Yeremia 34:1-22
34 Musi Nebukadanetsara khosi ya Babele na mmbi yawe yoṱhe na mivhuso yoṱhe ya ḽifhasi ye a vha a tshi i vhusa na vhathu vhoṱhe vha tshi khou lwa na Yerusalema na miḓi yawo yoṱhe,+ Yehova a amba na Yeremia a ri:
2 “Yehova Mudzimu wa Isiraele u ri, ‘Tshimbila u ye u ambe na Tsedekia+ khosi ya Yuda, uri: “Yehova u ri, ‘Uno muḓi ndi khou u kumedzela zwanḓani zwa khosi ya Babele, i ḓo u fhisa nga mulilo.+
3 A u nga ḓo ponyoka zwanḓani zwayo, ngauri u ḓo farwa wa kumedzwa khayo.+ U ḓo amba na khosi ya Babele no livhana zwifhaṱuwo, u ḓo ya Babele.’+
4 Naho zwo ralo, ipfa zwine Yehova a amba, Iwe Tsedekia khosi ya Yuda, ‘Zwe Yehova a zwi amba nga ha iwe ndi hezwi: “A u nga vhulawi nga banga.
5 U ḓo fa nga mulalo,+ vha ḓo u dubisela zwioro samusi vho dubisela vhokhotsi au vhe vha vhusa phanḓa hau, vha ḓo u lilela vha ri, ‘Yowee, muṋe washu!’ ngauri ‘ndi nṋe we a zwi amba,’ u ralo Yehova.”’”’”
6 Muporofita Yeremia o amba zwenezwi zwoṱhe na Tsedekia khosi ya Yuda e ngei Yerusalema,
7 musi mmbi ya khosi ya Babele i tshi khou lwa na Yerusalema na miḓi yoṱhe ya Yuda yo salaho,+ ine ya vha Laxisi+ na Aseka;+ ngauri yo vha i yone miḓi ya Yuda yo salaho yo tsireledzwa nga mbondo.
8 Yehova a amba na Yeremia musi Khosi Tsedekia o no vhofha mulanga na vhathu vhoṱhe vha Yerusalema uri vha vhofholole dziphuli,+
9 uri muṅwe na muṅwe a vhofholole phuli dzawe dza Vhahevheru, dza vhanna na dza vhafumakadzi, uri hu si vhe na muthu na muthihi ane a ita Muyuda wa hawe phuli.
10 Vhakololo vhoṱhe na vhathu vhoṱhe vho thetshelesa. Vho vha vho vhofha mulanga wa uri muṅwe na muṅwe a vhofholole phuli yawe ya munna na ya mufumakadzi uri a si tsha dovha a mu ita phuli. Vho thetshelesa, vha vha litsha vha ṱuwa.
11 Naho zwo ralo, vho dovha vha vhuisa phuli dza vhanna na dza vhafumakadzi dze vha vha vho dzi vhofholola, vha dovha vha vha kombetshedza uri vha vhe dziphuli.
12 Ndi hone ipfi ḽa Yehova ḽi tshi ḓa kha Yeremia ḽi tshi bva ha Yehova, ḽa ri:
13 “Yehova Mudzimu wa Isiraele u ri, ‘Ndo vhofha mulanga na vhomakhulukuku waṋu+ nga ḓuvha ḽe nda vha bvisa shangoni ḽa Egipita, nḓuni ya vhupuli,+ nda ri:
14 “Musi hu tshi fhela miṅwaha ya sumbe, muṅwe na muṅwe u fanela u vhofholola Muhevheru wahawe we a mu renga, we a mu shumela miṅwaha ya rathi; ni fanela u mu vhofholola.”+ Fhedzi vhomakhulukuku waṋu a vho ngo nthetshelesa.
15 Fhedzi inwi a si kale no shanduka na ita zwo lugaho phanḓa hanga nga u vhofholola muhura waṋu, na vhofha mulanga phanḓa hanga nḓuni ine ya vhidzwa nga dzina ḽanga.
16 Fhedzi no shanduka na tshikafhadza dzina ḽanga+ nga u vhuisa phuli dza vhanna na dza vhafumakadzi dze na vha no dzi vhofholola nge dza vha dzi tshi zwi funa, na dzi kombetshedza uri dzi dovhe dzi vhe phuli dzaṋu.’
17 “Ndi ngazwo Yehova a tshi ri: ‘Muṅwe na muṅwe waṋu ho ngo nthetshelesa nga u sa vhofholola muhura wawe.+ Zwino nṋe ndi ḓo ni vhofholola nga heyi nḓila,’ u ralo Yehova, ‘ni ḓo vhulawa nga banga, nga dwadze na nga nḓala,+ nda ita uri ni ofhise kha mivhuso yoṱhe ya ḽifhasi.+
18 Vhanna vhe vha tshinya mulanga wanga nga u sa tevhedza maipfi a mulanga we vha u vhofha phanḓa hanga musi vha tshi fhandula ṋamana ya vha zwipiḓa zwivhili, vha fhira vhukati hazwo,+
19 vhone vhakololo vha Yuda, vhakololo vha Yerusalema, vhaḓinḓa vha musanda, vhotshifhe na vhathu vhoṱhe vha ḽeneḽi shango vhe vha fhira vhukati ha zwipiḓa zwa ṋamana,
20 ndi ḓo vha kumedzela zwanḓani zwa maswina avho na zwanḓani zwa vhane vha ṱoḓa u vha vhulaya, zwitumbu zwavho zwi ḓo ḽiwa nga zwiṋoni na zwivhanda.+
21 Ndi ḓo kumedzela Tsedekia khosi ya Yuda na vhakololo vhawe zwanḓani zwa maswina avho na zwanḓani zwa vhane vha ṱoḓa u vha vhulaya na zwanḓani zwa mmbi dza khosi ya Babele,+ dzine dza khou litsha u lwa na inwi.’+
22 “‘Ndi ḓo ṋea ndaela,’ u ralo Yehova, ‘ndi ḓo dzi vhuisa kha hoyu muḓi, dza ḓa dza lwa nawo dza u thuba na u u fhisa nga mulilo;+ miḓi ya Yuda ndi ḓo i ita soga, ya si tsha dzulwa nga muthu.’”+
