Yeremia 33:1-26
33 Musi Yeremia a tshi kha ḓi vha o valelwa Muṱani wa Vhalindi,+ Yehova a dovha a amba nae, a ri:
2 “Yehova Musiki wa ḽifhasi, Yehova we a ḽi vhumba na u ḽi khwaṱhisa; ane dzina ḽawe a pfi Yehova, u ri,
3 ‘Mmbidzeleleni, ndi ḓo ni aravha nda ni vhudza zwithu zwihulu na zwi sa pfesesei zwe na vha ni sa zwi ḓivhi.’”+
4 “Ngauri zwe Yehova Mudzimu wa Isiraele a zwi amba nga ha nnḓu dza uno muḓi na nnḓu dza mahosi a Yuda dze dza wiswa hu tshi itelwa u thivhela vho tangaho muḓi na uri hu si vhulawe vhathu nga banga,+
5 na nga ha vhane vha khou ḓa u lwa na Vhakaladea, vho ḓadzaho henefha fhethu nga zwitumbu zwa vhe nda vha vhulaya ndo sinyuwa, vhenevho vhe nga nṱhani ha vhuvhi havho vha ita uri ndi dzumbele uno muḓi tshifhaṱuwo tshanga, ndi hezwi:
6 ‘Ndi khou ḓisa dzilafho khawo,+ ndi ḓo vha fhodza, nda ita uri vha vhe na mulalo muhulu na ngoho.+
7 Ndi ḓo vhuisa mathubwa a Yuda na mathubwa a Isiraele,+ ndi ḓo vha fhaṱa u fana na u thomani.+
8 Ndi ḓo vha kunakisa kha milandu yoṱhe ya zwivhi zwe vha nnyitela zwone,+ ndi ḓo vha hangwela milandu yoṱhe ya zwivhi zwavho na vhukhakhi havho he vha nnyitela hone.+
9 Kha nṋe wonoyu muḓi u ḓo vha na dzina ḽine ḽa ḓo nḓisela khuliso, thendo na lunako phanḓa ha tshaka dzoṱhe dza kha ḽifhasi dzine dza ḓo pfa nga ha zwivhuya zwoṱhe zwe nda vha itela zwone.+ Vha ḓo ofha vha tetemela+ nga nṱhani ha zwivhuya na mulalo une nda ḓo u ḓisela wonoyu muḓi.’”+
10 “Yehova u ri: ‘Henefha fhethu hune na ḓo amba uri ndi soga na uri a hu na vhathu kana zwifuwo, kha yeneyo miḓi ya Yuda na zwiṱaraṱani zwa Yerusalema zwo ṱutshelwaho, zwi si na vhathu kana vhadzulapo kana zwifuwo,
11 hu ḓo dovha ha pfala mukosi wa u pembela na wa dakalo,+ ipfi ḽa mukwasha na ḽa muselwa, maipfi a vhane vha ri: “Livhuwani Yehova wa mavhuthu, ngauri Yehova ndi wavhuḓi;+ lufuno lwawe lu sa shanduki ndi lwa lini na lini!”’+
“‘Vha ḓo ḓisa zwifhiwa zwa u livhuwa nḓuni ya Yehova,+ ngauri ndi ḓo vhuisa mathubwa a ḽeneḽi shango, sa zwe nda zwi ita u thomani,’ u ralo Yehova.”
12 “Yehova wa mavhuthu u ri: ‘Kha ḽeneḽi soga, ḽi si na vhathu kana zwifuwo na kha miḓi yoṱhe yaḽo, hu ḓo dovha ha vha na mafulo ane vhalisa vha ḓo awedza masambi avho khao.’+
13 “‘Vhalisa vha ḓo dovha vha vhala masambi avho ngei miḓini i re dzinguni ḽa dzithavhani, ngei miḓini i re midavhini, ngei miḓini ya tshipembe, ngei miḓini i re shangoni ḽa Benyamini, ngei tsini na Yerusalema+ na miḓini ya Yuda,’+ u ralo Yehova.”
14 “‘Hu ḓo ḓa maḓuvha,’ u ralo Yehova, ‘ane nda ḓo ita zwithu zwavhuḓi zwe nda fhulufhedzisa vha nnḓu ya Isiraele na vha nnḓu ya Yuda.+
15 Nga tshenetsho tshifhinga ndi ḓo ita uri kha Davida hu bve tavhi* ḽo lugaho,+ u ḓo ita uri shangoni hu vhe na khaṱhulo yo teaho na zwivhuya.+
16 Misini yeneyo Yuda u ḓo tshidzwa,+ Yerusalema u ḓo tsireledzwa.+ U ḓo vhidzwa u pfi: Yehova Ndi Zwivhuya Zwashu.’”+
17 “Yehova u ri: ‘Hu ḓo dzula hu na munna wa lushaka lwa Davida kha khuluṋoni ya nnḓu ya Isiraele,+
18 na kha vhotshifhe vha Vhalevi a hu nga shayei muthu ane a ḓo ima phanḓa hanga uri a ṋekedze zwifhiwa zwa u fhiswa na ane a ḓo fhisa zwifhiwa zwa thoro na u ṋekedza zwiṱhavhelo.’”
19 Yehova a dovha a amba na Yeremia a ri:
20 “Yehova u ri, ‘Arali u tshi nga vunḓa mulanga wanga nga ha masiari na vhusiku, wa ita uri ḓuvha ḽi si tsha ṱavha na u kovhela nga tshifhinga tshaḽo,+
21 ndi hone mulanga we nda u vhofha na Davida mushumeli wanga u tshi ḓo vunḓea,+ ha si tsha vha na murwa ane a vhusa kha khuluṋoni yawe,+ ha vunḓea na mulanga we nda u vhofha na vhotshifhe vha Vhalevi, vhane vha vha vhashumeli vhanga.+
22 Ndi ḓo andisa vhana* vha mushumeli wanga Davida na Vhalevi vhane vha khou ntshumela, u fana na mmbi ya ṱaḓulu i sa vhalei na muṱavha wa lwanzhe u sa kalei.’”
23 Yehova a dovha a amba na Yeremia a ri:
24 “Naa a u athu u ṱhogomela zwine avha vhathu vha khou amba vha tshi ri, ‘Yehova u ḓo laṱa miṱa mivhili ye a i nanga’? Vha khou nyadza vhathu vhanga, a vha tsha vha dzhia sa lushaka.
25 “Yehova u ri: ‘Samusi ndo vhofha mulanga wanga nga ha masiari na vhusiku+ na milayo* ya ḽiṱaḓulu na ya ḽifhasi,+
26 ndi nga si vhuye nda laṱa vhana* vha Yakobo na vha mushumeli wanga Davida, nda litsha u nanga vhana* vhawe uri vha vhuse vhaḓuhulu* vha Abrahamu, Isaka na Yakobo. Ngauri ndi ḓo vhuisa mathubwa avho+ nda a pfela vhuṱungu.’”+
Ṱhaluso dzi re magumoni a siaṱari
^ Kana “muḽaifa.”
^ Thevhedz., “mbeu.”
^ Kana “maitele.”
^ Thevhedz., “mbeu.”
^ Thevhedz., “mbeu.”
^ Thevhedz., “mbeu.”
