Yeremia 36:1-32
36 Nga ṅwaha wa vhuṋa wa Yehoyakimi+ murwa wa Yosia, khosi ya Yuda, Yehova o amba na Yeremia, a ri:
2 “Dzhia mupombo u ṅwale zwoṱhe zwe nda amba nga ha Isiraele na Yuda+ na tshaka dzoṱhe,+ u bva nga ḓuvha ḽe nda amba na iwe misini ya Yosia u swika ṋamusi.+
3 Khamusi vha nnḓu ya Yuda vha tshi pfa nga ha khombo ine nda khou ṱoḓa u vha ḓisela yone, vha nga ṱutshela nḓila dzavho mmbi uri ndi vha hangwele vhukhakhi havho na zwivhi zwavho.”+
4 Yeremia a vhidza Baruki+ murwa wa Neria, a mu vhudza zwoṱhe zwe Yehova a amba nae, Baruki a zwi ṅwala kha mupombo.+
5 Ndi hone Yeremia a tshi amba na Baruki, a ri: “A tho ngo tendelwa u ya nḓuni ya Yehova.
6 Nga zwenezwo, ndi iwe ane wa tea u dzhena nḓuni uri u kone u vhalela nṱha zwe zwa ambiwa nga Yehova, zwe wa zwi ṅwala kha mupombo ndi tshi u vhudza zwone. U zwi vhalele vhathu vha re nḓuni ya Yehova nga ḓuvha ḽa u ḓidzima zwiḽiwa; u zwi vhalele vhathu vhoṱhe vha Yuda vhe vha ḓa vha tshi bva miḓini.
7 Khamusi khumbelo dzavho dza u ṱoḓa u khathutshelwa dzi ḓo swika kha Yehova, muṅwe na muṅwe a rembuluwa a ṱutshela nḓila dzawe mmbi, ngauri Yehova o amba zwa uri mbiti khulu dzi ḓo ḓela vhenevha vhathu.”
8 Ndi hone Baruki murwa wa Neria a tshi ita zwoṱhe zwe muporofita Yeremia a mu vhudza; a vhalela nṱha zwe zwa ambiwa nga Yehova kha mupombo* e nga ngomu nḓuni ya Yehova.+
9 Nga ṅwaha wa vhuṱanu wa Yehoyakimi+ murwa wa Yosia, khosi ya Yuda, nga ṅwedzi wa vhuṱahe, vhathu vhoṱhe vha ngei Yerusalema na vhathu vhoṱhe vho ḓaho Yerusalema vha tshi bva miḓini ya Yuda vha ḓivhadza nga ha u ḓidzima zwiḽiwa phanḓa ha Yehova.+
10 Baruki a vhalela nṱha zwe a vhudzwa nga Yeremia uri a zwi ṅwale kha mupombo,* musi e nḓuni ya Yehova kamarani khulwane* ya Gemaria+ murwa wa Shafani+ we a vha e mukopololi,* muṱani wa nṱha, muṋangoni wa khoro ntswa ya nnḓu ya Yehova,+ vhathu vhoṱhe vha tshi khou zwi pfa.
11 Musi Mikaya murwa wa Gemaria murwa wa Shafani a tshi pfa mafhungo oṱhe a Yehova a re kha mupombo,*
12 a tsela nḓuni* ya khosi, kamarani khulwane ya muṅwaleli. Vhakololo* vhoṱhe vho dzulaho henefho ndi havha: Elishama+ muṅwaleli, Delaya murwa wa Shemaya, Elinathani+ murwa wa Akiboro,+ Gemaria murwa wa Shafani, Tsedekia murwa wa Henania na vhaṅwe vhakololo vhoṱhe.
13 Mikaya o vha vhudza zwoṱhe zwe a zwi pfa musi Baruki a tshi khou vhala mupombo* vhathu vha tshi khou zwi pfa.
14 Ndi hone vhakololo vhoṱhe vha tshi ruma Yehudi murwa wa Nethania murwa wa Shelemia murwa wa Khushai kha Baruki, a ri: “Iḓa na mupombo we wa u vhala vhathu vha tshi zwi pfa.” Baruki murwa wa Neria a dzhia mupombo a ṱuwa nawo.
15 Vha amba nae vha ri: “Ri humbela uri u dzule fhasi u vhalele nṱha wonoyo mupombo ri tshi zwi pfa.” Baruki a vha vhalela wone.
16 Musi vha tshi tou pfa mafhungo oṱhe, vha sedzana vho tshuwa, vha amba na Baruki vha ri: “Ngangoho ri tea u vhudza khosi enea mafhungo oṱhe.”
