Yeremia 3:1-25
3 Vhathu vha vhudzisa vha ri: “Arali munna a ṱala mufumakadzi wawe, onoyo mufumakadzi a ṱuwa a vhingwa nga muṅwe munna, naa onoyo munna a nga dovha a vhuyelela kha onoyo mufumakadzi?”
Naa ḽeneḽo shango a ḽo ngo tshikafhadzwa tshoṱhe?+
“Wo ita vhupombwe na vhafarekano vhanzhi,+Naa zwino u fanela u vhuyelela kha nṋe?” u ralo Yehova.
2 “Lavhelesa zwikwara zwi si na miri u vhone.
Ndi ngafhi he wa si ṱuwe na vhanna uri u eḓele navho?
Wo vha u tshi dzula nḓilani wa vha lindela,U fana na mutshimbili* sogani.
U dzulela u tshikafhadza shangoNga vhupombwe hau na vhuvhi hau.+
3 Ndi ngazwo mvula i si tsha suṱa,+Na mvula i si tsha na nga luṱavula.
Wo ḓifara nga nḓila i shonisaho u fana na mufumakadzi we a ita vhupombwe;Wa si farwe nga ṱhoni.+
4 Fhedzi zwino u mmbidzelela wa ri,‘Khotsi anga, u khonani yanga ya musi ndi tshee muswa!+
5 Naa muthu u fanela u dzula o sinyuwa,Kana u dzula o fara muṅwe nga mbilu?’
Ndi zwine wa amba,Fhedzi u bvela phanḓa u tshi ita vhuvhi hoṱhe vhune wa nga kona.”+
6 Misini ya Khosi Yosia,+ Yehova o amba na nṋe, a ri: “‘Naa wo zwi vhona zwe Isiraele a sa fhulufhedzei a zwi ita? O gonya thavha dzoṱhe ndapfu na u ya fhasi ha miri yoṱhe mihulu uri a ite vhupombwe.+
7 Na musi o no ita zwenezwi zwithu zwoṱhe, ndo ḓi ri a vhuye kha nṋe,+ fhedzi a si vhuye; Yuda a ḓi lavhelesa mukomana wawe a re na tshimbevha.+
8 Musi ndi tshi vhona zwenezwo, nda ṱala Isiraele nda mu ṋea luṅwalo lwa ṱhalano+ nga nṱhani ha vhupombwe hawe.+ Fhedzi Yuda murathu wawe a re na tshimbevha a si ofhe; na ene a ya a ita vhupombwe.+
9 A tshi rengisa muvhili a si na ndavha, a bvela phanḓa a tshi tshikafhadza shango na u ita vhupombwe na matombo na miri.+
10 Naho zwo ralo, Yuda murathu wawe a re na tshimbevha ho ngo vhuyelela kha nṋe nga mbilu yoṱhe, wo vha u tshi tou vha muhoyo,’ u ralo Yehova.”
11 Yehova a amba na nṋe a ri: “Isiraele a sa fhulufhedzei o sumbedza uri o luga u fhira Yuda a re na tshimbevha.+
12 Tshimbila u ye devhula u ḓivhadze, u ri:+
“‘“Vhuya, Iwe Isiraele wa ḽishandukwa,” u ralo Yehova.’+ ‘“A thi nga ḓo u kwatamisela tshifhaṱuwo tshanga ndo sinyuwa+ ngauri ndi a fhulufhedzea,” u ralo Yehova.’ ‘“A thi nga ḓo dzula ndo u sinyutshela lwa tshoṱhe.
13 Tenda uri wo khakha na uri wo shandukela Yehova Mudzimu wau. Wo bvela phanḓa u tshi tevhela vhatsinda* fhasi ha muri muṅwe na muṅwe muhulu, fhedzi wa si thetshelese ipfi ḽanga,” u ralo Yehova.’”
