashango manzhi na mivhuso mihulu na nga ha nndwa, maṱungu na dwadze.
9 Arali muporofita a porofita uri hu ḓo vha na mulalo, zwe a amba zwa itea, zwo vha zwi tshi ḓivhea uri nga ngoho ndi Yehova o rumaho onoyo muporofita.”
10 Ndi hone muporofita Henania a tshi bvisa dzhogo ye ya vha i kha mutsinga wa muporofita Yeremia a i vunḓa.+
11 A amba phanḓa ha vhathu vhoṱhe a ri: “Yehova u ri, ‘Nga yeneyi nḓila ndi ḓo bvisa dzhogo ye Khosi Nebukadanetsara wa Babele a i hwesa kha mitsinga ya tshaka dzoṱhe nda i vunḓa hu sa athu u fhela miṅwaha mivhili.’”+ Muporofita Yeremia a ṱuwa.
12 Musi muporofita Henania o no bvisa dzhogo ye ya vha i mutsingani wa muporofita Yeremia a i vunḓa, Yehova a vhudza Yeremia hoyu mulaedza, a ri:
13 “Tshimbila u ye u vhudze Henania uri, ‘Yehova u ri: “Wo vunḓa dzhogo ya thanda,+ vhudzuloni hayo u ḓo ita dzhogo ya tsimbi.”
14 Yehova wa mavhuthu, Mudzimu wa Isiraele, u ri: “Dzenedzi tshaka dzoṱhe ndi ḓo dzi hwesa dzhogo ya tsimbi kha mitsinga yadzo, uri dzi shumele Khosi Nebukadanetsara wa Babele, dzi ḓo mu shumela.+ Ndi ḓo mu ṋea na zwivhanda.”’”+
15 Muporofita Yeremia a amba na muporofita Henania+ a ri: “Iwe Henania, ndi humbela uri u thetshelese! A wo ngo rumiwa nga Yehova, fhedzi iwe wo ita uri vhathu vha fhulufhele mazwifhi.+
16 Nga zwenezwo, Yehova u ri, ‘Ndi ḓo ita uri u fe. U ḓo fa wonoyu ṅwaha, ngauri wo ṱuṱuwedza vhathu uri vha shandukele Yehova.’”+
17 Muporofita Henania a fa nga wonoyo ṅwaha nga ṅwedzi wa vhusumbe.
Ṱhaluso dzi re magumoni a siaṱari
^ Kana “Nga zwi ralo!”
