Yeremia 37:1-21
37 Khosi Tsedekia+ murwa wa Yosia a thoma u vhusa vhudzuloni ha Konya*+ murwa wa Yehoyakimi, ngauri Khosi Nebukadanetsara wa Babele o vha o mu vhea uri a vhe khosi shangoni ḽa Yuda.+
2 Fhedzi ene na vhashumeli vhawe na vhadzulapo vha ḽeneḽo shango vha si thetshelese zwe Yehova a amba a tshi shumisa muporofita Yeremia.
3 Ndi hone Khosi Tsedekia a tshi rumela Yeyukali+ murwa wa Shelemia na Tsefanya+ murwa wa tshifhe Maaseya kha muporofita Yeremia, vha ri: “Ri humbela uri u ri rabelele kha Yehova Mudzimu washu.”
4 Yeremia o vha a tshi kha ḓi ya huṅwe na huṅwe hune a funa o vhofholowa, ngauri o vha a sa athu u valelwa dzhele.+
5 Mmbi ya Farao yo vha yo no bva Egipita,+ Vhakaladea vho tangaho Yerusalema vha pfa muvhigo nga hayo. Ngauralo, vha litsha u tanga Yerusalema.+
6 Ndi hone Yehova a tshi amba na muporofita Yeremia, a ri:
7 “Yehova Mudzimu wa Isiraele u ri, ‘Khosi ya Yuda ye ya ni ruma uri ni mmbudzise, ni i vhudze uri: “Mmbi ya Farao ine ya khou ḓa u u lamulela i ḓo vhuyelela Egipita shangoni ḽayo.+
8 Vhakaladea vha ḓo dovha vha vhuya vha lwa na uno muḓi vha u thuba na u u fhisa nga mulilo.”+
9 Yehova u ri, “Ni songo ḓifhura nga u amba uri, ‘Vhakaladea vha ḓo ri ṱutshela vha si lwe na riṋe,’ ngauri a vha nga ṱuwi.
10 Naho na vhulaya mmbi yoṱhe ya Vhakaladea ine ya khou lwa na inwi, ha sala vho huvhalaho, vha ḓo ni vutshela vha tshi bva madenndeni avho vha ḓa vha fhisa uno muḓi.”’”+
11 Musi mmbi ya Vhakaladea yo no ṱutshela Yerusalema nga nṱhani ha mmbi ya Farao,+
12 Yeremia a ṱuwa Yerusalema a ya shangoni ḽa Benyamini+ uri a wane mukovhe wawe henefho kha vhathu vha hawe.
13 Musi a tshi swika Khoroni ya Benyamini, muhulwane wa vhalindi we a vha a tshi pfi Yeria murwa wa Shelemia murwa wa Henania, a fara muporofita Yeremia, a ri: “Iwe u ima na Vhakaladea!”
14 Fhedzi Yeremia a ri: “A si ngoho! A thi khou ima na Vhakaladea.” Naho zwo ralo, Yeria a si mu thetshelese. A fara Yeremia a mu isa kha vhakololo.
15 Vhakololo vha sinyutshela Yeremia,+ vha mu rwa, vha mu valela+ nḓuni ya Yehonathani wa muṅwaleli, ye ya vha yo itwa dzhele.
16 Yeremia o vha o valelwa dzhele i re fhasi ha mavu, kamarani ye ya vha yo valwa nga miṋango, a dzula khayo maḓuvha manzhi.
17 Khosi Tsedekia a laedza uri Yeremia a vhidziwe, khosi ya mu vhudzisa tshiphirini i nḓuni* yayo.+ Ya mu vhudzisa ya ri, “Naa hu na zwe Yehova a u vhudza?” Yeremia a ri, “Zwi hone!” a dovha a ri, “U ḓo kumedzelwa zwanḓani zwa khosi ya Babele!”+
18 Yeremia a dovha a amba na Khosi Tsedekia a ri: “Iwe na vhashumeli vhau na avha vhathu ndo ni khakhela ngani, zwe zwa ita uri ni mvalele dzhele?
19 Zwino vha ngafhi vhaporofita vhau vhe vha u porofitela vha ri, ‘Khosi ya Babele a i nga ḓi ya lwa na iwe na heḽi shango’?+
20 Iwe thovhela, ndi humbela uri u nthetshelese. Ndi humbela uri u nkhathutshele. U songo nkhumisela nḓuni ya Yehonathani+ wa muṅwaleli, ngauri arali wa nkhumisela ndi ḓo fela henengei.”+
21 Khosi Tsedekia a laedza uri Yeremia a valelwe Muṱani wa Vhalindi,+ o vha a tshi ṋewa ḽofo ḓuvha ḽiṅwe na ḽiṅwe i bvaho tshiṱaraṱani tsha vhabaki u swika vhurotho+ hoṱhe vhu tshi fhela muḓini.+ Yeremia o vha a tshi kha ḓi vha o valelwa Muṱani wa Vhalindi.