14 “Vhuyani inwi vharwa vha mashandukwa,” u ralo Yehova. “Ngauri muṋe waṋu wa vhukuma* ndi nṋe; ndi ḓo ni dzhia, ndi ḓo dzhia muthihi muḓini na vhavhili muṱani, nda ni ḓisa Tsioni.+
15 Ndi ḓo ni ṋea vhalisa vhane vha ita zwine nda zwi funa,*+ vha ḓo ni fusha nga nḓivho na ṱhalukanyo.
16 Misi yeneyo ni ḓo vha vhanzhi na aṋwa mitshelo shangoni,” u ralo Yehova.+ “A ni tsha ḓo ri, ‘Mbulungelo ya mulanga wa Yehova!’ A i tsha ḓo vha hone mbiluni, a ni nga i humbuli kana u i ṱuvha, a hu tsha ḓo dovha ha itwa iṅwe.
17 Nga tshenetsho tshifhinga Yerusalema vha ḓo hu vhidza uri ndi khuluṋoni ya Yehova;+ tshaka dzoṱhe dzi ḓo kuvhangana Yerusalema+ nga dzina ḽa Yehova, a dzi tsha ḓo ita tshipimbi dza tevhela mbilu dzadzo mmbi.”
18 “Misini yeneyo, vha nnḓu ya Yuda na ya Isiraele vha ḓo tshimbila vhoṱhe,+ vha ḓo ḓa vhoṱhe vha tshi bva shangoni ḽa tshipembe vha tshi ya shangoni ḽe nda ḽi ṋea vhomakhulukuku waṋu uri ḽi vhe ifa ḽavho.+
19 Nda humbula uri, ‘Ndo u dzudza vhukati ha vharwa vhanga, nda u ṋea shango ḽavhuḓi, ifa ḽavhuḓi vhukuma kha tshaka!’*+ Ndo dovha nda humbula uri u ḓo mmbidza wa ri, ‘Khotsi anga!’ na uri wo vha u sa ḓo litsha u ntevhela.
20 ‘Sa mufumakadzi a tshi shandukela munna* wawe a mu ṱutshela, na Iwe nnḓu ya Isiraele, wo ntshandukela,’+ u ralo Yehova.”
21 Kha zwikwara zwi si na miri hu pfala mukosi,Zwililo na u humbela ha vhathu vha Isiraele,Ngauri vho tshinya nḓila dzavho;Vho hangwa Yehova Mudzimu wavho.+
22 “Vhuyani, inwi vharwa vha mashandukwa.
Ndi ḓo fhodza vhushandukwa haṋu.”+
“Ri fhano! Ro ḓa kha iwe,Ngauri u Mudzimu washu, Iwe Yehova.+
23 Ngangoho, zwikwara na khakhathi dzi re thavhani ndi mazwifhi.+
Ngangoho u tshidzwa ha Isiraele hu bva kha Yehova Mudzimu washu.+
24 U bva ri tshee vhaswa, tshithu tshi shonisaho* tsho dzhia zwithu zwoṱhe zwa vhomakhulukuku washu,+Masambi avho a nngu na a kholomo,Vharwa vhavho na vhananyana vhavho.
25 Kha ri eḓele fhasi ro shona,Ri fukedzwe nga ṱhoni dzashu,Ngauri ro khakhela Yehova Mudzimu washu,+Riṋe na vhokhotsi ashu u bva ri tshee vhaswa u swika ṋamusi,+A ro ngo thetshelesa ipfi ḽa Yehova Mudzimu washu.”
Ṱhaluso dzi re magumoni a siaṱari
^ Thevhedz., “Muarabu.”
^ Kana “midzimu ya mazwifhi.”
^ Kana khamusi, “Ngauri munna waṋu.”
^ Thevhedz., “zwine mbilu yanga ya zwi funa.”
^ Thevhedz., “kha mmbi dza tshaka.”
^ Thevhedz., “mufunwa.”
^ Kana “mudzimu a shonisaho.”