17 Vha vhudzisa Baruki vha ri: “Ri humbela uri u ri vhudze nḓila ye wa ṅwala ngayo haya mafhungo oṱhe. Naa zwo ambiwa nga Yeremia?”
18 Baruki a vha fhindula a ri: “Ndi ene o mmbudzaho uri ndi ṅwale zwenezwi zwithu zwoṱhe, nṋe nda zwi ṅwala kha wonoyo mupombo* nga inki.”
19 Vhakololo vha amba na Baruki vha ri: “Iwe na Yeremia iyani u dzumbama, ni songo vhudza muthu he na dzumbama hone.”+
20 Ngauralo, vha ya muṱani wa khosi vha vhea mupombo kamarani khulwane ya Elishama wa muṅwaleli, vha vhudza khosi zwoṱhe zwe vha zwi pfa.
21 Khosi ya ruma Yehudi+ uri a ye a dzhie mupombo, a ya a u dzhia kamarani khulwane ya Elishama wa muṅwaleli. Yehudi a thoma u u vhala musi khosi i tshi khou zwi pfa khathihi na vhakololo vhoṱhe vho imaho nayo.
22 Khosi yo vha yo dzula nḓuni ya vhuria, nga ṅwedzi wa vhuṱahe,* ho vhaswa mulilo phanḓa hayo.
23 Musi Yehudi o no vhala zwipiḓa zwiraru kana zwiṋa, khosi ya ṱhukhula tshenetsho tshipiḓa nga lufhanga lwa muṅwaleli ya tshi posa muliloni, u swika mupombo woṱhe u tshi fhelela muliloni.
24 Khosi na vhashumeli vhayo vhoṱhe a vho ngo tshuwa kana u kherula zwiambaro zwavho, musi vha tshi pfa enea mafhungo oṱhe.
25 Naho Elinathani,+ Delaya+ na Gemaria+ vho luvhelela khosi uri i si fhise mupombo, a yo ngo vha thetshelesa.
26 Zwiṅwe hafhu, khosi yo laya Yerahamiele murwa wa Seraya, murwa wa Aziriele na Shelemia, murwa wa Abadiele uri vha fare Baruki wa muṅwaleli na muporofita Yeremia, fhedzi Yehova o vha dzumba.+
27 Yehova a dovha a amba na Yeremia musi khosi yo no fhisa mupombo we wa vha u na mafhungo e Baruki a a ṅwala o vhudzwa+ nga Yeremia, a ri:
28 “Dzhia muṅwe mupombo u ṅwale khawo mafhungo oṱhe a fanaho na e a vha e kha mupombo wa u thoma, we Yehoyakimi khosi ya Yuda a u fhisa.+
29 U vhudze Yehoyakimi khosi ya Yuda uri, ‘Yehova u ri: “Wo fhisa hoyu mupombo wa ri, ‘Ndi ngani wo ṅwala khawo uri: “Khosi ya Babele i ḓo ḓa ya fhelisa heḽi shango ha sala hu si na muthu na tshivhanda”?’+
30 Zwe Yehova a zwi amba nga ha Yehoyakimi khosi ya Yuda, ndi hezwi, ‘Ha nga ḓo vha na muthu ane a ḓo dzula kha khuluṋoni ya Davida,+ tshitumbu tshawe tshi ḓo litshwa tsha swa nga ḓuvha nga masiari na u welwa nga mahaḓa nga madekwana.+
31 Ndi ḓo vhona ene na vhaḓuhulu* vhawe na vhashumeli vhawe mulandu kha vhukhakhi havho, ndi ḓo ḓisa khombo ye nda amba nga hayo khavho+ na kha vhadzulapo vha Yerusalema na kha vhathu vha Yuda, ngauri a vho ngo thetshelesa.’”’”+
32 Yeremia a dzhia muṅwe mupombo a u ṋea Baruki wa muṅwaleli+ ane a vha murwa wa Neria, a ṅwala zwoṱhe zwe Yeremia a mu vhudza zwone kha mupombo zwe zwa vha zwi kha mupombo* we Yehoyakimi khosi ya Yuda a u fhisa nga mulilo.+ Ha engedzwa na maṅwe mafhungo manzhi a fanaho na eneo.
Ṱhaluso dzi re magumoni a siaṱari
^ Kana “bugu.”
^ Kana “bugu.”
^ Kana “kamarani ya u ḽela.”
^ Kana “wa maṅwalo.”
^ Kana “bugu.”
^ Kana “Vhaḓinḓa.”
^ Kana “pfamoni.”
^ Kana “bugu.”
^ Kana “bugu.”
^ Ndi ṅwedzi une wa thoma vhukati ha November wa fhela vhukati ha ṅwedzi wa December. Sedzani Ṱhume. B15.
^ Thevhedz., “mbeu.”
^ Kana “bugu.”
