Yeremia 35:1-19
-
Vharekhaba vha a thetshelesa (1-19)
35 Yehova a amba na Yeremia misini ya Yehoyakimi+ murwa wa Yosia, khosi ya Yuda, a ri:
2 “Tshimbila u ye nḓuni ya Vharekhaba+ u ambe navho, u vha ḓise nḓuni ya Yehova, kamarani dza u ḽela; u vha ṋee waini uri vha nwe.”
3 Ndi hone ndi tshi ṱuwa na Yaasanya murwa wa Yeremia murwa wa Habatsinya, vharathu vhawe, vharwa vhawe vhoṱhe na muṱa woṱhe wa Vharekhaba
4 nḓuni ya Yehova. Nda vha dzhenisa kamarani ya u ḽela ya vharwa vha Hanani murwa wa Yigidalia, mushumeli wa Mudzimu wa ngoho, ye ya vha i tsini na kamara ya u ḽela ya vhakololo ye ya vha i nṱha ha kamara ya u ḽela ya Maaseya murwa wa Shalumu mulindi wa muṋango.
5 Nda vhetshela vhanna vha Vharekhaba zwinwelo zwo ḓala nga waini, nda ri: “Inwani heyi waini.”
6 Fhedzi vhone vha ri: “A ri nwi waini, ngauri makhulukuku washu Yohanadaba*+ murwa wa Rekhaba, o ri ṋea ndaela a ri, ‘Ni songo vhuya na nwa waini, inwi kana vharwa vhaṋu.
7 Ni songo fhaṱa nnḓu kana u zwala mbeu kana u ṱavha kana u vha na tsimu ya minḓirivhe. Nṱhani hazwo, ni fanela u dzula madenndeni tshifhinga tshoṱhe, uri ni kone u tshila tshifhinga tshilapfu shangoni ḽine na vha vhatsinda khaḽo.’
8 Ngauralo, ri dzula ri tshi thetshelesa Yohanadaba murwa wa Rekhaba makhulukuku washu kha zwoṱhe zwe a ri laya zwone, nga u sa nwa waini, riṋe, vhafumakadzi vhashu, vharwa vhashu na vhananyana vhashu.
9 A ri fhaṱi nnḓu dza u dzula khadzo na minḓirivhe kana masimu kana mbeu a ri nazwo.
10 Ri dzula madenndeni, ri thetshelesa zwoṱhe zwe Yohanadaba* makhulukuku washu a ri laya zwone.
11 Musi Nebukadanetsara khosi ya Babele a tshi ḓa u lwa na ḽeneḽi shango,+ ro ri, ‘Kha ri ye Yerusalema uri ri shavhe mmbi ya Vhakaladea na ya Vhasiria,’ ndi ngazwo ri tshi vho dzula Yerusalema.”
12 Yehova a amba na Yeremia a ri:
13 “Yehova wa mavhuthu, Mudzimu wa Isiraele, u ri, ‘Iya u ambe na vhanna vha Yuda na vhadzulapo vha Yerusalema, u ri: “Naa a no ngo dzula ni tshi vhudzwa uri ni thetshelese zwe nda amba?”+ u ralo Yehova.
14 “Yohanadaba murwa wa Rekhaba o laya vhaḓuhulu vhawe uri vha songo nwa waini, vho tevhedza zwe a amba nga u sa nwa waini u swika na ṋamusi, vha thetshelesa makhulukuku wavho.+ Naho zwo ralo, ndo amba na inwi lunzhi-lunzhi, fhedzi a ni athu u nthetshelesa.+
15 Ndo ḓi dzula ndi tshi ni rumela vhashumeli vhanga vhoṱhe vha vhaporofita, ndi tshi vha ruma lunzhi-lunzhi,+ vha tshi ri, ‘Muṅwe na muṅwe kha rembuluwe kha nḓila dzawe mmbi,+ ni ite zwo lugaho! Ni songo tevhela miṅwe midzimu na i shumela. Ndi hone ni tshi ḓo bvela phanḓa ni tshi khou dzula kha shango ḽe nda ṋea inwi na vhomakhulukuku waṋu.’+ Fhedzi a no ngo sendedza nḓevhe kana u nthetshelesa.
16 Vhaḓuhulu vha Yohanadaba murwa wa Rekhaba vho tevhedza zwe makhulukuku wavho a vha vhudza zwone,+ fhedzi havha vhathu a vho ngo nthetshelesa.”’”
17 “Nga zwenezwo, Yehova Mudzimu wa mavhuthu, Mudzimu wa Isiraele u ri: ‘Kha Yuda na kha vhadzulapo vha Yerusalema ndi khou ḓisa maṱungu e nda vha sevha nga hao,+ samusi ndo vha vhudza, fhedzi vha si thetshelese, ndo dzula ndi tshi vha vhidzelela fhedzi vha si aravhe.’”+
18 Ndi hone Yeremia a tshi amba na muṱa wa Vharekhaba, a ri: “Yehova wa mavhuthu, Mudzimu wa Isiraele u ri, ‘Ngauri no thetshelesa ndaela ya makhulukuku waṋu Yohanadaba na bvela phanḓa ni tshi thetshelesa ndaela dzawe dzoṱhe, na tevhedza zwoṱhe zwe a ni laya zwone,
19 Yehova wa mavhuthu, Mudzimu wa Isiraele u ri: “A hu nga shayei u vha na muḓuhulu wa Yohanadaba* murwa wa Rekhaba ane a ḓo ntshumela.”’”
Ṱhaluso dzi re magumoni a siaṱari
^ Thevhedz., “Yonadaba,” ḽo fhelela ndi Yohanadaba.
^ Thevhedz., “Yonadaba,” ḽo fhelela ndi Yohanadaba.
^ Thevhedz., “Yonadaba,” ḽo fhelela ndi Yohanadaba.